اقتوبە قالاسىندا دزيۋدودان ەرەسەكتەر اراسىندا ەل چەمپيوناتى مارەسىنە جەتتى. كەلەر جىلدىڭ ەنشىسىندەگى الەمدىك دودالارعا باراتىن بالۋانداردى ىرىكتەۋ الامانى بولعاندىقتان, بيىلعى بىرىنشىلىككە قاتىسۋشىلاردىڭ شوعىرى قالىڭ بولدى. ءتىپتى ءبىر سالماق دارەجەسىندە 50-دەن استام ساڭلاق سىنعا ءتۇستى.
60 كگ سالماقتا بىزدە باسەكەلەستىك وتە جوعارى. بۇل جولى 55 بالۋان جۇلدەگە تالاستى. كوپشىلىك جاستار اراسىندا الەم چەمپيونى, گران-پري, گراند-سلەم سايىستارىندا ولجا سالعان ماعجان شامشادين, حالىقارالىق دودالارعا ءتۇسىپ, ىسىلعان نۇرقانات سەرىكباەۆ, جاستار اراسىندا الەم چەمپيوناتىنىڭ ەكى دۇركىن جۇلدەگەرى تالعات ورىنباسار سىندى ساڭلاقتار توپ جارادى دەپ سەنگەن. بىراق ءبىرىنشى اينالىمدا نۇرقانات پەن تالعاتتىڭ جولى ءتۇيىسىپ, جاستىق جىگەرمەن تالعات باسىم ءتۇستى. تالعات ەكىنشى اينالىمدا كۇتپەگەن جەردەن دانيار قىلىشەۆكە ەسە جىبەردى. بۇل سالماقتا فينالعا قىزىلوردالىق ماعجان شامشادين مەن قوستانايلىق ءنۇرادىل ءالجان شىعىپ, قىلعىندىرۋ ادىسىمەن ءنۇرادىل ەل چەمپيونى اتاندى. قولا مەدالدى الديار قارعۇلوۆ (قاراعاندى وبلىسى), نۇرگەلدى قانات (ماڭعىستاۋ وبلىسى) ەنشىلەدى.
66 كگ سالماق دارەجەسىندە استانالىق ەرجان ەرەنقايىپوۆ فينالدا قىزىلوردالىق ەرداۋلەت بوزجانى جىعىپ, ەل چەمپيونى اتاندى. قولا مەدال باۋىرجان نارباەۆ (ماڭعىستاۋ وبلىسى), ميراس جونىسوۆقا (اقتوبە وبلىسى) بۇيىردى. ەرجاندى جانكۇيەرلەر قازاق كۇرەسىنىڭ شەبەرى رەتىندە دە جاقسى تانيدى. ءتول كۇرەستەن دە بايراقتى دودالاردا توپ جارعان بالۋان.
جاستار قارىمدى ەكەنىن 73 كگ سالماقتا دا كورسەتتى. پاريج جازعى وليمپياداسىنا قاتىسۋشى دانيار شامشاەۆتى ىرىكتەۋدە ىعىستىرعان بارىس قۋان (اباي وبلىسى) فينالدىق بەلدەسۋدە ەسەت قۋانوۆقا (اقتوبە وبلىسى) ەسە جىبەرىپ, كۇمىس مەدالدى مىسە تۇتتى. قولا جۇلدەنى سايات سەيىتقاليەۆ (بقو), يسلام توقتاسىن (الماتى وبلىسى) يەلەندى.
81 كگ سالماق دارەجەسىندە ءمادي امانگەلدى (استانا) فينالدىق تارتىستا قىزىلوردالىق ايعالي قالدىبەكتى جەڭدى. دوسحان جولجاقسىنوۆ (جەتىسۋ وبلىسى), ازات كۇمىسباي (ماڭعىستاۋ وبلىسى) قولا جۇلدەگەر اتاندى.
