ورتالىق رەفەرەندۋم كوميسسياسى اەس سالۋ ماسەلەسىنە قاتىستى رەسپۋبليكالىق رەفەرەندۋمدا داۋىس بەرۋدىڭ الدىن الا ناتيجەلەرىن جاريالادى.
سوعان سايكەس رەفەرەندۋمعا قاتىسقان ازاماتتاردىڭ 71,12 پايىزى اتالعان ماسەلەنى قولداپ داۋىس بەرگەنى بەلگىلى بولدى. وسىلايشا, وتانداستارىمىز ءوز تاڭداۋىن جاساپ, ەل بولاشاعىنا قاتىستى ستراتەگيالىق شەشىمدى دەموكراتيالىق جولمەن قابىلدادى.
بۇل وقيعا پرەزيدەنتىمىز قاسىم-جومارت توقاەۆتىڭ ادىلەتتى قازاقستان قالىپتاستىرۋ جولىنداعى باعدارىن حالىقتىڭ قولدايتىنىن تاعى ءبىر كورسەتىپ بەردى. سونداي-اق رەفەرەندۋم «حالىق ۇنىنە قۇلاق اساتىن مەملەكەت» تۇجىرىمداماسى اياسىندا جاسالعان كەزەكتى ناقتى قادامداردىڭ ءبىرى ەكەنى ءسوزسىز. ال وعان ازاماتتاردىڭ بەلسەندى قاتىسۋى ەلىمىزدە جاڭا ساياسي مادەنيەتتىڭ ورنىعا تۇسكەنىن بىلدىرەدى.
جالپى, اتوم ەلەكتر ستانساسى – تۇراقتى جانە تازا قۋات كوزى. بۇل ەنەرگيا تاپشىلىعىن ازايتۋ جانە ەكونوميكالىق دامۋ جولىندا ايرىقشا ماڭىزعا يە. سوندىقتان وسى رەفەرەندۋم جانە حالىق قابىلداعان شەشىم ەلىمىزدى جاڭا بەلەسكە شىعارادى دەپ سەنەمىز.
ماۋلەن اشىمباەۆ,
سەنات توراعاسى