كوسمەتيكا نارىعىنىڭ مۇمكىندىگى

ۇلتتىق ستاتيستيكا بيۋرو­سى دە­رەگىن­شە, 2023 جىلى ەلگە 6,1 تون­نا كوسمەتي­كا ءونىمى جەتكىزىل­گەن. نارىقتىڭ بۇل سەگ­مەنتىندە قىتاي, يسپانيا, فرانتسيا­دان كەل­گەن ونىمدەردىڭ ءباسى باسىم. گۇل­شاش­تىڭ ايتۋىنشا, نارىق­تىڭ وسى سەگمەنتىندەگى ءونىم­نىڭ ساپا­سى جوعارى, ساقتاۋ مەر­زىمى شەك­تەۋلى, قۇرامى باقى­لاۋعا الىن­عان. قۇرا­مى تۇتىنۋ­شى­­لار­دىڭ جاس ەرەكشەلىگى مەن تال­­عا­­مىنا قاراي جەتىلدىرىلىپ وتىرادى.

العاشقى جىلدارى شىم­كەنت­تەگى كاسىپورىنداردىڭ ءبىرى­نىڭ كىشكەنتاي بۇرىشىن جال­عا الىپ, بيزنەسىن باستاعان. شيكى­زات يمپورتتايدى. كەيىن دايىن ونىمدەردى قۇتىعا قۇياتىن قو­سىم­شا جۇيە اشتى. 2020-2021 جىلدارى ءسال سايابىرسىپ قالعان بيزنەسكە 2022 جىلدان باستاپ قايتا قان جۇگىردى. ەندى الماتىداعى يندۋستريالىق ايماقتان كەڭسە الىپ, ءوندىرىستىڭ ەكىنشى جەلىسىن ىسكە قوسۋدى جوسپارلاپ ءجۇر. مۇندا «AG cosmetics» كرەم­دەرىنىڭ قۇتىسى دايىندالادى.

كەيىپكەرىمىزدىڭ سوزىنشە, نا­رىقتىڭ تالعامى برەند ونىم­دەرگە باسىمدىق بەرىپ تۇر. ايگىلى كومپانيالار جىل سا­يىن ميل­لياردتاعان دوللاردى تەك جار­ناماعا جۇمسايدى. 1909 جىلى جارتىعاسىرلىق تاريحى بار «L’Oréal» سۇلۋلىق سالاسىندا زەرت­تەۋلەر جۇر­گىزىپ, جاڭا­لىقتار اش­تى. 1909 جىلى ەجەن شۋەللەر نەگى­زىن قال­عان شاعىن كومپانيا 125 جىل الەمدەگى ەڭ ءىرى كوسمەتيكا ونىم­دەرىن شىعاراتىن توپقا اينالدى.

«كوسمەتيكا نارىعىندا وتاندىق ءونىم وندىرۋشى­لەر­دىڭ ۇلەسى از. سەبەبى ءبىر ءونىمدى اينا­لىمعا شىعارۋ ءۇشىن كوسمە­تيكا مەديتسيناسىنان باس­تاپ تەح­نولوگتەرىنە دەيىن تۇتاس كو­ماندا جۇمىس ىستەيدى. ولار­دىڭ ءبىرى ءونىمنىڭ تەرىگە اسەرىن زەرتتەسە, ەكىنشىسى نارىق كوزىن ىزدەيدى. عاسىرلىق تاريحى بار كوس­مەتيكالىق ونىمدەردىڭ باستاپ­قى قۇرامى 100 پايىز وزگەرسە دە ءاۋ باستاعى اتاۋىن ساقتاپ قالادى. سەبەبى الەم تاۋاردىڭ ساپاسىنا ەمەس, برەند اتاۋىنا نازار اۋدارادى», دەيدى گۇلشاش.

ايتۋىنشا, جاسوسپىرىمدەر عانا ەمەس, ورتا, اعا بۋىن اراسىندا ونكولوگيالىق تەرى دەرتىنىڭ اسقىنىپ كەتۋىنە مەدي­تسينالىق ساراپتامادان وتپەگەن دۇنيەلەر اسەر ەتىپ جاتىر.

«بىزگە كوسمەتيكالىق ساۋات­تىلىق دەڭگەيىن كوتەرە­تىن كەز كەلدى. ءار اتا-انا بالالارىنا ساپالى ونىمدەر قولدانۋدى جاس كۇنىنەن قالىپتاستىرۋ كەرەك. قۇنى ارزان كرەمدەردىڭ قۇرامىنا ەشكىم كەپىلدىك بەرە المايدى», دەيدى.

