شارباقتى اۋدانىندا جاڭا تۇرعىن ۇيلەر پايدالانۋعا بەرىلدى. زامانعا ساي سالىنعان باسپانالار مۇقتاج جاندارعا بۇيىردى. عيماراتتاردى جەكە تۇلعا ءوز قارجىسىنا سالىپ, كەيىن ولار وبلىستىق بيۋدجەت قاراجاتى ەسەبىنەن ساتىپ الىنعان. ءۇش بولمەلى پاتەرلەر زاماناۋي تەحنولوگيالار قولدانىلا وتىرىپ تۇرعىزىلىپ, وزىق ينجەنەرلىك كوممۋنيكاتسيالارمەن جابدىقتالعان.
ءوڭىر باسشىسى اسايىن بايحانوۆ قونىس يەلەرىن كوپتەن كۇتكەن باسپانالارىمەن قۇتتىقتادى.
– ازاماتتارىمىزدى قولجەتىمدى باسپانامەن قامتاماسىز ەتۋ – مەملەكەتتىڭ باستى ماقساتتارىنىڭ ءبىرى. بيىلعى جىلى بيزنەس پەن مەملەكەتتىڭ ءوزارا ءىس-ارەكەتى اياسىندا ءبىز كەزەكتە تۇرعان جاندارعا 800 پاتەر, سونىڭ ىشىندە وبلىستىڭ 10 اۋدانىندا 313 پاتەر ساتىپ الامىز. پاتەرلەردى ساتىپ الۋ تاجىريبەسىن كەلەسى جىلدارى دا جالعاستىرامىز, – دەدى وبلىس اكىمى.
سونداي-اق شارباقتىدا جالپى اۋماعى 1 680 شارشى مەتردى, مۇز ارەناسى 1 440 شارشى مەتردى قۇرايتىن جاڭا جابىق حوككەي كورتى اشىلدى. سپورت نىسانى اۋىل تۇرعىندارىنىڭ وتىنىشىمەن, اۋدان تۇرعىنى, كاسىپكەر, وبلىستىق ءماسليحاتتىڭ دەپۋتاتى ۆيتالي سولومكيننىڭ قولداۋىمەن بوي كوتەردى. اۋىل تۇرعىندارى ءوڭىردىڭ ءال-اۋقاتىن جاقسارتۋعا باعىتتالعان ماڭىزدى جوبالاردىڭ ىسكە اسىرىلىپ جاتقانىنا ءدان ريزا ەكەندەرىن جەتكىزدى. مۇنداي باستامالارعا الەۋمەتتىك جاۋاپكەرشىلىگى جوعارى, بەلسەندى ازاماتتىق ۇستانىمى بار بيزنەستەگى ازاماتتاردىڭ مۇرىندىق بولعانى قۋانتادى.
پاۆلودار وبلىسى,
شارباقتى اۋدانى