«eGov Mobile» قوسىمشاسى ارقىلى اسكەري قىزمەتكە قاتىستى دەرەكتەردى ونلاين قاراپ, قاجەت بولعان جاعدايدا الۋ مۇمكىندىگى پايدا بولدى. «تسيفرلىق مالىمەتتەر» سەرۆيسىنىڭ جاڭارتىلعاننان كەيىن قوسىمشاعا ەكى جاڭا قىزمەت ەنگىزىلدى. ءبىرىنشىسى – ازاماتتىڭ اسكەري قىزمەتكە شاقىرىلۋ مارتەبەسىن كورۋ بولسا, ەكىنشىسى – اسكەري مىندەتتىلىك مارتەبەسىنە قاتىستى مالىمەتتى كورۋ.
ەندى پايدالانۋشىلار بۇل مالىمەتتەردى ءوز بەتىنشە جسن, كومپانيانىڭ بسن-ءى نەمەسە ءموبيلدى ازاماتتار بازاسىنا تىركەلگەن تەلەفون ءنومىرى ارقىلى جىبەرە الادى. سونىمەن قاتار جۇمىس بەرۋشىنىڭ تىكەلەي سۇراۋى بويىنشا دا اقپاراتتى بولىسۋگە بولادى. مۇنداي جاعدايدا جۇمىس بەرۋشى سۇراۋ جىبەرەدى, ال پايدالانۋشى سۇراۋدى راستايدى نەمەسە كەرى قايتارادى. دەرەكتەردى مەسسەندجەرلەر نەمەسە ەلەكتروندى پوشتا ارقىلى دا وڭاي جىبەرۋگە مۇمكىندىك بار.
قىزمەتتى پايدالانۋ ءۇشىن قولدانۋشى «eGov Mobile» قوسىمشاسىندا اۆتوريزاتسيالانىپ, «مالىمەتتەر» بولىمىنە ءوتىپ, قاجەتتى اقپاراتپەن جۇمىس ىستەي الادى. ەگەر مالىمەتتەردى قايتارىپ الۋ قاجەت بولسا, ونى قوسىمشاداعى ارنايى باتىرما ارقىلى جاساۋعا بولادى. بۇل جاڭا مۇمكىندىك قورعانىس مينيسترلىگى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن «ۇلتتىق اقپاراتتىق تەحنولوگيالار» اق-نىڭ بىرلەسكەن جۇمىسىنىڭ ناتيجەسىندە ىسكە قوسىلدى.