پرەمەر-ءمينيستردىڭ ورىنباسارى سەرىك جۇمانعارين «Alarko Holding» تۇرىك كومپانياسىنىڭ ۆيتسە-پرەزيدەنتى شاحين ابباسپەن كەزدەستى. كەزدەسۋگە قاتىسۋشىلار قۇنى 650 ملن دوللار بولاتىن قىزاناق ءوسىرۋ بويىنشا اۋقىمدى ينۆەستيتسيالىق جوبانى ىسكە اسىرۋ بارىسىن تالقىلادى.
شىمكەنتتە 2025 جىلدىڭ سوڭىنا دەيىن ەكى كەزەڭ بويىنشا جىلىجاي كەشەنىن جانە وسىرىلگەن ءونىمدى قايتا وڭدەيتىن تسەح سالۋ جوسپارلانىپ وتىر. ءبىرىنشى كەزەڭدە – 45 گەكتار, ەكىنشى كەزەڭدە – 130 گەكتار. تولىق قۋاتقا شىققاندا كەشەن جىلىنا 51 مىڭ توننا ءونىم وندىرۋگە مۇمكىندىك بەرەدى. وتكىزۋ نارىقتارى – ىشكى نارىق جانە رەسەي, قاتار, ءباا-گە ەكسپورتتاۋ.
كاسىپورىندا 2 مىڭعا جۋىق جۇمىس ورنى اشىلادى. كومپانيا شىمكەنتتە جىلىجايلارعا ارنالعان قۇرىلىمدار شىعاراتىن زاۋىت اشۋدى جوسپارلاپ وتىر, بۇل قۇرىلىس مەرزىمىن قىسقارتۋعا مۇمكىندىك بەرەدى. جوبا اياسىندا حالىقارالىق ستاندارتتار بويىنشا اۋىل شارۋاشىلىعى ماماندارىن دايارلاۋ ءۇشىن مامانداندىرىلعان اكادەميا قۇرىلادى.
تاراپتار ينۆەستيتسيالىق جوبانى ىسكە اسىرۋ ءۇشىن مەملەكەتتىك قولداۋ شارالارى كوزدەلگەن ينۆەستيتسيالار تۋرالى كەلىسىمنىڭ جوباسى مەن شارتتارىن تالقىلادى.
سەرىك جۇمانعارين ينۆەستورعا جان-جاقتى قولداۋ كورسەتىلەتىنىن ايتا كەلە, اۋىل شارۋاشىلىعىنىڭ باسقا دا باسىم سالالارىندا, اتاپ ايتقاندا, استىق, قانت قىزىلشاسى, تەرىنى تەرەڭ وڭدەۋدى قوسا العاندا, ءوندىرىستى جولعا قويۋ مۇمكىندىگىن قاراستىرۋدى ۇسىندى.