جەڭىل اتلەتيكادان قازاقستاننىڭ تۋى استىندا ونەر كورسەتەتىن 28 جاستاعى كەنيالىق لەگيونەر دەيزي دجەپكەمەي فرانتسيانىڭ بەلفور قالاسىندا جالاۋى جەلبىرەگەن جارتىلاي مارافوننىڭ جەڭىمپازى اتاندى. ول مارە سىزىعىن 1 ساعات 07 مينۋت 54 سەكۋندتا قيىپ ءوتتى. ەكىنشى, ءۇشىنشى ورىنداردى ۋگاندالىق اننەت چەلانگات (01:09:58) پەن ەفيوپيالىق مەسەلۋ كاحساي (01:10:18) يەلەندى.
فۋتزالدان تاشكەنتتە ءوتىپ جاتقان الەم بىرىنشىلىگىنىڭ جارتىلاي فينالىندا برازيليا مەن ۋكراينا قۇرامالار كۇش سىناستى. 18-مينۋتتا ەسەپتى يگور چەرنياۆسكي اشتى. ەكىنشى كەزەڭ باستالعان بەتتە روستيسلاۆ سەمەنچەنكو ءوز قاقپاسىنا دوپ سوعىپ, قارسىلاس كومانداعى تارازى باسىن تەڭەستىرۋگە مۇمكىندىك بەردى. كوزدى اشىپ-جۇمعانشا ديەگو برازيليالىقتاردى العا شىعاردى. 29-مينۋتتا يگور كورسۋن جاعدايدى تۇزەدى. بىراق 36-مينۋتتا ديەگو دۋبل اۆتورى اتانىپ, برازيليا قۇراماسىنا جەڭىس سىيلادى – 3:2. كەلەسى جارتىلاي فينالدا ارگەنتينا مەن فرانتسيانىڭ فۋتزالشىلارى شەبەرلىك بايقاستى.
فۋتبولدان «اقتوبە» كلۋبىندا وينايتىن فرەددي گوندولا تاياۋ كۇندەرى پاناما ۇلتتىق قۇراماسىنىڭ ساپىنا قوسىلىپ, الداعى جولداستىق كەزدەسۋلەردە جاسىل الاڭعا شىعادى. اتالعان مەملەكەتتىڭ باس كومانداسى 13, 16 قازان كۇندەرى اقش پەن كاناداعا قارسى وينايدى. سول سايىستاردا 29 جاستاعى «اقتوبەنىڭ» شابۋىلشىسىنا سەنىم ارتىلىپ وتىر.
دزيۋدودان دۋشانبەدە ءوتىپ جاتقان جاستار اراسىنداعى الەم بىرىنشىلىگىنىڭ ەكىنشى كۇنى قازاقستاننىڭ تاتامي شەبەرلەرى ءوز جانكۇيەرلەرىن قۋانتا المادى. 73 كگ سالماقتاعى ادىلەت المات تۇرىك يبراگيم دەميرەلدى تىزە بۇكتىرگەنىمەن, ىلە-شالا وزبەك ماردون راۆشانوۆقا ەسە جىبەردى. تۇساۋكەسەر كەزدەسۋىندە ۇلىبريتانيالىق حلويا لينكتى سۇرىندىرگەن دانا ءابدىروۆا (57 كگ) كەلەسى كەزەڭدە يتاليالىق دجۋليا كارنەگە جول بەردى. كوركەم ورىمبەك تە (63 كگ) ءدال سول مەجەدە توقتادى. ول قىرعىز مىرزايىم ديۋشەنبەكوۆانى قاپى قالدىرعانىمەن, كورەيالىق چجي مين ياننىڭ وسال تۇسىن تابا المادى.
بۇل كۇندەرى مالايزيادا «لانگكاۆي تۋرى» دەپ اتالاتىن ءداستۇرلى جارىس ءوتىپ جاتىر. سول كوپكۇندىكتە «استانا» كلۋبىنىڭ ۆەلوشاباندوزدارى تابىستى ونەر كورسەتتى. كەشە بەسىنشى كەزەڭ ءوز مارەسىنە جەتتى. 197,3 شاقىرىمدىق قاشىقتىقتى 3 ساعات 35 مينۋت 30 سەكۋندا ءجۇرىپ وتكەن نيدەرلاندتىق ارۆيد دە كلياين («Tudor Pro Cycling Team») جەڭىمپاز اتانسا, يتاليالىق ماتتەو مالۋچەللي («JCL Team UKYO») ەكىنشى ورىندى يەلەندى. ءۇشىنشى ساتىعا رەسەيلىك گلەب سىريتسا («استانا») تابان تىرەدى. جالپى ەسەپتە ۇلىبريتانيانىڭ وكىلى ماكس پۋل («Team dsm-firmenich PostNL») كوش باستاپ كەلەدى. «استانا» كلۋبى مۇشەلەرى اراسىندا ەڭ ۇزدىك كورسەتكىش انتون چارميگكە تيەسىلى. قازاقستاندا ىرگەتاسى قالانعان كوماندانىڭ ساپىنداعى دانيالىق لەگيونەر جەتىنشى ورىندا تۇر.