استانادا فارابيتانۋشى عالىم اقجان ءال-ماشانيگە ارنالعان «رۋحاني مۇرا جانە قازىرگى عىلىم» تاقىرىبىندا حالىقارالىق عىلىمي-پراكتيكالىق كونفەرەنتسيا ءوتتى. ءىس-شارانى قالالىق ءبىلىم باسقارماسىنىڭ قولداۋىمەن ادىستەمەلىك ورتالىق, اقجان ءال-ماشاني اتىنداعى №92 مەكتەپ-ليتسەيى, قولجازبالار جانە سيرەك كىتاپتار ۇلتتىق ورتالىعى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى بىرلەسىپ ۇيىمداستىردى.
جيىن بارىسىندا قازاقتىڭ تۇڭعىش فارابيتانۋشىسى اقجان ءال-ماشانيگە ارنالعان مۇراجاي سالتاناتتى تۇردە اشىلدى. وعان پارلامەنت دەپۋتاتتارى, حالىق قاھارمانى توقتار اۋباكىروۆ, يران يسلام رەسپۋبليكاسىنىڭ ەلىمىزدەگى ەلشىلىگىنىڭ مادەني ىستەرى جونىندەگى كەڭەسشىسى ءالي اكبار تالەبي ماتين ارنايى شاقىرىلىپ, عۇلاما عالىمنىڭ ءومىر ارناسىنان سىر شەرتەتىن تاعىلىمعا تولى عۇمىرىن ناسيحاتتاپ, قۇندى ەستەلىكتەرىن ءبولىستى.
– اقجان ءال-ءماشانيدىڭ ەڭبەكتەرىن ءالى دە ناسيحاتتاۋىمىز قاجەت. الداعى جىلى عالىمنىڭ 120 جىلدىق مەرەيتويى اتالىپ وتەدى. ونى كەڭ اۋقىمدا ۇيىمداستىرىپ, جاس عالىمداردى تاربيەلەۋگە ىقپال ەتۋىمىز ءتيىس, – دەدى قولجازبالار جانە سيرەك كىتاپتار ۇلتتىق ورتالىعىنىڭ ديرەكتورى جاندوس بەكدىلدا ۇلى.
ەكى بولىمنەن تۇراتىن جيىنعا اقجان جاقسىبەك ۇلىنىڭ ۇرپاقتارى دا قاتىستى. كونفەرەنتسيا بارىسىندا «ماشانيتانۋ» وقۋلارىن جىل سايىن وتكىزۋدى راسىمگە اينالدىرۋ, عالىمنىڭ قالامىنان تۋعان 23 قولجازبانى جاڭا تەوريالىق-مەتودولوگيالىق تۇرعىدا زەرتتەپ, عىلىمي ەڭبەكتەر دايىنداۋ, اقجان ءال-ماشاني اتىنداعى №92 مەكتەپ-ليتسەيىنىڭ ۇزدىك وقۋشىلارىنا «تۇڭعىش فارابيتانۋشى-عالىم» اتىنداعى شاكىرتاقىنى تاعايىنداۋ, مەكتەپ باعدارلاماسىنا 5-11 سىنىپتارعا ارنالعان «ماشانيتانۋ» اتتى تاڭداۋ ءپانىن ەنگىزۋ سياقتى ۇسىنىستار ايتىلدى.