قازاقستاندا ماتەريالدىق ەمەس مۇرانى قورعاۋ تۋرالى زاڭ جوباسىن ازىرلەۋ ۇسىنىلدى. بۇل ماسەلە ءماجىلىستىڭ الەۋمەتتىك-مادەني دامۋ كوميتەتىنىڭ وتىرىسىندا تالقىلاندى, دەپ حابارلايدى Egemen.kz.
قر پارلامەنتى ءماجىلىسىنىڭ دەپۋتاتى ەربولات ساتىبالدين «ماتەريالدىق ەمەس مادەني مۇرانى قورعاۋ تۋرالى» زاڭ جوباسىن ازىرلەۋ يدەياسىن قولدادى. ونىڭ پىكىرىنشە, قۇجاتتا ەلىمىزدەگى ماتەريالدىق ەمەس مۇراعا قاتىستى بارلىق نارسەنى قورلاعانداردىڭ قالاي جازالاناتىنىن ناقتىلاۋ قاجەت.
«ادەت-عۇرىپ, سالت-داستۇرگە كەلسەك, ولاردىڭ قوعامداعى ورنىن انىقتاۋىمىز كەرەك. ادەت-عۇرىپتى ناسيحاتتايتىن ادام بولعان سوڭ, ونىڭ مارتەبەسىن دە انىقتاۋىمىز كەرەك. كيىز ۇيدە بيلەگەن قىزداردى كوردىڭىز بە؟ نە ىستەيمىز؟ سوندىقتان قىلمىستىق كودەكستە بۇل ماسەلەلەردى دە وسى زاڭ جوباسى اياسىندا قاراستىرۋىمىز كەرەك», دەدى ە.ساتىبالدين.
دەپۋتات زاڭ جوباسىن ازىرلەۋ كەزىندە وسى ماسەلەلەردىڭ بارلىعىن رەتتەيتىن مينيسترلىكتەردى انىقتاۋ قاجەتتىگىن اتاپ ءوتتى.