ىشكى ىستەر مينيسترلىگى قۇقىقتىق ءتارتىپتى جانە كەز كەلگەن زاڭ بۇزۋشىلىق ءۇشىن مىندەتتى جازالاۋدى قامتاماسىز ەتۋ شارالارىن كۇشەيتتى, دەپ حابارلايدى Egemen.kz.
«باستى قاعيدات – زاڭ مەن ءتارتىپ. ءىىم وزىندىك قاۋىپسىزدىك دەپارتامەنتى جەدەل باسقارۋ ورتالىقتارى مەن پاترۋلدىك قىزمەتتىڭ جۇمىسىن بەلسەندى قاداعالاپ جاتىر. جەدەل باسقارۋ ورتالىقتارى پاترۋلدىك پوليتسەيلەردىڭ جۇمىسىن تاۋلىك بويى باقىلاۋدا ۇستايدى. قىزمەتكەرلەر وزدىگىمەن سوندىرە المايتىن «سمارتجەتوندارمەن» جابدىقتالعان. بۇل قۇرىلعىلار بەلگىلەنگەن تالاپتاردان اۋىتقۋعا مۇمكىندىك بەرمەيدى, بارلىق ارەكەت ۇنەمى جازىلىپ وتىرادى», دەدى دەپارتامەنت باستىعى شىڭعىس الەكەشوۆ.
بۇدان باسقا, جاساندى ينتەللەكت قوسىلعان بەينەباقىلاۋ كامەرالارىنان الىنعان دەرەكتەردى تالدايتىن جۇيە قولدانىلادى.
«بۇل كەز كەلگەن قۇقىق بۇزۋشىلىقتى انىقتاۋعا جانە ونى جەدەل اشكەرەلەۋگە مۇمكىندىك بەرەدى. پوليتسيانىڭ جۇمىسى ءاربىر زاڭ بۇزۋشىنى ونىڭ مارتەبەسى مەن لاۋازىمىنا قاراماستان ءتيىستى جاۋاپكەرشىلىككە تارتۋعا باعىتتالعان. ەشكىمگە ەشقانداي ارتىقشىلىق بەرىلمەيدى. پاترۋلدىك پوليتسەيلەر زاڭ تالاپتارىن قاتاڭ تۇردە ساقتايتىنىن اتاپ وتكىم كەلەدى. ولاردىڭ تاراپىنان كەز كەلگەن زاڭسىز ارەكەتتەر ءۇشىن سايكەسىنشە جاۋاپكەرشىلىك كوزدەلگەن. ءبىز ازاماتتاردى زاڭدى ساقتاۋعا, پوليتسەيلەردىڭ زاڭدى تالاپتارىن ورىنداۋعا, لاۋازىمدى تۇلعالارعا پارا ۇسىنۋ ارەكەتتەرىنە بارماۋعا شاقىرامىز», دەدى ش.الەكەشوۆ.
سونداي-اق ءىىم رەسمي وكىلى سىبايلاس جەمقورلىققا قارسى قىزمەت اراسىندا ءتيىستى مەموراندۋمعا قول قويىلعانىن ەسكە سالدى.
«ونىڭ اياسىندا جەمقورلىقپەن كۇرەس ودان ءارى نىعايا تۇسپەك. ەگەر سiز قىزمەتكەرلەردىڭ ادەپسىز ءىس-ارەكەتتەرىنىڭ كۋاسى بولساڭىز, دەرەۋ ءىىم وزىندىك قاۋىپسىزدىك دەپارتامەنتىنە نەمەسە 1402 سەنىم تەلەفونىنا حابارلاسىڭىز. تەك بىرلەسە جۇمىس ىستەي وتىرىپ, ءبىز قوعامدا قاۋىپسىزدىكتى, قۇقىقتىق ءتارتىپتى جانە ادىلەتتىكتى قامتاماسىز ەتە الامىز», دەدى دەپارتامەنت باستىعى – ءىىم رەسمي وكىلى شىڭعىس الەكەشوۆ.