مەملەكەتتىك ساياساتتىڭ باستى ۇستانىمىنىڭ ءبىرى – وتاندىق ەكونوميكانى ءارتاراپتاندىرۋ. مۇنىڭ استارىندا ەكى ماقسات بار. بىرىنشىدەن, ينۆەستيتسيا تارتىپ, باسەكەگە قابىلەتتى ءتۇرلى ءونىم شىعارۋ قاجەت. ەكىنشىدەن, ساپالى ونىمدەر يمپورتتى تاۋارلاردى الماستىرۋعا جول اشادى.
اتىراۋ وبلىسىندا وسىنداي ماقساتتى كوزدەگەن جاڭا زاۋىتتىڭ ءبىرىنشى جەلىسى ىسكە قوسىلدى. ارنايى ەكونوميكالىق ايماقتا ورنالاسقان ءوندىرىس ورنىندا پوليەفيرلى گەوسينتەتيكالىق ماتەريال شىعارىلادى. وبلىس اكىمىنىڭ ورىنباسارى مارات مۋرزيەۆتىڭ پىكىرىنشە, مەملەكەت تاراپىنان ەكونوميكانى ارتاراپتاندىرۋعا ۇلەس قوساتىن وسىنداي جوبانىڭ بارىنە قولداۋ كورسەتىلەدى.
«مەملەكەت باسشىسىنىڭ ينۆەستيتسيا تارتۋ جونىندەگى تاپسىرماسىن جۇزەگە اسىرۋ اياسىندا «قارا التىندى» ەكسپورتتاۋمەن شەكتەلمەي, جاڭا ءونىم شىعاراتىن جوبالار ىسكە اسىرىلا باستادى. سونىڭ ءبىرى – پوليەفيرلى گەوسينتەتيكالىق ماتەريال ءوندىرىسى. جاڭا زاۋىتتىڭ ءونىمى ىشكى نارىقتى وتاندىق قۇرىلىس ماتەريالدارىمەن قامتاماسىز ەتۋگە مۇمكىندىك بەرەدى», دەيدى م.مۋرزيەۆ.
«ينتاگو قازاقستان» جشس باس ديرەكتورى ازامات اسىلبەكوۆتىڭ ايتۋىنا قاراعاندا, ءوندىرىس ورنىنىڭ جىلدىق قۋاتى – 15 ملن شارشى مەتر. كاسىپورىن جاقىن ارادا جەرگىلىكتى ءونىمنىڭ ىشكى اينالىمداعى ۇلەسىن ارتتىرۋعا سەرپىن بەرىپ, پوليەفيرلى ماتەريالدار يمپورتىنا دەگەن تاۋەلدىلىكتەن ارىلتادى.
«ەلىمىزدە پوليەفيرلى گەوسينتەتيكالىق ماتەريالعا سۇرانىس بار. وسىنداي ماتەريالدىڭ شامامەن 10 ملن شارشى مەترى تۇركيا, قىتاي, رەسەيدەن الىنادى. ونىمدەرىمىزدىڭ باسىم بولىگىن وتاندىق تۇتىنۋشىلارعا ۇسىنامىز. ۇشتەن ءبىرىن ەكسپورتقا جىبەرۋدى كوزدەدىك. رەسەيدەگى تۇتىنۋشىمىز 3 ملن شارشى مەتر ماتەريالدى ساتىپ الۋعا كەلىسىمشارت جاسادى», دەيدى ا.اسىلبەكوۆ.
جاڭا زاۋىتتىڭ جۇمىسى تاۋلىك بويى توقتامايدى. ءوندىرىس ورنىنداعى تەحنولوگيالىق جەلىلەردىڭ دامىلسىز ۇدەرىسىن قاداعالاۋعا 40 ادام جاۋاپتى. ءوز ءىسىن جاۋاپكەرشىلىكپەن اتقارۋعا كىرىسكەن جەرگىلىكتى مامانداردىڭ ورتاشا جاسى – 31.
«زاۋىتتىڭ جۇمىس ىستەۋ ۇستانىمى – پلاستيكتەردى وڭدەپ, قالدىقسىز ءونىم شىعارۋ. بۇل ماتەريال جوعارى ساپاسىمەن, سۋ وتكىزبەيتىن توزىمدىلىگىمەن ەرەكشەلەنەدى. ونى جول جانە نىسان قۇرىلىسىندا, تەمىرجول مەن درەناجدىق جۇيەگە قولدانۋعا بولادى. اسىرەسە جاڭادان سالىناتىن جول تابانىن نىعايتۋ ءۇشىن توسەلەدى. مۇنداي ساپالى ماتەريال توسەلگەن جول جابىندىسى بۇزىلمايدى», دەيدى ا.اسىلبەكوۆ.
باس ديرەكتوردىڭ مالىمەتىنشە, جوباعا باعىتتالعان ينۆەستيتسيالىق قارجى كولەمى – 1,4 ملرد تەڭگە. ونىڭ 715 ملن تەڭگەسى «ونەركاسىپتى قولداۋ قورىنان» الىنعان. 2025 جىلى تاعى 3 جوبانى ىسكە قوسۋ جوسپارلانىپ وتىر. وعان 4 ملرد تەڭگە ينۆەستيتسيا تارتىلىپ, جاڭادان 160 جۇمىس ورنى اشىلادى. سونداي-اق زاۋىتتى شيكىزاتپەن قامتۋ ماسەلەسى قولعا الىنباق. وسىعان وراي الداعى جىلدىڭ كوكتەمىندە «جاسىل دامۋ» باعدارلاماسى اياسىندا اتىراۋدا شتاپەلدى تالشىق شىعاراتىن جەلى ىسكە قوسىلادى. جالپى قۇنى 2 ملرد تەڭگە كولەمىندە ينۆەستيتسيا قۇيىلاتىن جوبا اياسىندا 61 جۇمىس ورنىن اشۋ كوزدەلىپ وتىر. «قازاقستاندا شتاپەلدى تالشىق شىعاراتىن ءوندىرىس ورنى جوق. ونى شىعارۋعا قايتا وڭدەلگەن پلاستيكالىق بوتەلكەلەردى شيكىزات رەتىندە قولدانامىز», دەدى ا.اسىلبەكوۆ.
اتىراۋ وبلىسى