الماتىدا وتكەن «Almaty Puppet Festival» حالىقارالىق قۋىرشاق تەاترلارىنىڭ فەستيۆالى بارىسىندا الماتىلىق كىشكەنتاي بالدىرعاندار زاماناۋي قۋىرشاق تەاترلارىنىڭ ۇزدىك قويىلىمدارىن تاماشالادى. بۇل رەتتە وسىناۋ ونەر بايقاۋىنا ۇيىتقى بولىپ وتىرعان, تاريحى 1935 جىلدان باستاۋ الاتىن رەسپۋبليكاداعى تۇڭعىش مەملەكەتتىك قۋىرشاق تەاترىن ەرەكشە اتاپ وتۋگە بولادى.
وسىمەن ەكىنشى رەت ۇيىمداستىرعان ونەر دوداسىنا قىتاي, پولشا, بولگاريا, چەحيا, تۇركيا, گرۋزيا, ازەربايجان, رەسەي, باشقۇرتستان, وزبەكستان جانە ەلىمىزدەن 15 ۇزدىك تەاتر ۇجىمى مەن 150-دەن اسا قۋىرشاق شەبەرلەرى قاتىستى. ونەر مەرەكەسى اياسىندا قويىلىمدار كورسەتىلىمىنەن تىس فەستيۆال قاتىسۋشىلارىنىڭ اراسىندا اتالعان سالاداعى مامانداردىڭ كاسىبي دەڭگەيىن ارتتىرۋ ماقساتىندا ۇزدىك قۋىرشاق ماماندارىنىڭ جەتەكشىلىگىمەن شەبەرلىك ساعاتتار مەن دارىستەر ءوتتى. ناتيجەسىندە, فەستيۆال اتالعان ەلدەر بايلانىسىن نىعايتىپ, مادەني تۇرعىدان الماتى بەدەلىن قالىپتاستىرارى ءسوزسىز.
فەستيۆالدىڭ ەڭ نەگىزگى جۇلدەسى – «ۇزدىك سپەكتاكل» اتالىمى بويىنشا گران-پري سىيلىعى اقتوبە وبلىستىق «الاقاي» قۋىرشاق تەاترىنا تابىستالدى. اتالعان ونەر ورداسى بۇل جۇلدەگە رەجيسسەر انتون زايتسەۆ ساحنالاعان «جومارت اعاش» سپەكتاكلىمەن لايىقتى دەپ تانىلدى. اتالعان قويىلىم كورەرمەندەر مەن قازىلار القاسىنا ءوزىنىڭ تەرەڭ ماعىناسى جانە استارلى ويىمەن, ارتىستەرىنىڭ شەبەرلىگىمەن, رەجيسسەرلىك ۇتىمدى شەشىمدەرمەن وزگەشەلەندى.
«ۇزدىك رەجيسسەر» اتالىمى بويىنشا جۇلدەنى گۇرجىستاننان كەلگەن بورجومي مەملەكەتتىك كاسىبي قۋىرشاق تەاترى «گۋدۋلي اتا مەن كىشكەنتاي ۋچا» سپەكتاكلىمەن يەلەندى. دميتري حۆتيسياشۆيلي ەرەكشە رەجيسسەرلىك كوزقاراسىمەن, ال ارتىستەر قۋىرشاقتارعا جوعارى دەڭگەيدە جان بىتىرۋىمەن تاڭداندىردى.
«ۇزدىك اكتەرلىك انسامبل» جۇلدەسىنە رەسەيدىڭ «سكارابەي» كولەڭكەلى بالالار تەاترى «قىزعىلت گۇل» سپەكتاكلىمەن لايىق دەپ تانىلدى. رەجيسسەر سەرگەي چەرەپانوۆ ءبىرتۇتاس انسامبل قۇرىپ, ەرەكشە شەبەرلىگىمەن ءتانتى ەتتى. تۇركيانىڭ انكارا قالاسىنان كەلگەن «تەمپو» رەجيسسەر حاليۋك يۋدجەنىڭ ء«وزىمشىل الىپتىڭ باعىندا» قويىلىمى ءۇشىن «شەبەرلىگى مەن ادالدىعى ءۇشىن» اتالىمىن يەلەندى. «ۇزدىك قۋىرشاق جۇرگىزۋشى» جۇلدەسىنە گونكونگتەن كەلگەن (قحر) «Sky Bird» قۋىرشاق بىرلەستىگى يە بولدى. رەجيسسەر, اكتەر, قۋىرشاق جۇرگىزۋ شەبەرى چۋن فەي چەنگتىڭ جەتەكشىلىگىمەن ساحنالانعان «قىتاي ءداستۇرى» سپەكتاكلى كورەرمەندەردى ەرەكشەلىگىمەن تاڭداندىرىپ, شىعارماشىلىق شابىت سىيلادى. قىتاي مادەنيەتىنىڭ باي جانە الۋان ءتۇرلى قىرلارىن ۇتىمدى كورسەتتى. ال, «جاڭاشىل كوزقاراس» اتالىمىن «التى سەزىم» ەكسپەريمەنتالدى قويىلىمىن ۇسىنعان باشقۇرت مەملەكەتتىك قۋىرشاق تەاترى ەنشىلەدى. بۇل قويىلىم قۋىرشاق ونەرىندەگى جاڭاشىل ءارى كرەاتيۆتى شەشىمدەرىمەن قازىلار القاسىنىڭ نازارىن اۋداردى.
گ ۇلىم كوپبايقىزى,
الماتى مەملەكەتتىك قۋىرشاق تەاترى ءباسپاسوز قىزمەتىنىڭ جەتەكشىسى