سوناۋ ستۋدەنتتىك كەزىنەن-اق جارق ەتىپ كورىنىپ, اعالاردىڭ القاۋىنا يە بولعان تالانتتى اقىننىڭ ءبىرى – ابۋباكىر سمايىلوۆ. بۇگىندە ازاماتتىق ايشىقتى ۇنىمەن دارالانىپ جۇرگەن قالامگەردىڭ جاڭا تىنىسى اشىلعانداي.
ەلوردادا قازاقتىڭ بەلگىلى اقىنى, تۇڭعىش «دارىن» مەملەكەتتىك جاستار سىيلىعىنىڭ, حالىقارالىق «الاش» ادەبي سىيلىعىنىڭ يەگەرى ابۋباكىر سمايىلوۆتىڭ «قۇس جولىندا بىرەۋ ءجۇر جوق قاراعان» اتتى كىتابىنىڭ تۇساۋكەسەر ءراسىمى ءوتتى. جيىنعا بەلگىلى اقىن-جازۋشىلار, قورعانىس سالاسىنىڭ ارداگەرلەرى مەن وقىرماندار قاتىستى.
كەش تىزگىنىن قولعا العان اقىن باۋىرجان باباجان ۇلى تاۋەلسىزدىك جىلدارىنداعى ادەبي ۇدەرىستى, سول شاقتاعى ابۋباكىر اقىننىڭ كەڭىنەن تانىلعان ەسىم-سويى مەن ولەڭدەرى حاقىندا ايتىپ ءوتتى. سونىمەن بىرگە ءىس-شارادا ءسوز العان اقىن, پارلامەنت ءماجىلىسىنىڭ دەپۋتاتى جاناربەك ءاشىمجان اقىن پوەزياسىنىڭ ەرەكشەلىگىنە توقتالدى.
– بىرىنشىدەن, اقىنىمىزدى قايتارىپ بەرگەنى ءۇشىن ورتامىزداعى گەنەرال مىرزالارعا العىس ايتقىم كەلىپ وتىر. شىنىندا, بۇگىن قازاقتىڭ اسا تالانتتى قالامگەرىنىڭ ۇلكەن مەرەيتويى ءوتىپ جاتىر. قازاقتا جاقسى اقىندار كوپ, بىراق 90-جىلدارى جۇماتاي جاقىپباەۆ سەكىلدى اقىنداردىڭ كوزىن كورىپ, سول توپالاڭ جىلداردا ءوزىن جوعالتپاي امان شىققان ابۋباكىر اعالارىمىزداي اقىندار كەمدە-كەم. بۇل كىسى باسىندا ليريك اقىن بولاتىن, كەيىننەن ازاماتتىق پوەزيانىڭ ءىرى وكىلدەرىنىڭ بىرىنە اينالدى. اقىننىڭ گازەت-جۋرنالداردا جاريالانعان جىرلارىنا قاراپ وتىرساق, كەشەگى مۇقاعالي, ومىرزاق قوجامۇراتوۆ, تولەگەن ايبەرگەنوۆتەردىڭ مەكتەبىنەن سۋسىنداعانىن اڭعارامىز, – دەدى جاناربەك ءاشىمجان.
جيىندا بەلگىلى جۋرناليست ارمان سقابىل ۇلى «ابۋباكىردىڭ كوزىنشە تابىل ولەڭ وقىمايتىن. ابۋباكىر وقىسىن, سونىڭ ولەڭىن تىڭدايىق دەپ وتىراۋشى ەدى...», دەپ ستۋدەنتتىك شاقتى ەسكە الدى. تۇڭعىش بارد اقىن تابىلدى دوسىموۆتىڭ ۇلى ابىل دوسىموۆ اقىنعا تىلەك ءبىلدىرىپ, اننەن شاشۋ شاشتى. سونىمەن قاتار ءانشى اسحات ومىرعالي ابۋباكىر سمايىلوۆتىڭ سوزىنە, باۋىرجان ۇسەنوۆتىڭ انىنە جازىلعان «اق شاعالا» ءانىن ورىنداعاندا, جۇرەگى ەزىلمەگەن جان قالمادى.
قازاقتىڭ اقسەلەۋى: «جىر دارياسى ايدىنىنان ابۋباكىر سمايىلوۆ كەرگەن اق جەلكەن مويىن بۇرعىزادى. ءتاڭىرىم جەلىن وڭىنان تۇرعىزا كورگەي! تامىرىن تەرەڭنەن تارتقان تەگەۋرىن دەن قويعىزادى» دەسە, پوەزيا پاديشاسى فاريزا وڭعارسىنوۆا: «مەن ابۋباكىردىڭ قىجىلى مەن قىشقىل مۇڭى كوپ ولەڭدەرى وقىرماندى ەلدىك نامىس پەن جۋساننىڭ يىسىندەي ۇلتتىق بولمىسپەن قورەكتەندىرەدى دەپ ويلايمىن جانە ونىڭ اقىندىق بولاشاعىنا ۇمىتپەن قارايمىن» دەگەنى بەلگىلى. ىرىلەر ءۇمىت ارتقان ارقالى اقىننىڭ كىتابى مەملەكەتتىك تاپسىرىسپەن العاش رەت جارىققا شىعىپ, وقىرمان قاۋىمعا جول تارتىپ وتىر.