امەريكادان التىن مەدال اكەلدى

اقش-تىڭ نيۋ-يورك قالا­سىندا وتكەن «كوشپەلىلەر جۇلدىزى» اتتى حالىقارالىق كورمەدە وتانداسىمىز, جاس سۋرەتشى توميريس قاراباەۆا تۋىندىلارىن, كورەرمەن نازارىنا ۇسىنىپ, ىقىلاسىنا بولەندى. ءبىرشاما ۋاقىت بۇ­رىن الپاۋىت ەلگە شاقىرتۋ العان تالانتتى قىز ۇلتتىق ناقىشتاعى سۋرەتتەرى ارقىلى ەل مادەنيەتىنىڭ مە­رەيىن اسىرىپ وتىر.

جاس سۋرەتشىنىڭ ۇستازى, اتىراۋ قالاسىنىڭ ءماسليحات دەپۋتاتى, مادەنيەت قاي­راتكەرى كاميلا جاپالوۆا ءسۇيىنشى حاباردى قۋانا جەت­كىزدى.

– امەريكانىڭ نيۋ-يورك قالاسىنداعى مانحەتتەن تو­رىندە ءوتىپ جاتقان «كوش­پەلىلەر جۇلدىزى» اتتى حا­لىقارالىق كورمەنىڭ اشىلۋ سالتاناتى كوڭىل تولقىتتى. مۇحيت اسىپ, ارمان قۋعان بىزدەر ۇزاق جولدى باعىندىرىپ, قازاقتىڭ سۋرەت ونەرىن اقش تورىنە شىعارىپ وتىرمىز. وعان سەبەپ, جاقىندا مەنىڭ تالانتتى وقۋشىم, بولاشاعىنان كوپ ءۇمىت كۇتتىرەتىن 12 جاسار سۋرەتشى توميريس قاراباەۆا نيۋ-يورك قالاسىندا وتەتىن كورمەگە قاتىسۋعا شاقىرتۋ العان بولاتىن. كۋراتورى, ۇستازى رەتىندە كورمەگە مەن دە قاتىسىپ, شاكىرتىم ەكەۋمىز امەريكادا الاشتىڭ اسىل مۇراسى, ۇلتتىق تاقىرىپتا سالىنعان سۋرەتتەرىمىزبەن كو­رەرمەندى تاڭعالدىردىق. حا­لىقارالىق كورمەگە امە­­ري­كانىڭ وزىنەن, رەسەيدەن, تمد ەل­دەرىنەن ونەرپازدار قاتىستى. سول سۋرەتشىلەر اراسىندا تو­ميريس التىن مەدال ۇتىپ, ايدى اسپانعا شىعاردى. قان­داي كەرەمەت! «ۇستازدان شاكىرت وزار» دەگەن وسى. الەمگە قازاق ونەرىن پاش ەتىپ, ەلگە دەگەن قۇرمەتىمىز جۇرەكتى جارىپ بارادى, – دەدى ول.

سۋرەتشى كاميلا جاپالو­ۆانىڭ «BatiKKami» ارت-گا­لە­رەياسى جاس سۋرەتشىلەردى دايار­لاپ, ءتۇرلى كونكۋرستار وتكىزىپ كەلەدى. ولاردىڭ ىشىندە وزگە دە تالانتتار شوعىرى جە­تەر­لىك.

ايتا كەتەيىك, بولاشاعىنان ۇلكەن ءۇمىت كۇتتىرەتىن تو­ميريس قاراباەۆا بىرنەشە رەس­پۋبليكالىق سايىستاردىڭ جۇلدەگەرى. جاس ونەرپازدىڭ ۇلتتىق كورمەسى مايا­مي قا­لاسىنا شاقىرتۋ الىپ وتىر.