«كوسمەتيكا يندۋستريا­سىن دامىتۋ – ادامگەرشىلىك قۇندىلىقتاردىڭ قالاي وز­گەر­گەنىنىڭ كورىنىسى. قىتاي عالام­دارى گارمونداردىڭ ورنىن الماستىرۋعا باعىت­تالعان سانعاسىرلىق تەراپياسىن مەديتسينا عىلىمى ەندى قولدانا باس­تادى. قازىر­گى زامانعى عىلىمي ءتاسىلدى قالىپتاستىرعاننان كەيىن دە, عالىمدار كونە مىسىر مەن باسقا دا ەجەلگى وركەنيەت­تەردەن كەلگەن كوسمەتيكا جاساۋ رەتسەپتىلەرىنە ءجيى جۇگىنە­دى. ايتا كەتۋ كەرەك, قازىرگى برەند ونىمدەردىڭ تۇپنۇسقاسى ورتا عاسىرلارداعى تاجى­ريبەلەردەن ءنار الىپ جاتىر. ءبىزدىڭ انالارىمىز دەنەسىن بيە سۇتىمەن ارلەندىرگەن. قازىر بەت كۇتىمىنە ارنالعان كرەمدەردىڭ قۇرامىندا بيە ءسۇتى ەلەمەنتتەرى بار», دەيدى كەيىپكەرىمىز.

ەل ىشىندە بوتوكس, پلاستي­كالىق وتانىڭ قۇربانىنا اينالعان زامانداستارىمىز جايلى دا از ايتىلىپ جۇرگەن جوق.

ء«سان الەمى يندۋسترياسى وكىلى رەتىندە تابيعي سۇلۋ­لىقتى قالايمىن. ادام­نىڭ جاراتىلىسى تابيعات ءتارىزدى كوكتەم, جاز, كۇز, قىستان تۇرادى. ءار جاستىڭ ءوز سۇلۋلىعى بار. ءتىپتى بەسىكتەگى سابيگە دە كۇتىم كەرەك. بەت كۇتىمى – اعزاداعى وزگەرىستەردىڭ بارومەترى. ءار ءاجىم – ادام اعزاسىنىڭ بارومەترى. دەنى ساۋدىڭ جانى ساۋ دەپ بەكەر ايتپاعان. قازىر كوسمەتيكالىق مەديتسينا بوتوكس پەن پلاستي­كالىق وپەراتسياعا ەمەس, ادەمى قار­تايۋعا مۇمكىندىك بەرەتىن دارۋ­مەندەردىڭ كوزىن ىزدەپ جاتىر», دەيدى.

ونىڭ ەندىگى ارمانى – زامانداستارىمىزعا قاجەت­تى وپا-دالاپتاردى بارىن­شا وڭتايلاندىرۋ. ادامدار كۇندىزگى ۋاقىتتا بارىنشا جەڭىل, سۇيىق كرەم, ال تۇنگى ۋاقىتتا مايلى, اۋىر جاعىلاتىن كرەمگە با­سىم­دىق بەرەدى. گۇلشاشتىڭ ايتۋىنشا, كرەمنىڭ قۇرامى ونىڭ جەڭىل-اۋىرلىعىنا ەمەس, شيكىزاتىنا بايلانىستى. ەگەر شيكىزات قۇرامىنا كۇندىز نەمەسە تۇنگى ەمەس, جىلدىڭ ءتورت مەزگىلىندە دە بىردەي اسەر ەتەتىن قوسپا قوسىلسا, بۇل ماسەلە شەشىلەدى.

«كوسمەتيكا نارىعى­نىڭ نا­نى – شيكىزات. قازىر جا­پو­نيا نەمەسە وڭتۇستىك كورەيا­نىڭ كوسمەتيكالىق مەديتسيناسى وسى ماسەلەنى زەرتتەپ, وندىرىسكە قوس­تى. اينالىمعا شىقسا, ين­دۋست­رياعا سەرپىلىس اكەلەتىنى ءسوزسىز. بىراق ازىرگە ولار شيكىزات قۇرامىن اشۋ­عا دايىن ەمەس. جاپونيا­دا تاعىلىمدامادان ءوتىپ, جاڭالىعىن ەلگە الىپ كەلگىم كەلەدى. سۇلۋلىق الەمىن پلاس­تي­كالىق وتا نەمەسە بوتوكسكە دەگەن تاۋەلدىلىكتەن قۇتقا­رىپ, ادەمى قارتايۋعا مۇم­كىندىك بەرەتىن كرەمدەرمەن تولىقتىرعىم كەلەدى», دەيدى گۇلشاش.

«AG cosmetics» ونىمدەرى سىرتتان كەلگەن ارزان تاۋارلارمەن باعا جاعىنان باسەكەگە تۇسە المايدى. بىراق سۇرانىس بار.

«قارا بازارلاردا ساتىلماسا دا ەلىمىزدەگى, قىر­عىز­ستانداعى ءسان سالون­دارى­­نان تاپسىرىس الامىن. سۇلۋلىعىنىڭ قۇنىن بىلە­تىندەر تاپسىرىسپەن الدىرادى. نارىقتاعى ورنىمدى ساقتاپ قالۋ ءۇشىن كەي كەزدە با­عا جاعىنان شەگىنىس جاساۋعا تۋرا كەلەدى. تاۋەلسىزدىك تاريحىن­دا «AG cosmetics» ونىمدەرى ارقىلى ءوز اتىممەن قالعىم كەلەدى, اۋلەتىمىزدىڭ بيزنەس تاريحىندا بۇل باعىت ءۇزىلىپ قالماسا ەكەن دەيمىن», دەيدى گۇلشاش اۋباكىر.

الماتى