الەمدىك جانە ءداستۇرلى دىندەر كوشباسشىلارىنىڭ سەزى الەمدىك ارەنادا مويىندالعان بەيبىتشىلىك الاڭىنا اينالدى. ءبىز وسى حالىقارالىق فورۋمدى وتكىزۋگە ىقىلاس تانىتىپ, ونى جۇزەگە اسىرىپ جاتقان قازاقستاننىڭ يگى باستاماسىن قولدايمىز ءارى جوعارى باعالايمىز.
ءدىن كوشباسشىلارىنىڭ ءۇنى – قاي زاماندا دا اردىڭ ءۇنى بولعان. قازىرگى تاڭدا دا بۇل قاعيدا وزگەرگەن جوق. سوندىقتان ءبىز ءاردايىم ادامزات بالاسىن بەيبىتشىلىككە شاقىرۋدا, رۋحاني قۇندىلىقتاردى ساقتاۋدا مايداننىڭ العى شەبىندە ءجۇرۋىمىز كەرەك. بۇگىنگى جيىنىمىز دا – سونىڭ ءبىر قادامى. ويتكەنى تىنىشتىقتى ساقتاۋعا, ىنتىماقتىڭ ورناۋىنا ۇلەس قوسۋ – قۇداي جولىنداعى ىزگى ءىس. قازاقستان 20 جىل بۇرىن وسىنداي قۇداي جولىن تاڭدادى, ونى ءساتتى جۇزەگە اسىرىپ كەلەدى. ءبىز ارقايسىسىمىز سىزدەردىڭ باستامالارىڭىزعا ءوز تاراپىمىزدان ۇلەس قوسۋعا دايىنبىز. كەيىنگى كەزدەرى الەمدە بولىپ جاتقان جاعدايعا قاراساق, اتالعان پروبلەمالاردى شەشۋدە ءدىننىڭ ورنىن ەشتەڭە ايىرباستاي المايدى. ازىرگە ساياسات تا, ديپلوماتيا دا قاۋقارسىز بولىپ تۇر. سوندىقتان ءوز كۇش-جىگەرىمىزدى قوسىپ, بەيبىت زاماننىڭ ورناۋى ءۇشىن ارەكەت ەتۋىمىز كەرەك.
بۇگىنگى وسى پروبلەمالاردىڭ نەگىزگى سەبەپتەرىنىڭ ءبىرى دە – ادامزات بالاسىنىڭ ءدىني قۇندىلىقتاردان الىستاپ كەتۋىندە. كوپ ادام ءدىندى وتكەن شاق دەپ ويلايدى. ال دىننەن الىستاعان مادەنيەت پەن ءوزارا سىيلاستىقتان دا الىستايدى. ءبىز قازىر سونىڭ جەمىسىن تاتىپ وتىرمىز. وسى كەلەڭسىزدىكتىڭ الدىن الۋ ءۇشىن الەمدىك جانە ءداستۇرلى دىندەر كوشباسشىلارىنىڭ سەزى سەكىلدى ىرگەلى جيىنداردىڭ ءمانى زور.
يليا كاشيتسىن,
ماسكەۋ پاتريارحاتى سىرتقى شىركەۋ بايلانىستارى ءبولىمىنىڭ حاتشىسى (رەسەي)