اقتاۋدا قازاق بوكسىنىڭ اتاسى شوقىر بولتەك ۇلىن ەسكە الۋعا ارنالعان XVI حالىقارالىق تۋرنير ءوز مارەسىنە جەتتى. بۇل دودادا تۇركيا, ازەربايجان, كۋۆەيت, پولشا, مولدوۆا, وزبەكستان, قىرعىزستان, تۇرىكمەنستان, تاجىكستان, گرۋزيا, يران, كامبودجا, قازاقستان ەلدەرىنىڭ بارلىق ايماعىنان كەلگەن بىلعارى قولعاپ شەبەرلەرى كۇش سىناستى.
كاسپي تەڭىزى جاعالاۋىندا ساراپقا سالىنعان 12 باس جۇلدەنىڭ جەتەۋىن جەرلەستەرىمىز جەڭىپ الدى. 54, 57 كگ سالماقتا ماڭعىستاۋ وبلىسىنىڭ وكىلدەرى سامات جەتىباەۆ پەن جولداس جەڭىسوۆتىڭ مەرەيى ۇستەم بولدى. فينالدا سامات باعلان كەنجەبەكوۆكە (جامبىل) سان سوقتىرسا, جولداس حۋسروۆحان راقىموۆتى (تاجىكستان) ۇتتى. اسا جەڭىل سالماقتا تۇركىستاندىق نۇرعيسا تۇرابەكوۆتىڭ باعى جاندى. شەشۋشى تۇستا ول جانكۇيەر پەرنەبەكتى (الماتى وبلىسى) تىزە بۇكتىردى. 86 كگ سالماقتىڭ باس جۇلدەسىن دە ءدال سول ءوڭىردىڭ وكىلى ولجالادى. ول – بەكبولات ابدىكەرىم. اقتىق سىندا بەكبولات تەلمان مامەدوۆتەن (الماتى وبلىسى) باسىم ءتۇستى. 51 كگ سالماق دارەجەسىندە اكتوبەلىك بەكزات الدامجاروۆ نوردرجان مىرزاحمەتوۆتەن, 80 كگ سالماقتاعى داۋلەت تولەمىسوۆ ساردور شومۇراتوۆتان ايلاسىن اسىرىپ, جەڭىس تۇعىرىنىڭ ەڭ بيىك ساتىسىنا كوتەرىلدى. جەڭىلگەن جىگىتتەردىڭ ەكەۋى دە – وزبەكستاننان. 60 كگ سالماقتا جامبىل وبلىسىنىڭ جامپوزى ەرحان تۇرلان ەرلەدى. فينالدا ول ءوزىنىڭ كوماندالىق ارىپتەسى باعلان كەنجەبەكوۆتى قاپى قالدىردى.
باس جۇلدەنىڭ تورتەۋىن وزبەكستاننىڭ ورەندەرى ولجالادى. ولار – سايات ءىلياسوۆ (63,5 كگ), شاحبوز يۋنۋساليەۆ (67 كگ), سيراجاتددين حوجاحمەتوۆ (75 كگ), مۇزراتبەك توحيروۆ (92 كگ). 71 كگ سالماقتا ازەربايجاننىڭ مىقتىسى سارحان اليەۆكە ەشكىمنىڭ ءالى جەتپەدى. اسا اۋىر سالماقتا دا كاسپيدىڭ ارعى جاعالاۋىنان كەلگەن ماحامماد ابدوللاەۆتىڭ اسىعى الشىسىنان ءتۇستى.
اقتاۋدا جىل سايىن ءداستۇرلى تۇردە ۇيىمداستىرىلىپ تۇراتىن تۋرنيرگە ازيا بوكس كونفەدەراتسياسىنىڭ ۆيتسە-پرەزيدەنتى ءازيز قوجامبەتوۆ, ۇلتتىق قۇرامانىڭ مەملەكەتتىك جاتتىقتىرۋشىسى اسلان ەگۋباەۆ, بەيجىڭ وليمپياداسىندا قازىلىق ەتكەن تانىمال تورەشى بەرىكبول قاسىمحانوۆ, ماڭعىستاۋ بوكسىنىڭ ارداگەرلەرى ناعاشىباي جاريەۆ پەن باقىت شاپقان قۇرمەتتى قوناق رەتىندە قاتىستى.