اقپاراتتىق كەڭىستىكتىڭ كەڭگە قانات جايۋى كوپ جۇمىستى جەڭىلدەتكەنىمەن, ادامزات الدىنا اقپاراتتىق قاۋىپ, كومپيۋتەرلىك قىلمىس, قوعامدىق سانانى شاتاستىرۋ, كيبەرشابۋىل, جالعان مالىمەت بەرۋ سياقتى جاڭا كەدەرگىلەردى اكەلدى. بۇل قاۋىپتەردىڭ الدىن الۋ ءۇشىن بۇقارالىق اقپارات قۇرالدارى مەن اكادەميالىق ورتانىڭ بايلانىسى بەرىك بولۋى شارت. الماتىدا «داعدارىس پەن تۇراقسىزدىق جاعدايىندا ۇيىمدار مەن باق اراسىنداعى ءتيىمدى كوممۋنيكاتسيالار» دەپ اتالعان تانىمدىق سەمينار ءوتىپ, تاقىرىپقا قاتىستى ماڭىزدى ماسەلەلەر سارالاندى.
مادەنيەت جانە اقپارات مينيسترلىگى, Narxoz ۋنيۆەرسيتەتى, قازاقستانداعى بۇۇ جاھاندىق كوممۋنيكاتسيالار دەپارتامەنتىنىڭ وكىلدىگى بىرلەسە ۇيىمداستىرعان سەميناردا داعدارىسقا قارسى كوممۋنيكاتسيالىق ستراتەگيالار ازىرلەۋ, جالعان اقپاراتپەن كۇرەس, سالالىق جۋرناليستيكانى دامىتۋ, ءباسپاسوز حاتشىلارىنىڭ كاسىبي بىلىكتىلىگىن جەتىلدىرۋ ماسەلەلەرى كەڭىنەن تالقىلاندى. ەركىن پىكىر الماسۋ فورماتىندا وربىگەن ءىس-شاراعا جۋرناليستەر مەن پيار ماماندارى, ءباسپاسوز قىزمەتىنىڭ وكىلدەرى قاتىستى.
سەمينار جۇمىسىن اشقان مادەنيەت جانە اقپارات مينيسترلىگىنىڭ باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ كەيىنگى جىلدارى قوعاممەن جانە مەديانارىقتىڭ كاسىبي قاتىسۋشىلارىمەن ديالوگ ورناتۋدا اۋقىمدى جۇمىس اتقارىلىپ جاتقانىنا توقتالدى.
«مەملەكەتتىك ورگاندار مەن بۇقارالىق اقپارات قۇرالدارىنىڭ ءوزارا ءىس-قيمىل ماسەلەلەرىندە ءباسپاسوز حاتشىلارى مەن ءباسپاسوز قىزمەتىنىڭ وكىلدەرى ماڭىزدى ءرول اتقارادى. جۋرناليستەرمەن سىندارلى قارىم-قاتىناس ورناتۋ, مەملەكەتتىك مەكەمەلەر قىزمەتىنىڭ اشىقتىعىن قامتاماسىز ەتۋ, ءتيىمدى داعدارىستىق كوممۋنيكاتسيالار – وسىنىڭ بارلىعى قوعامدىق سەنىمدى نىعايتۋعا جانە مەملەكەتتىك جۇيەنىڭ تۇراقتى جۇمىس ىستەۋىنە ىقپال ەتەدى. 2017 جىلدان باستاپ زاڭنامالىق دەڭگەيدە مەملەكەتتىك ورگاننىڭ ءبىرىنشى باسشىسىنا تىكەلەي باعىناتىن باق-پەن ءوزارا ءىس-قيمىل جاساۋ جونىندەگى ۋاكىلەتتى تۇلعا مارتەبەسى ايقىندالدى. بۇل جۋرناليستەرگە اقپارات بەرۋدىڭ ساپاسى مەن جەدەلدىگىنە اسەر ەتتى. قارقىندى دامىپ كەلە جاتقان مەديا ورتا, اقپاراتتىق كەڭىستىكتەگى جاڭا سىن-قاتەرلەر جاعدايىندا مەملەكەتتىك مەكەمەلەر مەن باق كوممۋنيكاتسيالارىن جەتىلدىرۋگە ءتيىسپىز», دەدى ق.احەتوۆ.
سەمينار قاتىسۋشىلارىنا ءتيىمدى تاجىريبە الماسۋ الاڭىن ۇسىنعان Narxoz ۋنيۆەرسيتەتىنىڭ عالىمدارى داعدارىس جاعدايلارىندا اقپاراتتىق اشىقتىقتى قولداۋ ءاربىر دامىعان ەل ءۇشىن ماڭىزدى مىندەت دەپ ەسەپتەيدى. ۋنيۆەرسيتەت پرەزيدەنتى قانات قوجاحمەتوۆ اقپاراتتىق اعىن قارقىندى دامىپ جاتقان قازىرگى الەمدە تۇراقسىزدىق پەن بەلگىسىزدىك ءبىزدىڭ كۇندەلىكتى ءومىرىمىزدىڭ اجىراماس بولىگىنە اينالعانىن, وسىنداي كەزدە داعدارىستار تەك سىناق قانا ەمەس, سونىمەن قاتار دامۋ, سەنىمدى نىعايتۋ جانە اشىقتىقتى ارتتىرۋ مۇمكىندىگىنە اينالاتىنىن اتاپ ءوتتى.
