بىلتىردان بەرى ەلىمىزدە قانداستاردى شوعىرلاندىرىپ, مەملەكەتتىڭ ەكونوميكالىق احۋالىنىڭ نىعايۋىنا سەرپىن بەرۋ باعىتىندا «اتا جولى» كارتاسى ەنگىزىلدى. ىلكىمدى جوبا اياسىندا ەلۋدەن استام قانداسىمىز اتاجۇرتقا تابان تىرەپ, ەل ومىرىنە, قىزۋ ەڭبەككە بەلسەنە ارالاسىپ كەتتى. رەسەي, قىتاي سەكىلدى كورشىلەس ەلدەردەن عانا ەمەس, اقش, ەۋروپا ەلدەرىندەگى قانداستارىمىز دا كارتا الۋعا ىقىلاس تانىتىپ وتىر.
سىرتتاعى باۋىرلارىمىز كارتانى العان جاعدايدا قازاقستان ازاماتتارىمەن ءھام ەلگە كوشىن بۇرعان وزگە قانداستارىمىزبەن بىردەي قۇقىققا يە بولادى. مەديتسينالىق مەكەمەلەردە الەۋمەتتىك قىزمەت تۇرلەرىن الۋعا, ەڭبەك كودەكسى, «حالىقتىڭ كوشى-قون تۋرالى» زاڭ اياسىندا ەل ىشىندە جۇمىسقا ورنالاسۋىنا, كاسىپكەرلىك كودەكس پەن وزگە دە قۇقىقتىق اكتىلەرگە ساي كاسىبىن جۇرگىزۋگە ءورىس اشىلادى. مەملەكەتتىك ءبىلىم ۇيىمدارىندا تەگىن, ورتا ءبىلىم, مەملەكەتتىك ورتا, ارناۋلى نەمەسە جوعارى وقۋ ورىندارىندا كونكۋرستىق نەگىزدە تەگىن, جەكەمەنشىك وقۋ ورىندارىندا اقىلى ءبىلىم الۋعا, «ادۆوكاتتىق قىزمەت جانە زاڭ كومەگى تۋرالى» زاڭعا سايكەس مەملەكەت كەپىلدىك بەرگەن زاڭ كومەگىنە دە جۇگىنۋگە قۇقىلى. سونىمەن قاتار حالىقارالىق شارتتار مەن ەلىمىزدىڭ زاڭنامالىق قۇقىقتىق اكتىلەرگە سايكەس جەڭىلدەتىلگەن تارتىپپەن ەل ازاماتتىعىن الۋعا قۇقىق بەرىلەدى. تاعى ءبىر باسىمدىق – كارتا قولىنا تيگەن ەتنوستىق قازاقتار قاي وڭىرگە قونىستاناتىنىن, قاي جەردە كاسىبىن اشىپ, جۇمىس ىستەيتىنىن ءوزى تاڭدايدى. تەك «اتا جولىن» العاندار مەملەكەتتىك ورگاندار مەن جەرگىلىكتى ءوزىن-ءوزى باسقارۋ ورگاندارىنا سايلاۋعا ءارى سايلانۋعا قۇقىلى ەمەس, رەسپۋبليكالىق رەفەرەندۋمعا قاتىسا المايدى, مەملەكەتتىك قىزمەت اتقارۋعا رۇقسات ەتىلمەيدى. ال ەل ازاماتتىعىن السا, كارتانىڭ كۇشى جويىلادى.
مەملەكەت باسشىسى قاسىم-جومارت توقاەۆ 2022 جىلى 1 قىركۇيەكتە «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا شەتەلدەن بىلىكتى مامانداردى تارتۋدىڭ ماڭىزدىلىعىنا دا توقتالدى.
