بىرىڭعاي ۋاقىت بەلدەۋى وزگەرىسسىز قالادى

ساۋدا ءمينيسترى 2024 جىلدىڭ 19 قاڭتارىندا ۇكىمەت ەلدە 5-ءشى ۋاقىت بەلدەۋىن قولدانۋ تۋرالى شەشىم قابىلداعانىن ەسكە سالدى. ءتيىستى وزگەرىستەر «ۋاقىتتى ەسەپتەۋ ءتارتىبى تۋرالى» قاۋلىعا ەنگىزىلدى.

«بۇل شەشىم بىرنەشە جىل بويى وسى ماسەلەنى كوتەرگەن قوستاناي جانە قىزىلوردا وبلىستارى ازاماتتارىنىڭ كوپتەگەن وتىنىشتەرىن ەسكەرە وتىرىپ قابىلداندى. شەشىم قابىلداۋ كەزىندە ۋاقىتتى ەسەپتەۋ ءتارتىبى بويىنشا ارنايى قۇرىلعان ۆەدومستۆوارالىق جۇمىس توبىنىڭ ەسەبىندە كورسەتىلگەن عىلىمي نەگىزدەلگەن دالەلدەر پايدالانىلدى, وعان پارلامەنت دەپۋتاتتارى, مەملەكەتتىك جانە جەرگىلىكتى ورگانداردىڭ وكىلدەرى, عالىمدار, ساراپشىلار, ينستيتۋتتار مەن 60 ادامنان تۇراتىن قوعامدىق بىرلەستىكتەر كىردى», دەدى مينيستر.

ارمان شاققاليەۆتىڭ ايتۋىنشا, UTC+5 ساعاتتىق بەلدەۋىن IANT ۇيىمى قولداعان. ول ساعات بەلدەۋىن وزگەرتۋ تۋرالى قابىلدانعان شەشىم عىلىمي نەگىزدەلگەنىن اتاپ ءوتتى.

ايتا كەتەيىك, UTC+5 ۋاقىت بەلدەۋى ەلىمىزدىڭ حالقىنىڭ 76%-دان استامى تۇراتىن (15 ملن 240 مىڭ ادام) استانا, الماتى, پەتروپاۆل, وسكەمەن, شىمكەنت, سەمەي جانە پاۆلودار قالالارىن قوسا العاندا, 67,5-تەن 82,5 گرادۋسقا دەيىنگى بويلىقتاردى قامتيدى. بۇگىنگى تاڭدا الەمنىڭ 195 ەلىنىڭ 117-ءسى گەوگرافيالىق ۋاقىتتى ستاندارتتى ۋاقىت بەلدەۋىنە مۇمكىندىگىنشە جاقىن ەتىپ تاڭدادى, ويتكەنى ادامنىڭ تسيركادتى ىرعاعى تابيعي كۇندىزگى كەزەڭمەن سينحروندالادى. 

پرەمەر-مينيستر ساۋدا جانە ينتەگراتسيا ءمينيسترى قولدانىستاعى ۋاقىت بەلدەۋىنىڭ پايداسىنا بارلىق جان-جاقتى دالەلدەر كەلتىرگەنىنە توقتالدى.

«ۇكىمەت بۇل شەشىمدى قولدايدى. ەلىمىزدىڭ اۋماعىنىڭ كوپ بولىگى 5-ءشى ۋاقىت بەلدەۋىندە ورنالاسقان, سوندىقتان عىلىمي تۇرعىدان بۇل دۇرىس شەشىم. ساۋدا جانە اقپارات مينيسترلىكتەرىنە نەعۇرلىم تۇسىنىكتى اقپاراتتىق-ءتۇسىندىرۋ ناۋقانىن جۇرگىزۋدى تاپسىرامىن», دەدى ولجاس بەكتەنوۆ.