3 قازان كۇنى شىعىس قازاقستان وبلىستىق اۋرۋحاناسىندا قايتىس بولعان دونوردىڭ اعزا مۇشەلەرى ءتورت پاتسيەنتكە ءساتتى ترانسپلانتاتسيالاندى, دەپ جازادى Egemen.kz.
دەنساۋلىق ساقتاۋ مينيسترلىگىنىڭ مالىمەتىنشە, 39 جاستاعى دونوردىڭ ميى جۇمىسىن توقتاتقاننان كەيىن تۋىستارى كەلىسىپ, اعزالارى ءتورت ادامعا بەرىلگەن. دونوردىڭ جۇرەك, وكپە جانە ەكى بۇيرەگى مۇقتاج ناۋقاستارعا بەرىلگەن. ماسەلەن, 1977 جىلى تۋعان ەر ادامعا جۇرەك, 1962 جىلى تۋعان ايەلگە وكپە, 2015 جىلى تۋعان بالاعا بۇيرەك, ال 1966 جىلى تۋعان ايەلگە ەكىنشى بۇيرەك ترانسپلانتاتسيالانعان.
وسىلايشا دونور ءتورت ازاماتتىڭ ءومىرىن ساقتاپ قالۋعا سەپ بولدى.
«پاتسيەنتتەر دەنساۋلىق ساقتاۋ مينيسترلىگىنىڭ ترانسپلانتاتتاۋدى ۇيلەستىرۋ جونىندەگى رەسپۋبليكالىق ورتالىعىنىڭ رەسپۋبليكالىق, وڭىرلىك جانە ستاتسيونارلىق ترانسپلانتاتتاۋ ۇيلەستىرۋشىلەرىنىڭ جانە «University Medical Center» كق, «ۇلتتىق عىلىمي ونكولوگيا ورتالىعى» جشس ترانسپلانتاتتاۋ ورتالىقتارى ماماندارىنىڭ ۇيلەسىمدى كومانداسىنىڭ ارقاسىندا «ەكىنشى ومىرگە» مۇمكىندىك الدى», دەلىنگەن مينيسترلىك حابارلاماسىندا.