شۆەيتساريانىڭ تسيۋريح قالاسىندا كوز جانارىنان ايىرىلعان زاعيپ جاندار اراسىندا ۇستەل تەننيسىنەن جىل سايىنعى تۋرنير جالاۋىن جەلبىرەتتى. حالىقارالىق سايىسقا ەلىمىزدىڭ شوۋداۋن ۇستەل تەننيسشىلەرى العاش رەت قاتىسادى.
استاناداعى «ەرەكشە مۇمكىندىكتەر ورتالىعىندا» «شوۋداۋن» زاعيپ جاندار فەدەراتسياسى» رەسپۋبليكالىق قوعامدىق بىرلەستىگىنىڭ ۇيىمداستىرۋىمەن سپورتشىلاردى دوداعا اتتاندىرۋ سالتاناتى ءوتتى. كوز جانارىنان ايىرىلعان سپورتشىلاردىڭ حالىقارالىق ءتۋرنيرى 19 قاراشادا مارەسىنە جەتپەك. Sport Qory ەلىمىزدەن باراتىن قاتىسۋشىلارعا قارجىلاي قولداۋ كورسەتىپ وتىر.
ەل سەنىمىن ارقالاپ, حالىقارالىق تارتىسقا اتتانعان سپورتشىلاردى شىعارىپ سالۋ ءىس-شاراسىنا استانا قالالىق سپورت باسقارماسىنان, «استانا» الەۋمەتتىك كاسىپكەرلىك كورپوراتسياسىنان, دەنە مۇمكىندىگى شەكتەۋلى تۇلعالارعا ارنالعان سپورتتى دايارلاۋ ورتالىعىنان, «Amanat» پارتياسىنىڭ فيليالىنان وكىلدەر قاتىسىپ, ساتتىلىك تىلەدى.
«شوۋداۋن» زاعيپتار ۇستەل تەننيس فەدەراتسياسى» رەسپۋبليكالىق قوعامدىق بىرلەستىگى 2022 جىلى قۇرىلعان. ەكى جىلدىڭ ىشىندە فەدەراتسيا جۇمىسى جاندانىپ, بۇگىندە 200-دەن اسا كورۋ قابىلەتىنەن ايىرىلعان جاندار شوۋداۋن ۇستەل تەننيسىمەن تۇراقتى شۇعىلدانادى. زاعيپ جاندار اراسىندا سالاماتتى ءومىر سالتىن قالىپتاستىرىپ, مۇمكىندىگى شەكتەۋلى جانداردىڭ سپورتپەن شۇعىلدانۋىنا جول اشۋعا كۇش سالىپ كەلەمىز. شۆەيتساريادا وتەتىن حالىقارالىق تۋرنيرگە سپورتشىلارىمىز قاتىسىپ باعىن سىناسا, ءبىز ءتۋرنيردى ۇيىمداستىرۋ, دامىتۋ بارىسى جايىندا تاجىريبە الماسامىز. بۇل سپورت ءتۇرىن دامىتۋ ارقىلى ەلىمىزدەگى كورۋ قابىلەتىنەن ايىرىلعان جانداردىڭ ءبىر اۋىق سەرگۋىنە, قيمىل-قوزعالىسىن جاقسارتۋىنا سەرپىن بەرەمىز», دەيدى فەدەراتسيا پرەزيدەنتى سەرىك ءجۇزباي.
شۆەيتساريادا وتەتىن «Zurich Open» حالىقارالىق تۋرنيرىنە قاتىسۋشىلار بىلتىرعى ەل چەمپيوناتىندا ىرىكتەلگەن. قۇرامانىڭ باس باپكەرى ازامات بايماعامبەتوۆ ەلىمىزدە ەندى وركەن جايعان سپورت ءتۇرى الەمدە قارقىندى دامىعانىن العا تارتتى. سوندىقتان دا جۇلدە ولجالاۋ وڭاي بولمايتىنىن ەسكەرتتى. «ەل بىرىنشىلىگىندە شەبەرلىگىن كورسەتىپ, ۇزدىك شىققان گۇلسارا قاتتابەكوۆا, ايدار ساتاشەۆ, ۆلادا بارتۋسەەۆيچ, كەرىم بەكسىرعا ۇلىنا سەنىم ارتامىز. كوماندانىڭ كاپيتانى كەرىم باستاعان شاكىرتتەرىمىز بارىن سالىپ, ءۇمىتتى اقتايدى دەپ بىلەمىز», دەدى باپكەر.
كانادالىق دجو ليۋيس پەن پاتريك يورك ويلاپ تاپقان, ۇستەل تەننيسى مەن حوككەي ەلەمەنتتەرىن بىرىكتىرەتىن ۇستەل ويىنى 1960 جىلدان باستاپ قارقىندى دامىپ كەلەدى. بۇل ويىن ءتۇرىنىڭ ەرەكشەلىگى – كوزگە ارنايى تاڭعىش كيەدى. ياعني كوزى كورمەيتىن جاندار دا, كورۋ قابىلەتى ناشار زاعيپتارعا دا تەڭ مۇمكىندىك بەرىلەدى. ەستۋ قابىلەتى ارقىلى تارتىسقا تۇسەتىن جاندار ەركىن قيمىل-قوزعالىستى دا نىعايتادى. شوۋداۋن سپورتى ەلىمىزدە كەڭ قانات جايىپ, 16 وبلىستا فيليالى اشىلىپ, قاتىسۋشىلار قاتارى دا ارتا ءتۇستى. زاعيپ جاندار سپورتتا ءوزىنىڭ مىقتىلىعىن, شەكسىز مۇمكىندىككە يە ەكەنىن شوۋداۋن سپورت تۇرىمەن شۇعىلدانۋ ارقىلى دا ايگىلەيدى. كەلەشەكتە بۇل سپورت ءتۇرى جازعى پاراليمپيا ويىندارىنىڭ باعدارلاماسىنا ەنۋى مۇمكىن.