سەميناردا ءسوز العان بۇۇ جاھاندىق كوممۋنيكاتسيا دەپارتامەنتىنىڭ وكىلى ۆلاستيميل سامەك تەحنولوگيا ءتىلىن جەتىك مەڭگەرۋ ءجۋرناليستىڭ باستى قارۋى ەكەنىن, الايدا ءتۇرلى اقىلدى قۇرالدار ادامنىڭ شىنايى سەزىمى مەن ويىن, شىعارماشىلىق قابىلەتىن الماستىرا المايتىنىن, اقپاراتتىڭ دايەكتىلىگىنە باسا ءمان بەرۋ ءتىلشىنىڭ كاسىبي قارىمىنىڭ باستى جەمىسى ەكەنىن اتادى.
«بۇل عاسىر – كوممۋنيكاتسيانىڭ شىرقاۋ بيىككە شىققان كەزەڭى. اقپارات مەملەكەت ومىرىندە ۇلكەن ءرول اتقارادى. بۇل ۇلكەن قۇرال, ءتىپتى قارۋ دەپ تە ايتۋعا بولادى. اقپاراتتىڭ شىنايىلىعىنا ءمان بەرۋ – جاۋاپتى ءىس. ءبىز تاراتقان اقپارات كەيىپكەردىڭ الداعى بولاشاعىنا اسەر ەتەتىنىن ۇمىتپاۋىمىز كەرەك. قىتايدا جارىق كورگەن «سوعىس ونەرى» كىتابى الەمگە جاڭاشا كوزقاراس اكەلدى. سول سەكىلدى «اقپارات ونەرى» دەپ اتالاتىن كىتاپ جازۋدىڭ ۋاقىتى كەلگەن سەكىلدى. اقيقات پەن جالعان ميداي ارالاسقان داۋىردە ەتيكالىق بارومەتر, دەزينفورماتسيامەن كۇرەس اسا ماڭىزدى», دەيدى ۆ.سامەك.
سەمينار بارىسىندا بيزنەس-جۋرناليستيكا, ىسكەرلىك كوممۋنيكاتسيالار مەن مەديا سالاسىنىڭ ساراپشىلارى انتيكريزيستىك باسقارۋ بويىنشا ءوز تاجىريبەلەرىمەن ءبولىستى. Narxoz ۋنيۆەرسيتەتىنىڭ پروفەسسورى گۇلميرا سۇلتانباەۆا «جوعارى ءبىلىم سالاسىنداعى داعدارىس كوممۋنيكاتسياسى: ءباسپاسوز قىزمەتى جانە باق» تاقىرىبىندا ءدارىس وقىدى.
«كريزيستىك داعدارىس كەزىندە اكادەميالىق ەركىندىگىمىزدى قالاي قورعايمىز؟ وكىنىشكە قاراي, ءبىز بۇل ساتى بويىنشا الەمدە 110-ورىندا تۇرمىز. ستۋدەنت پەن وقىتۋشى اراسىنداعى ءبىلىم ۇدەرىسىندە, زەرتتەۋ بارىسىندا ەشقانداي كەدەرگى, بيۋروكراتيا بولماۋى كەرەك. ۋنيۆەرسيتەتتەردە كورسەتىلەتىن ساياسي قىسىم, وقۋ جوسپارى مەن زەرتتەۋلەرگە جاسالاتىن توسقاۋىل, قارجىلىق قيىندىق – ءبارى-ءبارى اكادەميالىق ەركىندىكتى شەكتەيدى. بىزدە بۇل ماسەلەگە جاڭاشا كوزقاراس قاجەت. اكادەميالىق ورتا مەن ستۋدەنتتەر ساياسي ناۋقاندارعا تاۋەلدى بولماۋعا ءتيىس. ولاردىڭ ماقساتى – ءبىلىم الۋ, عىلىممەن, شىعارماشىلىقپەن اينالىسۋ. اقپارات كەڭىستىگىندە دە ادالدىق پەن كاسىبيلىك باستى ءرول اتقارادى. جۋرناليستيكا فاكۋلتەتتەرىندەگى وقىتۋ بارىسىندا مەملەكەتتىك باق قۇرالدارىنىڭ كونتەنتىن قالاي تالداساق, وپپوزيتسيالىق باسىلىمداردىڭ دا جاريالانىمدارىن تەڭ دارەجەدە تالداۋىمىز كەرەك. تاۋەلسىز باق ماتەريالدارىن زەرتتەۋ بولاشاق ماماننىڭ سىني ويلاۋ داعدىسىن قالىپتاستىرادى. سوندا عانا سىنعا توتەپ بەرەتىن جان-جاقتى ساۋاتتى مامان قالىپتاستىرامىز», دەيدى گ.سۇلتانباەۆا.
سەميناردا قازاقستان PR كاسىبي كلۋبىنىڭ مۇشەسى, «TikTok Kazakhstan», «Ozon Kazakhstan» جوبالارىنىڭ جەتەكشىسى لاۋرا بارىسوۆا, ۇلتتىق كوممۋنيكاتسيالار بويىنشا وبسە كەڭەسشىسى ايبار ولجاي, «Nomad Comms» اگەنتتىگىنىڭ جەتەكشىسى زارينا بۋەنباەۆا ءوز تاجىريبەلەرىمەن ءبولىستى.
ءىس-شارا سالالىق جۋرناليستيكانى دامىتۋدىڭ 2024 جىلعا ارنالعان جول كارتاسى اياسىندا ۇيىمداستىرىلعان.
الماتى