جوعارعى سوت سوتتالۋشىلارعا قاتىستى سوت اكتىلەرىنىڭ كۇشىن جويدى

سوت ۇكىمىمەن ت., بوتەننىڭ سەنىپ تاپسىرىلعان مۇلكىن ۇرلاعانى ءۇشىن (قك-ءنىڭ 189-بابى 4-بولىگىنىڭ 2-تارماعى), ال ر.ت. - ۇرلىققا قاتىسقانى ءۇشىن (قك-ءنىڭ 28-بابىنىڭ 5-بولىگى, 189-بابىنىڭ 4-بولىگىنىڭ 2) تارماعى) 7 جىلعا باس بوستاندىعىنان ايىرۋعا سوتتالعان.

تاعىلعان ايىپقا سايكەس, ت., جشس-ءنىڭ ساۋدا وكىلى بولا تۇرا, كۇيەۋى ر.ت. كومەگىمەن تاۋارلاردى كاسساعا قاراجاتسىز وتكىزىپ, زاڭسىز يەمدەنگەن, سونداي-اق تاۋارلاردى شوت-فاكتۋراسىز اكەتكەن.

ناتيجەسىندە جشس جالپى سوماسى 72 ميلليون تەڭگەدەن استام شىعىنعا ۇشىراعان.

ء«ىستى قاراۋ ناتيجەلەرى بويىنشا كاسساتسيالىق سوت القاسى كەلەسىدەي قورىتىندىعا كەلدى.ءىس ماتەريالدارىن زەردەلەۋ كورسەتكەندەي, ت.-عا 44 ملن. تەڭگەنىڭ تاۋارىن ۇرلاعانى ءۇشىن ايىپ تاعىلعان شوت-فاكتۋرالاردا سوڭعىسىنىڭ قولتاڭباسى جوق. قويما مەڭگەرۋشىسىنىڭ, قويماشىلاردىڭ, باقىلاۋشىلاردىڭ ايعاقتارى جان-جاقتى تەكسەرىلمەگەن جانە ءىس بويىنشا باسقا دالەلدەرمەن سالىستىرىلماعان.سوتتالعانداردىڭ قويمالاردان تاۋاردى شوت-فاكتۋراسىز شىعارۋعا قاتىستى ۋاجدەرى جوققا شىعارىلماعان, كەرىسىنشە, كۋاگەر-ساۋدا وكىلدەرىنىڭ ايعاقتارىمەن, سونداي-اق قويماشىلاردىڭ ايعاقتارىمەن راستالعان. سەرىكتەستىكتىڭ ساۋدا وكىلدەرىنىڭ ۇيالى تەلەفوندارى ساراپتامادان وتپەگەن. تاۋارلارعا وتىنىمدەر بويىنشا سوت-تەحنيكالىق ساراپتاما تاعايىندالماعان. ءىس بويىنشا جۇرگىزىلگەن سوت-بۋحگالتەرلىك ساراپتامالاردىڭ سەنىمدىلىگى مەن وبەكتيۆتىلىگى ولاردىڭ بۇزۋشىلىقتارمەن جۇرگىزىلۋىنە كۇمان كەلتىرەدى, ياعني ۇرلىقتىڭ ناقتى سوماسى انىقتالماعان. قپك-ءنىڭ 24-بابىنا سايكەس ءىستى دۇرىس شەشۋ ءۇشىن قاجەتتى جانە جەتكىلىكتى ءمان-جايلاردى جان-جاقتى, تولىق جانە وبەكتيۆتى زەرتتەۋ ءۇشىن بارلىق شارالار قابىلدانۋى ءتيىس», دەلىنگەن جوعارعى سوتتىڭ حابارلاماسىندا.

سوندىقتان سوت القاسى سوت اكتىلەرىنىڭ كۇشىن جويىپ, اپەللياتسيالىق ساتىداعى سوتقا جاڭادان قاراۋعا جىبەرگەن.