قازاقستان حالىقارالىق رەيستەر گەوگرافياسىن ايتارلىقتاي كەڭەيتۋدە, دەپ حابارلايدى Egemen.kz كولىك مينيسترلىگىنىڭ ءباسپاسوز قىزمەتىنە سىلتەمە جاساپ.
بۇگىنگى تاڭدا قازاقستاننىڭ الەمنىڭ 32 ەلىمەن تىكەلەي اۋە قاتىناسى, 132 حالىقارالىق اۋە باعىتى بار. قازاقستاندىق جانە شەتەلدىك اۋە كومپانيالارى اپتاسىنا 778 حالىقارالىق رەيس ورىندايدى.
قر كولىك مينيسترلىگى شەت مەملەكەتتەردىڭ اۆياتسيالىق بيلىك ورگاندارىمەن ىنتىماقتاستىقتى كەڭەيتۋ بويىنشا ۇنەمى كەلىسسوزدەر جۇرگىزۋدە. بۇل قولجەتىمدى باعىتتاردىڭ سانىن ودان ءارى ارتتىرۋعا مۇمكىندىك بەرەدى.
بيىلعى جىلى الماتىدان مۋمباي, بەيجىڭ, كۋالا-لۋمپۋر, يركۋتسك, ەل-الايمەن, سونداي-اق اقتوبە – شارم-ەل-شەيح قالالارىنا جاڭا اۋە باعىتتارى اشىلدى. وڭتۇستىك-شىعىس ازياداعى ەڭ ءىرى لوۋكوستەردىڭ ءبىرى - مالايزيالىق «Air Asia X» اۋە كومپانياسى استانادان دۋشانبە, پراگا, سەۋل, اقتاۋ - مينەرالنىە ۆودى قالالارىنا تۇراقتى رەيستەردى قالپىنا كەلتىردى, ال قىتايلىق «China Southern Airlines» اۋە كومپانياسى الماتى-ءۇرىمشى باعىتى بويىنشا رەيستەر سانىن كوبەيتتى.