مەملەكەت باسشىسى قاسىم-جومارت توقاەۆتىڭ فرانتسياعا مەملەكەتتىك ساپارى قارساڭىندا پاريجدە قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا فرانتسيانىڭ مادەنيەت ءمينيسترى راشيدا داتيمەن كەزدەستى. كەزدەسۋدە قازاقستان مەن فرانتسيا اراسىنداعى مادەني ىنتىماقتاستىقتى كەڭەيتۋ پەرسپەكتيۆالارى تالقىلاندى, دەپ جازادى Egemen.kz.
مينيسترلەر مادەني قارىم-قاتىناستارداعى ەلەۋلى ىلگەرىلەۋدى اتاپ ءوتىپ, ەكى ەل پرەزيدەنتتەرىنىڭ ءوزارا ساپارلارىنىڭ بىرلەسكەن باستامالارعا جاڭا سەرپىن بەرەتىنىن ايتتى.
كەزدەسۋ بارىسىندا تاراپتار مۋزەيلەر جانە مادەني مۇرا سالاسىنداعى ىنتىماقتاستىق نيەتى تۋرالى دەكلاراتسياسىن, سونداي-اق قازاقستان رەسپۋبليكاسىنىڭ ۇلتتىق مۋزەيى مەن گيمە مۋزەيى اراسىنداعى ءوزارا تۇسىنىستىك تۋرالى مەموراندۋم مەن بىرقاتار كەلىسىمدەرگە قول قويدى.
«قازاقتىڭ تاريحي جانە مادەني مۇراسىن جاھاندىق گۋمانيتارلىق كەڭىستىككە ناسيحاتتاۋ جانە ينتەگراتسيالاۋ — مەملەكەتتىڭ مادەني ساياساتىنداعى باسىمدىقتاردىڭ ءبىرى», دەدى ايدا بالاەۆا.
سونداي-اق, عىلىمي-زەرتتەۋ سالاسىنداعى ىنتىماقتاستىقتى كۇشەيتۋ جانە «Courants du Monde» باعدارلاماسى اياسىندا ەل ماماندارىنا ارنالعان تاعىلىمدامالار ۇيىمداستىرۋ ۇسىنىلدى.
«پرەزيدەنت توقاەۆتىڭ فرانتسياعا بۇل مەملەكەتتىك ساپارى مادەنيەتكە قاتىستى كوپتەگەن ماسەلەلەردى قامتيتىنىنا قۋانىشتىمىن. بۇگىن ءبىز بىرنەشە مەموراندۋمعا قول قويامىز. بۇل اراداعى تىعىز ىنتىماقتاستىقتى كورسەتەدى. سونىمەن قاتار, گيمە مۋزەيىندە قازاقستاننىڭ ۇلتتىق كورمەسىنىڭ ۇيىمداستىرىلۋى – ءبىزدىڭ قارىم-قاتىناستارىمىزدىڭ ناقتىلىعى مەن تيىمدىلىگىنىڭ دالەلى», دەدى فرانتسيانىڭ مادەنيەت ءمينيسترى راشيدا داتي.
ايدا بالاەۆا ارادا جاسالعان كەلىسىمدەر مادەني بايلانىستاردىڭ ودان ءارى تەرەڭدەي تۇسۋىنە ىقپال ەتىپ, قازاقستان مەن فرانتسيا اراسىنداعى قارىم-قاتىناستاردى نىعايتاتىن جاڭا بىرلەسكەن جوبالارعا نەگىز بولاتىنىنا سەنىم ءبىلدىردى.
ء«بىز كينووندىرىس سالاسى, قازىرگى زامانعى قازاق ادەبيەتىن فرانتسيادا جانە كەرىسىنشە فرانتسۋز ادەبيەتىن بىزدە تانىستىرۋ, كونتسەرتتىك ۇيىمداردىڭ ءوزارا ءىس-قيمىلى جانە بالالار كونتەنتىنە قاتىستى بىرلەسكەن مادەني ءىس-شارالار وتكىزۋ مۇمكىندىكتەرىن قاراستىرۋىمىزعا بولادى», دەدى ا. بالاەۆا.
سونداي-اق, مۋزەي ساراپتاماسى بويىنشا تاجىريبە الماسۋ, تاريحي مۇرانى ساقتاۋ جانە مۋزەي ىسىنە جاڭا تەحنولوگيالاردى ەنگىزۋ ماسەلەلەرى تالقىلاندى.
ەكى ەلدىڭ مينيسترلەرى كرەاتيۆتى يندۋستريا, ونىڭ ىشىندە, ءسان سالاسىنداعى ىنتىماقتاستىققا قىزىعۋشىلىق تانىتتى. ايدا بالاەۆا ەتنيكالىق سانگە جانە ونىڭ الەمدىك دەڭگەيدەگى كورسەتىلىمىنە نازار اۋدارۋدى ۇسىندى.