سوڭعى 5 جىلدا العاش رەت ۆەگەتاتسيا كەزىندە ارالعا سۋ جىبەرۋ جوسپارى 100%-عا جۋىق ورىندالعانى تۋرالى تيىستى مينيسترلىكتىڭ ءباسپاسوز قىزمەتى مالىمدەدى, دەپ حابارلايدى Egemen.kz.
مينيسترلىك بيىل ۆەگەتاتسيا كەزىندە ارال تەڭىزىنە 977 ملن تەكشە مەتر سۋ جىبەردى. بۇل جوسپارلانعان كولەمنىڭ 98%-ى. ايتا كەتۋ كەرەك, سوڭعى بىرنەشە جىلدا سۋارۋ ماۋسىمىندا تەڭىزگە 350-400 ملن تەكشە مەتردىڭ اينالاسىندا عانا سۋ جىبەرىلىپ كەلگەن بولاتىن.
ال, جىل باسىنان بەرى ارالعا 2 ملرد تەكشە مەتردەن استام سۋ ءتۇستى. ۆەدومستۆو جىل سوڭىنا دەيىن تاعى 500 ملن تەكشە مەتر سۋ جىبەرۋدى جوسپارلاپ وتىر.
«مەملەكەتارالىق سۋ شارۋاشىلىعى ۇيلەستىرۋ كوميسسياسىنىڭ 86-شى وتىرىسىندا سالا ءمينيسترى نۇرجان نۇرجىگىتوۆ سۋارۋ ماۋسىمى كەزىندە ارالعا 997 ملن تەكشە مەتر سۋ جىبەرۋ جونىندە كەلىسىمگە كەلگەن بولاتىن. ناتيجەسىندە, سولتۇستىك ارال تەڭىزىنىڭ سۋ كولەمى 22 ملرد تەكشە مەترگە جەتتى. تەڭىزگە وسىعان دەيىن ۆەگەتاتسيا كەزىندە سەكۋندىنا 7-10 تەكشە مەتر سۋ جىبەرىلگەن بولسا, بيىل سەكۋندىنا 60-70 تەكشە مەتر سۋ جىبەرىلدى. كورسەتكىش 10 ەسە ارتىق», دەدى ارال-سىرداريا باسسەيندىك ينسپەكتسياسى باسشىسىنىڭ ورىنباسارى زەينۋللا قازتوعانوۆ.
ارالدان بولەك, بيىل العاش رەت سۋارۋ كەزەڭىندە تەڭىز ماڭىنداعى اقشاتاۋ-سورعاق جانە قامىستىباس كولدەر جۇيەسىنە 45 ملن تەكشە مەتردەن استام سۋ جىبەرىلگەن. بۇل بالىق شارۋاشىلىعى مەن ءتۋريزىمدى دامىتۋعا ءتيىمدى اسەر ەتىپ وتىر.
ماسەلەن, سوڭعى جىلدارى ارال تەڭىزىنىڭ مينەراليزاتسياسىنىڭ ازايۋى – بالىقتىڭ كوبەيۋىنە جاعىمدى اسەر ەتتى. تەڭىز تارتىلعاننان بەرى جەرگىلىكتى بالىقشىلار جىلىنا 400 توننا عانا بالىق اۋلاسا, قازىر 7,5-8 مىڭ تونناعا دەيىن بالىق اۋلايدى ەكەن.
«سۋ كەلگەلى بالىق تا جاندانىپ, دارياعا كىرىپ جاتىر. بيىل بىلتىرعىعا قاراعاندا بالىق كوبىرەك. ارالدى وسى دەڭگەيدە ۇستاپ تۇرسا دا بالىق شارۋاشىلىعى داميدى», دەيدى قاراتەرەڭ اۋىلىنىڭ تۇرعىنى, بالىقشى كۇنتۋعان تۇرعانباەۆ.
ايتا كەتسەك, سۋ رەسۋرستارى جانە يرريگاتسيا مينيسترلىگى دۇنيەجۇزىلىك بانكپەن بىرلەسىپ سولتۇستىك ارال تەڭىزىن ساقتاۋ جونىندەگى جوبانىڭ ەكىنشى كەزەڭىنە دايىندالىپ, قۇجاتتاما ازىرلەنىپ جاتىر. ەكىنشى كەزەڭ سولتۇستىك ارالدى تۇراقتى سۋمەن قامتاماسىز ەتۋدەن باستاپ ەكونوميكالىق جانە الەۋمەتتىك جوبالاردى دامىتۋعا دەيىنگى ءتۇرلى باعىتتاردى قامتيدى.