ەلىمىزدە قازاق-نەمىس عىلىم جانە تەحنولوگيالار ينستيتۋتى اشىلدى. جوعارى وقۋ ورنىنىڭ سالتاناتتى اشىلۋىنا عىلىم جانە جوعارى ءبىلىم ءمينيسترى ساياسات نۇربەك قاتىستى. بۇل تۋرالى عىلىم جانە ءبىلىم مينيسترلىگى حابارلادى.
مينيسترلىك تاراتقان اقپاراتقا سۇيەنسەك, اتالعان ينستيتۋت د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ جانىنان قۇرىلعان. مەتاللۋرگيا, پايدالى قازبالار ءوندىرۋ سالاسىنداعى قازاق-نەمىس عىلىم جانە تەحنولوگيالار ينستيتۋتىنىڭ بازاسىندا زاماناۋي جوعارى تەحنولوگيالىق زەرتحانالار, سونىمەن قاتار عىلىمي ورتالىقتار بار. مۇنداعى جۇمىس كەڭ اۋقىمدى وزەكتى زەرتتەۋلەرگە, جوبالارعا باعىتتالادى. بولاشاقتا وسى ينستيتۋت عىلىم جانە تەحنولوگيالار سالاسىنداعى حالىقارالىق ىنتىماقتاستىقتىڭ ورتالىق الاڭىنا اينالىپ, ەلدەر اراسىنداعى تاجىريبە, ءبىلىم الماسۋعا ىقپال ەتەدى.
مينيستر س.نۇربەك ينستيتۋتتىڭ اشىلۋىندا: «مۇنداي عىلىمي ورتالىقتى قۇرۋ يدەياسى 14 جىل بۇرىن ۇسىنىلعان بولاتىن, سول كەزدە رەسمي دەلەگاتسيا قۇرامىندا بولعان ەدىم. ەندى, مىنە, ءبارى لوگيكالىق قورىتىندىعا كەلىپ وتىر. قازاق-نەمىس ينستيتۋتىن ءدال وسى جەردە, شىعىس قازاقستان وبلىسىندا قۇرۋ – وتە ماڭىزدى جوبا. بۇعان وبلىس اكىمدىگى دە بىزگە بەلسەندى قولداۋ كورسەتىپ وتىر. ادامي كاپيتالعا, تەحنولوگيالار ترانسفەرىنە ينۆەستيتسيا ءوڭىر ەكونوميكاسىنىڭ دامۋىنىڭ نەگىزى بولاتىنىن تۇسىنەمىز. قازىرگى كەزدە الەمدە سيرەك كەزدەسەتىن مەتالداردىڭ ماڭىزى كۇرت ارتتى, ءتۇرلى ەلدەردەن ۇلكەن سۇرانىس بايقالىپ وتىر. مىسالى, بىزگە بۇل باعىتتا وڭتۇستىك كورەيا مەن جاپونيا دا جۇگىنگەن بولاتىن. سوندىقتان قازاق-نەمىس عىلىم جانە تەحنولوگيا ينستيتۋتى مەتاللۋرگيا جانە پايدالى قازبالاردى ءوندىرۋ سالاسىندا جۇمىس ىستەيدى», دەدى.
د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ بازاسىندا وسى ينستيتۋتتى قۇرۋ تۋرالى عىلىم جانە جوعارى ءبىلىم مينيسترلىگى مەن گەرمانيا فەدەراتيۆتىك رەسپۋبليكاسىنىڭ سىرتقى ىستەر مينيسترلىگى اراسىندا مەموراندۋمعا قول قويىلعان بولاتىن.