بيىلعى چەمپيوناتتا دا سالماق دارەجەسى اۋىرلاعان سايىن قاتىسۋشىلار سانى كەمىپ وتىردى. مىسالى, 90 كيلودا 40 بالۋان تاتاميگە شىقتى. ۇزاق مەرزىمدىك ۇزىلىستەن كەيىن سپورتقا قايتا ورالعان ديدار حامزا (تۇركىستان وبلىسى) ءوزىنىڭ باعىن وسى سالماقتا سىناپ كورۋگە بەل بۋعان ەدى. 19 جاسىندا ريو جازعى وليمپياداسىنا قاتىسىپ, 2021 جىلى توكيو وليمپياداسىندا بەلدەسكەن تاجىريبەلى بالۋاننىڭ جولى بولمادى. جەرەبە ءساتتى ءتۇسىپ, سايىستى ەكىنشى اينالىمنان باستاعان ديدار جامبىلدىق نۇعمان بيبارىستى جىققانىمەن, شيرەك فينالدا اباي وبلىسىنىڭ ءۇمىتىن ارقالاپ كەلگەن ەرماحان انۋاربەكوۆكە ەسە جىبەردى. ەرماحان فينالعا دەيىنگى قارسىلاستارىن ايقىن ۇتىپ, فينالدىق بەلدەسۋدە ماڭعىستاۋلىق مەيىرلان ماكسيمنەن باسىم ءتۇستى. قولا مەدال قۇدىرەت دوسىموۆ (شىمكەنت) پەن ايدار اراپوۆقا (تۇركىستان وبلىسى) بۇيىردى. 100 كگ سالماقتا شىمكەنتتىك مارات بايقامىروۆ چەمپيون اتاندى. فينالدىق باسەكەدە الماتىلىق بەيبىت ماديەۆتەن باسىم ءتۇستى. قولا مەدالدى ەرمۇحان ەستاي (استانا), ەرسۇلتان مۇزاپپاروۆ (شىمكەنت) ەنشىلەدى. اسا اۋىر سالماقتا (+100 كگ) ءادىل ورازباەۆ (اباي وبلىسى) فينالدىق تارتىستا ەلامان ەرعاليەۆتى (قىزىلوردا وبلىسى) جىقتى. ءمادي ەدىلباەۆ (الماتى وبلىسى), جامبىل تۇرعىنعاليەۆكە (جامبىل وبلىسى) قولا مەدال بۇيىردى.
ايەلدەر دوداسىندا دا جاس تالانتتار جارقىراي كورىندى. اسىرەسە 48 كگ سالماقتاعى تارتىس قارقىندى ءوتتى. جەتىسۋ وبلىسىنىڭ بالۋانى ديانا بۇركەەۆا فينالدا شىمكەنتتىك سابينا يۋلداشبەكوۆانى جەڭىپ, چەمپيون اتاندى. ارۋجان دانايبەك (جامبىل وبلىسى) مەن زارينا حۋسنادين (الماتى قالاسى) قولا مەدال ەنشىلەدى.
52 كگ سالماق دارەجەسىندە دە جاس بۋىن قارىمىن كورسەتتى. 23 بالۋاننىڭ اراسىنان فينالدىق تارتىسقا تولعاناي ابەۋوۆا (اقمولا وبلىسى) مەن الماتى وبلىسىنىڭ ءۇمىتى ارۋجان ەرەجەپوۆا شىققان. تولعانايدىڭ مەرەيى ۇستەم ءتۇسىپ, چەمپيون اتاندى. قولا جۇلدە سارا شۇعاەۆا (الماتى قالاسى), قۇندىز جىلقىبايعا (قىزىلوردا وبلىسى) بۇيىردى. وزگە سالماقتاردا مىنا بالۋاندار ولجالى بولدى. 57 كگ: 1. باقىت قۇساقباەۆا (اقتوبە وبلىسى), 2. دانا ءابدىروۆا (اتىراۋ وبلىسى), 3. كارينا قارەكەنوۆا (اباي وبلىسى), دينا مۇحانبەت (قىزىلوردا وبلىسى). 63 كگ: 1. ەسميگۇل كۋيۋلوۆا (اتىراۋ وبلىسى), 2. سامالاي ەرعاليەۆا (قوستاناي وبلىسى), 3. ۇلدانا تاڭجارىقوۆا, اسىلجان ورىنباساروۆا (ەكەۋى دە جامبىل وبلىسى). 70 كگ: 1. ەكاتەرينا توكارەۆا (الماتى وبلىسى), 2. كريستينا سوتنيكوۆا (اباي وبلىسى), 3. ديانا تەلباەۆا (قاراعاندى وبلىسى), اجار اسحات (اباي وبلىسى). 78 كگ: 1. ارۋنا جانگەلدينا (اقتوبە وبلىسى), 2. نازەركە تىلەۋحانوۆا (اباي وبلىسى), 3. زامزاگۇل فايزوللانوۆا (شىمكەنت قالاسى), اناستاسيا ناگاچەۆسكايا (الماتى قالاسى). +78 كگ: 1. نازگۇل ماراتوۆا (سقو), 2. ايىمزادا دۋمانقىزى (اتىراۋ وبلىسى), ايدا تويشىبەكوۆا (قاراعاندى وبلىسى), ايدانا عازيزقىزى (قىزىلوردا وبلىسى).
پاريج جازعى وليمپياداسىنىڭ چەمپيونى ەلدوس سمەتوۆ, وليمپيادانىڭ قولا جۇلدەگەرى عۇسمان قىرعىزباەۆ, الەم چەمپيوناتىنىڭ جۇلدەگەرى ءابيبا ابۋجاقىنوۆا ەل چەمپيوناتىن تاماشالاپ, جانكۇيەرلىك ەتتى. «جاستار ءوسىپ كەلەدى ەكەن, باسەكەلەستىك تۋىنداعاندا ورلەۋ بولادى. ءاربىر سالماقتا كەيىنگى تولقىننىڭ مىعىم ەكەنىن باعامدادىق. ءبىزدىڭ العان اسۋىمىزدان دا اساتىن بالۋانداردىڭ شىعاتىنىنا سەنەمىن», دەدى ەلدوس سمەتوۆ.