«شەتەلدەن تالانتتى مامانداردى ەلىمىزگە تارتۋ, اسىرەسە شىعارماشىلىق پەن كاسىپكەرلىك سالاسىندا جەتىستىككە جەتكەن مامانداردى شاقىرۋ ماڭىزدى. سۇرانىسقا يە جوعارى بىلىكتى كادر تاپشىلىعىن ازايتۋ قاجەت. عىلىم, دەنساۋلىق ساقتاۋ, ونەركاسىپ, IT سالالارىنىڭ باعالى ماماندارىنا مەملەكەت جەڭىلدىكتەر ەنگىزىلەدى ءارى تۇرۋعا رۇقسات الۋ قۇقىمەن ۆيزا بەرىلەدى», دەپ اتاپ ءوتتى.
پرەزيدەنتتىڭ تاپسىرماسىن جۇزەگە اسىرۋ باعىتىندا ۇكىمەت بىلتىردان باستاپ شەتەلدەگى قازاقتارعا «اتا جولى» كارتاسىن بەرۋ جونىندەگى وتاندىق پلاتفورمانى ىسكە قوستى. كارتا الۋ ءراسىمى قازاقستان رەسپۋبليكاسىنىڭ 44 شەتەلدىك مەكەمەسى, «قانداس» اۆتوماتتاندىرىلعان اقپاراتتىق جۇيەسى (ااج) ءموبيلدى قوسىمشاسىندا جۇزەگە اسىرىلادى. «سۇرانىسقا يە ماماندىقتار» شارتىنا ساي كارتا العانداردىڭ اراسىندا ينجەنەر-فيزيك, ينجەنەر-ماتەماتيك, گاز-مۇناي قۇبىرلارىن جوبالاۋ جانە پايدالانۋ, كومپيۋتەرلىك باعدارلامالىق قامتاماسىز ەتۋ مەن ەسەپتەۋ تەحنيكاسى, حيميالىق تەحنولوگيالار, سۋاستى ينجينيرينگى, قولدانبالى ماتەماتيكا, ۇشاق قۇرىلىسى, كورپوراتيۆتىك قۇقىقتانۋ, سونداي-اق جاق-بەت حيرۋرگياسى دارىگەرلەرى مەن پەدياترلار بار. ال بيزنەس-يمميگرانت رەتىندە العان 21 ادامنىڭ ىشىندە مەليوراتسيا, رەكۋلتيۆاتسيا جانە جەردى قورعاۋ, فيزيكا, ينفورماتيكا, اۋىل شارۋاشىلىعىن مەحانيكالاندىرۋ ماماندارى, دارىگەرلەر, شەتەلدە بيزنەسىن جۇيەلى دوڭگەلەتىپ وتىرعان كاسىپكەرلەر دە بار.
ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى توراعاسىنىڭ ورىنباسارى ەربولات ابۋلحاتين «اتا جولى» كارتاسى سالا تۇجىرىمداماسىنىڭ نەگىزگى ءورىسى ەكەنىن ايتتى. «ينۆەستيتسيالارعا باسەكەلەستىكتى ارتتىرۋ ماقساتىندا ەلدەگى بيزنەس يمميگراتسياسىن ودان ءارى دامىتۋ جۇمىسى جۇيەلى جۇرگىزىلىپ جاتىر. اتاپ ايتقاندا, شەتەلدەگى قازاقتاردى «اتا جولى» كارتاسىنا تارتۋعا قاتىستى شارالار قولعا الىندى. كارتانى الۋعا ۇمىتكەرلەردىڭ دە گەوگرافياسى كەڭەيىپ كەلەدى. بۇگىندە رەسەي فەدەراتسياسى, قىتاي, گەرمانيا سىندى ەلدەرمەن قاتار, «اتا جولى» كارتاسىن الۋعا اقش, ەۋروپالىق وداق ەلدەرىنىڭ ازاماتتارى, ياعني شەتەلدەگى قازاقتار قىزىعۋشىلىق تانىتىپ وتىر. كارتا ءوز ەلدەرىندە سۇرانىسقا يە كاسىپتەرى بار, نە بولماسا تابىستى بيزنەس كەيستەردى ىسكە اسىرىپ جۇرگەن, ونى قازاقستاندا دا وركەندەتۋگە نيەت تانىتقان قازاقتارعا بەرىلەدى. بۇگىنگە دەيىن «اتا جولى» كارتاسىن 57 شەتەلدىك قازاق الدى. ونىڭ ىشىندە 31 ادام – سۇرانىسى جوعارى ماماندىق يەسى, ال قالعان 26 قانداسىمىز – كاسىپكەر. كارتانى العانداردىڭ كوپشىلىگى استانا, الماتى قالالارىنا قونىستانىپ, شارۋاسىن دوڭگەلەتىپ وتىر», دەدى ە.ابۋلحاتين.
