پارلامەنت سەناتىندا پالاتا سپيكەرى ماۋلەن اشىمباەۆتىڭ قاتىسۋىمەن رەسپۋبليكا كۇنىنە ارنالعان سالتاناتتى جينالىس ءوتتى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
ماۋلەن اشىمباەۆ ارىپتەستەرىن ۇلتتىق مەرەكەمەن قۇتتىقتاپ, ەگەمەندىك تۋرالى دەكلاراتسيا تاۋەلسىزدىككە جول اشقانىن جانە قازاقستاندى حالىقارالىق قۇقىقتىڭ دەربەس سۋبەكتىسى رەتىندە بەكىتكەنىن اتاپ ءوتتى.
سونداي-اق ول بۇل كۇنگە ۇلتتىق مارتەبە بەرۋ تاريحي ادىلەتتىلىكتىڭ جارقىن كورىنىسى ەكەنىن تىلگە تيەك ەتتى.
«پرەزيدەنتىمىز قاسىم-جومارت كەمەل ۇلى توقاەۆ ۇلتتىق قۇرىلتايدىڭ ءبىرىنشى وتىرىسىندا رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىندى. مۇنداي قادام بولاشاق ۇرپاق ءۇشىن تاريحي ماڭىزعا يە. بۇل عاسىرلارعا جالعاسقان مەملەكەتتىلىگىمىزدىڭ قايتا جاڭعىرۋىنىڭ نىشانى. وسى ەگەمەندىك جولىندا حالقىمىز تالاي «تار جول, تايعاق كەشۋدەن» وتكەنى بەلگىلى», دەدى ماۋلەن اشىمباەۆ.
سونىمەن قاتار ءىس-شارا بارىسىندا سەنات توراعاسى مەملەكەت باسشىسىنىڭ باستاماسىمەن قولعا الىنعان الەۋمەتتىك-ەكونوميكالىق جانە ساياسي رەفورمالاردىڭ ىسكە اسىرىلۋىن زاڭنامالىق تۇرعىدان قامتاماسىز ەتۋ اياسىندا پالاتا دەپۋتاتتارىنىڭ الدىندا تۇرعان مىندەتتەرگە توقتالدى. سەناتورلاردىڭ الداعى جۇمىسى وسى مىندەتتەرگە سايكەس جۇرگىزىلەدى.
«قازىرگى تاڭدا پرەزيدەنتىمىزدىڭ باستاماسىمەن ەلىمىزدە اۋقىمدى ءارى كەشەندى رەفورمالار ىسكە اسىرىلىپ جاتىر. سوڭعى جىلداردا ادىلەتتى قازاقستان قۇرۋ, ازاماتتاردىڭ ءال-اۋقاتىن ارتتىرۋ, ەكونوميكالىق ءوسىم جانە وڭىرلەردى دامىتۋ باعىتتارىندا ماڭىزدى قادامدار جاسادىق. مەملەكەت باسشىسىنىڭ ساياسي باعدارىن زاڭنامالىق تۇرعىدان قامتاماسىز ەتۋ – سەنات قىزمەتىنىڭ نەگىزگى باسىمدىعى. الداعى ۋاقىتتا دا بىرلەسىپ, مەملەكەتتىك مۇددە جولىندا ناتيجەلى ەڭبەك ەتەمىز دەپ سەنەمىن», دەپ ماۋلەن اشىمباەۆ ءىس-شاراعا قاتىسقانداردى رەسپۋبليكا كۇنىمەن قۇتتىقتادى.
سالتاناتتى جيىندا پالاتا سپيكەرى سەناتورلار مەن اپپارات قىزمەتكەرلەرىنە مەملەكەتتىك ناگرادالاردى تاپسىردى. مەملەكەت باسشىسىنىڭ جارلىعىمەن سەناتور دارحان قىدىرالى ءىىى دارەجەلى «بارىس» وردەنىمەن, دەپۋتاتتار سەرگەي كارپليۋك پەن سەرىك شايداروۆ «پاراسات» وردەنىمەن ناگرادتالدى. سونداي-اق سەناتور ايگۇل قاپباروۆا جانە سەنات اپپاراتى باسشىسىنىڭ ورىنباسارى ولجاس دانابەكوۆ «قۇرمەت» وردەنىمەن ماراپاتتالدى. پالاتا دەپۋتاتتارى بيبىگۇل اققوجينا مەن قايرات تاستەكەەۆكە جانە بىرنەشە اپپارات قىزمەتكەرىنە «ەرەن ەڭبەگى ءۇشىن» مەدالى تابىس ەتىلدى. بۇدان باسقا بىرقاتار دەپۋتاتقا حالىقارالىق پارلامەنتارالىق ۇيىمداردىڭ ناگرادالارى تاپسىرىلدى.