تۇركيا پوليتسياسى ىستانبۇلدا اۋقىمدى شارا وتكىزىپ, ناتيجەسىندە 3,6 ميلليون جالعان ەۋرو تاركىلەندى, دەپ حابارلايدى Egemen.kz.
بۇل ارنايى وپەراتسيا جالعان اقشا جاساۋ جانە ساتۋمەن اينالىساتىن قىلمىستىق توپتىڭ جولىن كەسۋگە باعىتتالعان.
تۇرىك قۇقىق قورعاۋ ورگاندارى جالعان ەۋرودان بولەك, بىرنەشە ءىرى بانكتەردىڭ اتىنا باسىلعان كونترافاكتىلىك چەكتەردى, سونداي-اق جالعان اقشا جاساۋ ءۇشىن پايدالانىلعان باسپا بلانكىلەرىن دە تاركىلەگەن.
«كۇش قۇرىلىمدارىنىڭ جەدەل ءىس-شارالارى بارىسىندا بىرنەشە كۇدىكتى ۇستالدى. قىلمىستىق توپ تەك تۇركيادا عانا ەمەس, باسقا ەلدەردە دە ارەكەت ەتكەن», دەلىنگەن حابارلامادا.
جالعان اقشا جاساۋشىلار زاڭسىز قارجىلىق وپەراتسيالارمەن اينالىساتىن ءىرى حالىقارالىق قىلمىستىق جەلىلەرمەن بايلانىسى بولۋى مۇمكىن دەگەن بولجام بار. قازىرگى ۋاقىتتا تۇركيانىڭ تەرگەۋ ورگاندارى جالعان كۋپيۋرالاردى تاراتۋ سحەماسىنا قاتىسقانداردى انىقتاۋ ماقساتىندا ءتيىستى جۇمىس جۇرگىزىپ جاتىر.