ادامي الەۋەتتى دامىتۋ, تاريحي وتانىمەن بايلانىستى نىعايتىپ, ەلگە بىلىكتى كادرلاردى تارتۋ ماقساتىندا 2023–2027 جىلدارعا ارنالعان كوشى-قون ساياساتىنىڭ تۇجىرىمداماسىنا سايكەس ازىرلەنگەن جوبا ينۆەستيتسيا تارتۋ ىسىنە دە سەرپىن بەرۋگە ءتيىس.
ىلكىمدى جوبانىڭ يگىلىگىن كورىپ, ەلىمىزگە كەلىپ ەڭبەك ەتىپ جۇرگەن قانداستاردىڭ ءبىرى – سەركان شابان. تۇركيادان اتاجۇرتقا ات باسىن بۇرعان كاسىپكەر ينۆەستيتسيالىق جوبالاردى جۇزەگە اسىرىپ, ەكى ەلدىڭ اراسىنا التىن كوپىر ورناتۋعا كۇش سالماق.
«اتا جولى» كارتاسىنىڭ ارتىقشىلىعى – ۇزاق جىلعا بەرىلەدى ءارى ۆيزا ماسەلەسى تۋىندامايدى. ءوزىنىڭ كىندىك قانى تامعان مەملەكەتتىڭ ازاماتتىعى دا ساقتالادى ءارى وسى ەلدىڭ ازاماتتارىمەن بىردەي قۇقىق يەلەنىپ, 10 جىل بويى كاسىبىن جۇرگىزۋگە مۇمكىندىك الادى. باسقا ەلگە بارىپ ۇزاق جۇمىس ىستەۋدە ۆيزا ماسەلەسى وتە كۇردەلى. وسى ورايدا بىزگە اتاجۇرتىمىز وراسان مۇمكىندىك بەرىپ وتىر», دەيدى «Aيد الماتى ياتىرىم ۆە دانىشمانلىك» جشس جەتەكشىسى س.شابان.
مەديتسينا, ەنەرگيا, قۇرىلىس ماتەريالدارىن ءوندىرۋ سالاسىنا ينۆەستيتسيا تارتۋدى كاسىپ ەتكەن سەركان بىلتىردان بەرى كارتانىڭ يگىلىگىن كورىپ كەلەدى. ارنايى فيرما اشىپ, تۇركيانىڭ بەلدى بيزنەس وكىلدەرىنىڭ ەلىمىزگە ينۆەستيتسيا قۇيۋ ىسىنە ۇلەسىن قوسپاق. ول «اتا جولى» كارتاسىن الۋعا تۇركيادا تۇراتىن قازاقتار عانا ەمەس, ەۋروپانىڭ وزگە ەلدەرىندەگى قانداستاردىڭ اراسىندا دا قىزىعۋشىلىق باسىم ەكەنىن ايتتى. كەلەشەكتە كارتانى الۋشىلاردىڭ قاتارى ارتىپ, ەلگە ىرىس قۇيۋعا ۇمتىلعان جاندارعا ءورىس كەڭي تۇسسە دەگەن تىلەگىن جەتكىزدى.