2024 جىلدىڭ 7-10 قازان كۇندەرى اشحاباد قالاسىندا قازاقستان رەسپۋبليكاسىنىڭ تۇرىكمەنستانداعى مادەنيەت كۇندەرى وتەدى, دەپ حابارلايدى Egemen.kz قر مادەنيەت جانە اقپارات مينيسترلىگىنە سىلتەمە جاساپ.
اشحاباد تۇرعىندارى مەن قوناقتارى وسى كۇندەرى قازاق كينەماتوگرافياسىمەن, مۋزىكا ونەرى جانە ۇلتتىق داستۇرلەرىمەن تەرەڭ تانىسا الادى.
قازاقستان كينوسى كۇندەرىنىڭ اشىلۋى رەجيسسەر ا.ساتاەۆتىڭ قازاق حاندارى تۋرالى سىر شەرتەتىن « ۇلى دالا تاڭى» اتتى تاريحي تۋىندىسىمەن باستالادى. سونىمەن قاتار تۇرىكمەن جۇرتشىلىعىنا «پاراليمپياداشى» ءفيلمى دە جول تارتادى.
تۇرىكمەنستان مەملەكەتتىك مادەني ورتالىعىنىڭ مۋكاموۆ سارايىندا قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ «سارىارقا» اتتى گاسترولدىك كونتسەرتى وتەدى.
«تۇرىكمەنستان» كينوكونتسەرت زالىندا روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ «Saz&Soul: شەكاراسىز اۋەندەر» اتتى گاسترولدىك كونتسەرتى ۇيىمداستىرىلادى.
نەگىزگى ءىس-شارا 9-شى قازان كۇنى ساعات 19:00-دە تۇرىكمەنستان مەملەكەتتىك مادەني ورتالىعىنىڭ مۋكاموۆ سارايىندا جوسپارلانعان. بۇل كۇنى ەكى ەل مينيسترلەرىنىڭ قاتىسۋىمەن قازاقستان رەسپۋبليكاسىنىڭ تۇرىكمەنستانداعى مادەنيەت كۇندەرىنىڭ جابىلۋ سالتاناتى اياسىندا قازاقستاندىق ونەر مايتالماندارىنىڭ قاتىسۋىمەن گالا-كونتسەرت وتەدى. اتالعان كونتسەرتتە قازاقستاننىڭ حالىق ءارتىسى رامازان ستامعازيەۆ, قازاقستاننىڭ ەڭبەك سىڭىرگەن قايراتكەرى الىشەر كارىموۆ, «دارىن» مەملەكەتتىك جاستار سىيلىعىنىڭ لاۋرەاتتارى: راسۋل جارماعامبەتوۆ, ابىلاي تىلەپبەرگەن, تاڭات سادەنوۆ جانە باسقالارى ونەر كورسەتەدى.
10 قازاندا اشحاباد قالاسىنداعى «لاچىن» ساياباعىندا ۇلى اقىن اباي قۇنانباەۆ ەسكەرتكىشىنىڭ سالتاناتتى اشىلۋ ءراسىمى وتەدى. اتالعان ءىس-شاراعا جەرگىلىكتى زيالى قاۋىم, عالىمدار, جازۋشىلار, ديپلوماتيالىق كورپۋس, شىعارماشىلىق وداقتار, قازاق دياسپوراسىنىڭ وكىلدەرى قاتىسادى.
ايتا كەتەيىك, قازاقستان رەسپۋبليكاسى مادەنيەت جانە اقپارات مينيسترلىگى مەن تۇرىكمەنستان مادەنيەت مينيسترلىگىنىڭ بىرىگىپ ۇيىمداستىرۋىمەن قازاقستان رەسپۋبليكاسىنداعى تۇرىكمەنستاننىڭ مادەنيەت كۇندەرى 2024 جىلى ماۋسىم ايىندا استانا قالاسىندا وتكەن ەدى.