پرەزيدەنت ماڭعىستاۋداعى بالالاردىڭ استان ۋلانۋىنا قاتىستى پىكىر ءبىلدىردى

مەملەكەت باسشىسى فورۋمدا ورايلى ءساتتى پايدالانا وتىرىپ, كۇن تارتىبىندەگى وزەكتى ماسەلەلەرگە قاتىستى ويىن ورتاعا سالدى. جاڭا وقۋ جىلى باستالعان ساتتەن ەلىمىزدە ءبىلىم جۇيەسىنە بايلانىستى ماسەلەلەر ءجيى كوتەرىلەدى. ءبىلىم سالاسىندا ەلەۋسىز قالدىراتىن ماسەلە بولمايتىنىن اتاپ ءوتتى.

مەكتەپتەردە باستاۋىش سىنىپ وقۋشىلارى مەن از قامتىلعان وتباسىلاردان شىققان بالالار مەملەكەت ەسەبىنەن تەگىن ىستىق تاماقپەن قامتىلادى. وسى ورايدا پرەزيدەنت  مەكتەپ اسحانالارىنداعى تاماقتىڭ ساپاسىنا باسا ءمان بەرگەن ءجون ەكەنىن تىلگە تيەك ەتتى.

«جاقىندا ماڭعىستاۋ وبلىسىندا بالالار استان ۋلاندى. بۇل وقيعانىڭ قوعامدا قىزۋ تالقىلانۋى ورىندى. مۇنداي جاعدايلاردىڭ قايتالانۋىنا جول بەرمەۋ كەرەك. سانيتارلىق-ەپيدەميولوگيالىق نورمالاردىڭ ساقتالۋىن قاتاڭ باقىلاۋ قاجەت. بىراق ماسەلەنىڭ ءمانى تىم تەرەڭدە جاتىر. وقۋشىلاردى ساپاسى كۇماندى ءارى ارزان ازىق-ت ۇلىكپەن تاماقتاندىرا المايمىز. بالالاردى تاماقتاندىرۋدىڭ حالىقارالىق ستاندارتتارىنا ۇمتىلعانىمىز دۇرىس. اسحاناداعى تاعامدار ءوسىپ كەلە جاتقان اعزانى بارلىق قاجەتتى دارۋمەنمەن قامتاماسىز ەتۋى كەرەك. بۇل وسكەلەڭ ۇرپاقتىڭ دەنساۋلىعىنا تىكەلەي اسەر ەتەدى», دەدى قاسىم-جومارت توقاەۆ.

پرەزيدەنتتىڭ ايتۋىنشا, قۇزىرلى مەكەمەلەر مەكتەپ اسحانالارىنداعى ازىق-ت ۇلىكتىڭ ساپاسىن كوتەرۋ ماسەلەسىمەن مۇقيات اينالىسۋى قاجەت. مەكتەپتەردە دۇرىس تاماقتاندىرۋ مادەنيەتىن قالىپتاستىرۋ ءۇشىن اگروونەركاسىپ كەشەنى ءبىلىم بەرۋ ورىندارىنىڭ سەرىكتەسىنە اينالعانى ءجون.