24–29 قازان كۇندەرى تۇركيانىڭ بەلەك قالاسىندا «Belek International Youth Cup 2024» حالىقارالىق ءتۋرنيرى ءوتتى. دوداعا تۇركيا, وزبەكستان جانە ەلىمىزدەن بارعان بىرنەشە كوماندا قاتىستى.
تۋرنيرگە استانانىڭ «Alash» كومانداسى 2013–2014 جانە 2015–2016 جىلى تۋعان بالالاردى الىپ باردى. جارىس ەرەجەسىنە سايكەس كوماندالار «ا» جانە «ۆ» توبى بولىپ ەكىگە ءبولىندى. ءار توپتاعى 6 كوماندا ءبىر-بىرىمەن جاسىل الاڭدا ءوزارا كەزدەسىپ, 4 مىقتىنى انىقتادى. ناتيجەسىندە, «Alash»-تىڭ ەكى بىردەي كومانداسى جارتىلاي فينالعا شىقتى.
فينالعا بەرىلەر جولداما ءۇشىن «Alash»-تىڭ 2015 جىلعى بالالارى استانانىڭ بجمورسم-8 كومانداسىنا پەنالتي سەرياسى ارقىلى (نەگىزگى ۋاقىت 1:1) ەسە جىبەردى. ال 3-ورىن ءۇشىن وتكەن ماتچتا «Rukh» كومانداسىنان 3:1 ەسەبىمەن باسىم ءتۇستى. 1-ورىندى بجمورسم-8 كومانداسى يەلەنسە, 2-ورىننان تۇركيانىڭ «Manavgat Akademi» جاسوسپىرىمدەرى كورىندى.
«Alash»-تىڭ 2013–2014 جىلعى بالالارى وزدەرىنەن ءبىر-ەكى جاس ۇلكەن بالالارمەن تەرەزەسى تەڭ ونەر كورسەتتى. فينالدا تۇركيانىڭ «Altin Shoshuk» كومانداسىن 2:0 ەسەبىمەن جەڭگەن الاشتىقتار انادولى ەلىندە توپ جاردى. ۇزدىك ۇشتىكتى وزبەكستاننىڭ «Oxbridge» فۋتبولشىلارى قورىتىندىلادى.