فۋتبولدان وتكەن ماۋسىمنىڭ ۇزدىكتەرى انىقتالدى. فرانتسيانىڭ استاناسى – پاريجدەگى ايگىلى «شاتلە» تەاترىندا ۇيىمداستىرىلعان سالتاناتتى جيىندا باعى جانعان جۇلدىزداردىڭ ەسىمدەرى اتالىپ, ولارعا ارنايى سىيلىق تابىس ەتىلدى.
جىلدىڭ ەڭ ۇزدىك فۋتبولشىسى اتاعىنان ۇمىتكەرلەر ەكەۋ ەدى. ولار – يسپانيالىق رودري مەن برازيليالىق ۆينيسيۋس جۋنيور. العاشقىسى – «مانچەستەر ءسيتيدىڭ» شابۋىلشىسى, ەكىنشىسى ءمادريدتىڭ «رەالىنىڭ» جارتىلاي قورعاۋشىسى. ەكەۋى دە جاسىل الاڭدا جاسىنداي جارقىلداپ جۇرگەن جۇلدىزدار. بۇل جولى «التىن دوپتى» انگليانىڭ پرەمەر-ليگاسىندا ونەر كورسەتىپ جۇرگەن 28 جاستاعى رودري ولجالادى. ءسويتىپ, پيرەنەي تۇبەگىنىڭ تۇلەگى تورتكۇل دۇنيەدەگى تەڭدەسسىز تەڭبىل دوپ شەبەرى دەپ تانىلدى. ال ايەلدەر اراسىندا ەڭ ۇزدىك ويىنشىعا تيەسىلى ارنايى جۇلدە يسپانيانىڭ ۇلتتىق قۇراماسى مەن «بارسەلونانىڭ» بەتكەۇستارى ايتانا بونماتيگە تابىس ەتىلدى.
اتالعان شارا بارىسىندا «كوپا تروفەيىن» (ەڭ ۇزدىك جاس ويىنشى) لامين يامال («بارسەلونا», يسپانيا قۇراماسى), «ميۋللەر تروفەيىن» (ەڭ ناتيجەلى ويىنشى) حارري كەين («باۆاريا», انگليا قۇراماسى) مەن كيليان مباپپە («رەال مادريد», فرانتسيا قۇراماسى), «ياشين تروفەيىن» (ەڭ ۇزدىك قاقپاشى) ەميليانو مارتينەس («استون ۆيللا», ارگەنتينا قۇراماسى) يەلەندى. كارلو انچەلوتتي («رەال», مادريد) مەن ەمما حەيز («چەلسي», اقش-تىڭ ايەلدەر قۇراماسى) ەڭ بىلىكتى باپكەر رەتىندە تانىلسا, «رەال مادريد» (ەرلەر) پەن «بارسەلونا» (ايەلدەر) كلۋبتارى جىلدىڭ ەڭ ۇزدىك كومانداسى اتاندى.