رەسپۋبليكا كۇنىن مەرەكەلەۋ قارساڭىندا ەلوردا جاستارى «مەنىڭ ەلىم – مەنىڭ تۋىم!» چەللەندجىن قولدادى. ەرەكشە اكتسيا ۇيىمداستىرىپ, ۇيلەردىڭ بالكوندارىنا 1000-عا جۋىق تۋ ءىلىندى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
پاتريوتتىق اكتسيا جىل سايىن وتكىزىلەدى. بۇل تەك بەزەندىرىلگەن ۇيلەردىڭ تۇرعىندارىنىڭ عانا ەمەس, سونىمەن قاتار ەلوردا كوشەلەرىندە جۇرگەن جولاۋشىلاردىڭ دا نازارىن اۋداردى.
«جۇمىسقا بارا جاتقانىمدا رەسپۋبليكا داڭعىلىنداعى ۇيلەر مەملەكەتتىك تۋمەن بەزەندىرىلگەنىن كوردىم. ادەتتە جۇمىستان باسقا ەشنارسە ويلامايمىز, ال مىنا كورىنىس جۇرەگىمە جىلىلىق سىيلادى. مەنىڭشە, جۇرتتىڭ ويىن كۇندەلىكتى كۇيبەڭ تىرلىكتەن ءبولىپ, ءبارىمىز بىرلىگى جاراسقان ەگەمەن ەلدىڭ كوك تۋىنىڭ استىندا ءومىر سۇرەتىنىمىزدى ەسكە سالۋ ەرەكشە سەزىمگە بولەيدى», دەدى قالا تۇرعىنى.
ايتا كەتەيىك, قالانىڭ ورتالىق كوشەلەرىندە (تاۋەلسىزدىك, ب.مومىش ۇلى, قابانباي باتىر, تۇران, رەسپۋبليكا, قوشقارباەۆ داڭعىلدارىندا, ناجىمەدەنوۆ, سارايشىق, سىعاناق, دوستىق جانە ت.ب. كوشەلەر), جول بويىندا قر تۋلارى جەلبىرەپ تۇر.