تۇعىلدىق ورەندەر تۇعىردان كورىنسىن

جاڭا كەشەننىڭ قۇ­رىلىسى 2023 جىلى باستالعان ەدى. قۇ­رىلىستى «AN Groups» جشس مەردىگەرلىك كومپانياسى مەر­زىمىنەن ءبىر اي بۇرىن اياقتاپ, اۋىل تۇرعىندارىنىڭ يگىلىگىنە ۇسىنىپ وتىر.

جاڭا كەشەن اۋىل ازامات­تارىنىڭ بوس ۋاقىتتارىن ءتيىمدى وتكىزۋگە ارنالعان ورىن بولارى انىق. ءتيىمدى وتكىزىپ قانا قويماي, سالاماتتى ءومىر سالتىن ۇستانۋعا سەرپىن بەرەدى. مۇندا ءار جاستاعى ازاماتتار بادمينتون, باسكەتبول, ۆولەيبول, تەننيس, ارمرەستلينگ, بوكس, قازاق كۇرەسى سەكىلدى سپورت تۇرلەرىمەن اينالىسا الادى. كەشەننىڭ بارلىق سپورت زالدارى زاماناۋي سپورتتىق قۇرال-جابدىقتارمەن قامتاماسىز ەتىلگەن.

– مۇنداي سپورت كەشەنى بىزگە وتە قاجەت ەدى. بۇدان بىلاي اركىم ءوزى قالاعان سپورت تۇرلەرىمەن ەركىن اينالىسا الادى. بوكسپەن شۇعىلدانىپ جۇرگەنىمە التى جىل بولدى. بۇعان دەيىن جاتتىعۋلار اقجار اۋىلىندا ءوتىپ تۇراتىن. ەندىگى جەردە وسىناۋ كەشەننەن كىل مىقتى سپورتشىلار شىعارىنا سەنىم بىلدىرەمىز, – دەيدى جاس بوكسشى ەرسۇلتان ەرمەك ۇلى.

كەيىنگى بەس-التى جىلدىڭ كولەمىندە شىعىس قازاقستان وبلىسىندا سپورتتى دامىتۋعا كوپ كوڭىل ءبولىنىپ كەلەدى. بىلتىردىڭ وزىندە وبلىستا 15 جاڭا سپورت نىسانى پايدالانۋعا بەرىلدى. ءبىر سوزبەن, حالىقتىڭ بۇقارالىق سپورتپەن اينالىسۋى­نا ايتارلىقتاي جاعداي جاسالىپ جاتىر.

سپورت كەشەنىنىڭ اشىلۋ سالتاناتىنا وبلىس اكىمىنىڭ ءبى­رىنشى ورىنباسارى نۇرىمبەت ساقتاعانوۆ ارنايى كەلىپ, تۇر­عىنداردى قۇتتىقتاپ, جاڭا كەشەندى ءتيىمدى پايدالانۋ كەرەك­تىگىن اتاپ ءوتتى.

– ءار اۋىلداردا بۇقارالىق سپورتتى دامىتۋ ارقىلى حالىق دەنساۋلىعىن جاقسارتۋ, جاستاردى سالاماتتى ءومىر سالتىنا باۋ­لۋ قاجەت. سول ماقساتتا مەملەكەت وسىنداي سپورت كەشەندەرىن كوپتەپ سالىپ جاتىر. تۇعىلدىڭ سپورتشىلارى تۇعىردان كورىنە بەرسىن! – دەدى ن.ساقتاعانوۆ.

سونداي-اق تۇعىل اۋىلدىق وكرۋگىنە قاراستى بايتوعاس اۋىلىندا مەديتسينالىق پۋنكت بوي كوتەردى. بۇگىن-ەرتەڭ ونىڭ دا لەنتاسى قيىلىپ, حالىقتى قۋانتادى.

شىعىس قازاقستان وبلىسى,

تارباعاتاي اۋدانى,

تۇعىل اۋىلى