فۋتبولدان قازاقستان پرەمەر-ليگاسىنىڭ 25 تۋرىنداعى ەڭ قىزىقتى ويىن پەتروپاۆلوۆسكىدە ءوتتى. بۇل ماتچتا جەرگىلىكتى «قىزىلجار» قىزىلوردانىڭ «قايسارىن» 6:2 ەسەبىمەن ۇتتى. باسەكە بارىسىندا كوت-د’يۆۋاردان كەلگەن لەگيونەر سەنين سەباي حەت-تريك جاسادى. ال باسقا كەزدەسۋلەردىڭ ناتيجەلەرى مىناداي: «قايرات» – «ورداباسى» 2:1, «شاحتەر» – «اقتوبە» 1:3, «تۇران» – «جەڭىس» 1:1, «جەتىسۋ» – «اتىراۋ» 0:2, «توبىل» – «استانا» 1:0.
جارتىلاي ورتا سالماقتاعى شاۆقات راحمونوۆ (18-0) 7 جەلتوقساندا اقش-تىڭ لاس-ۆەگاس قالاسىندا UFC-ءدىڭ چەمپيوندىق اتاعى ءۇشىن امەريكالىق بەلال مۇحاممادپەن (24-3) كۇش سىناسۋعا ءتيىس ەدى. الايدا بۇل جەكپە-جەك وتپەيتىن بولدى. ونىڭ سەبەبى – چەمپيوننىڭ «سۇيەك ينفەكتسياسى» دەرتىنە دۋشار بولۋى.
فۋتزالدان چەمپيوندار ليگاسىنىڭ ەليتالىق كەزەڭىنىڭ جەرەبەسى تارتىلدى. «قايرات» ۆ توبىنا ءتۇستى. الماتىلىقتار «ولميسسۋم» (وميش, حورۆاتيا), «ەتۋال» (لاۆال, فرانتسيا), «دينامومەن» (زاگرەب, حورۆاتيا) شەبەرلىك بايقاسادى. بۇل باسەكەلەر 26 قاراشا مەن 1 جەلتوقسان ارالىعىندا زاگرەبتە وتەدى. D توبىنداعى «سەمەي» «پالما» (يسپانيا, پالما-دە-مايوركا), «رەكورد» (بەلسكو-بيالا, پولشا), «لۋچەنەتسپەن» (سلوۆاكيا) سايىسقا تۇسەدى.
سلوۆاكيانىڭ سەنەتس قالاسىندا ۇستەل تەننيسىنەن WTT Youth Contender ءتۋرنيرى اياقتالدى. 11 جاسقا دەيىنگى ويىنشىلار اراسىنداعى باسەكەدە جانيا بەكمۇحامبەتوۆا باس جۇلدەنى جەڭىپ الدى. وسى جارىس بارىسىندا ول الەكساندرا بەتس (ۋكراينا), يۋليا ۆچەلكوۆا (سلوۆاكيا), سەلەستينا كاپاتي (سينگاپۋر), سوفيا ترۋسكوۆا (سلوۆاكيا), ەميلي ۆۋ (شۆەيتساريا), ايالگۋ ەردەنەحۋياگ (موڭعوليا) سىندى سپورتشىلاردى ۇتتى.
فرانتسيانىڭ انجە قالاسىندا مانەرلەپ سىرعاناۋدان گران-پري ءتۋرنيرى اياقتالدى. بۇل جارىستا جەرلەسىمىز ميحايل شايدوروۆ ءتورتىنشى ورىندى قاناعات تۇتتى. ول 231,86 ۇپاي جيدى. باس جۇلدەنى امەريكالىق ەندريۋ تورگاشەۆ (233,64) ولجالاسا, كۇمىس پەن قولا مەدالدى جاپونيالىق كوشيرو شيمادا (233,84) مەن فرانتسيالىق ادام سياو حيم فا (246,58) يەلەندى.