«جاستىق شاقتا بەينەت بەر, قارتايعاندا زەينەت بەر» دەيدى حالقىمىز. ۇلكەنگە قۇرمەت, قارتتاردى سىيلاۋ, قاريا كەلسە قۇراق ۇشىپ, قوس قولداپ امانداسۋ, داستارقان باسىندا تورگە وزدىرىپ, باتا سۇراۋ – حالقىمىزدىڭ اسىل ءداستۇرى. بۇگىنگى يگىلىكتىڭ ءبارى سول اق ساقالدى, اق جاۋلىقتى اتا-اجەلەرىمىزدىڭ قاپىسىز قاجىر-قايراتى, ەرەن ەڭبەگىمەن جاسالعان.
شىمكەنت قالاسىندا ميلليوننان استام حالىق بار. دەمەك زەينەتكەرلەردىڭ دە سانى اجەپتاۋىر. ولارعا جاعداي جاساۋ – جەرگىلىكتى اتقارۋشى بيلىكتىڭ باستى مىندەتىنىڭ ءبىرى. كەڭەستىك داۋىردە مەگاپوليس اۋماعىندا قانشاما زاۋىت-فابريكا, مەكەمەلەر سالىندى. الەۋمەتتىك نىساندار مەن كوپقاباتتى تۇرعىن ۇيلەر بوي كوتەردى. تاۋەلسىزدىكتىڭ العاشقى جىلدارىندا قۇرىلىس جۇمىستارى قارقىندى جۇرگىزىلىپ, قالانى كوركەيتۋ باعىتىندا دا كوپ جۇمىس اتقارىلدى. مىنە, وسى جۇمىستاردىڭ بارىنە دە بەلسەنە اتسالىسقان بۇگىنگى زەينەت جاسىنداعى اعا-اپالارىمىز. سوندىقتان ولارعا قانداي جاعداي جاسالسا دا جاراسىمدى. مەملەكەت تاراپىنان ءتۇرلى قولداۋ, كومەك شارالارى جۇيەلى ۇيىمداستىرىلىپ كەلەدى.
ماسەلەن, شىمكەنتتە بۇل كۇندە «بەلسەندى ۇزاق ءومىر» ورتالىعى قارتتارعا جان-جاقتى قىزمەت كورسەتەدى. مۇنداي مەكەمە شاھاردا بىرەۋ ەمەس, ۇشەۋ. ەندى بۇيىرتسا, ءتورتىنشىسى اشىلعالى جاتىر. ولاردىڭ ءبارى دە جۇمىسپەن قامتۋ جانە الەۋمەتتىك قورعاۋ باسقارماسىنا قارايدى. باسىندا 2019 جىلى «اسىل جۇرەك» الەۋمەتتىك-مەديتسينالىق ورتالىعى بولىپ اشىلعان مەكەمە اتاۋى 2021 جىلى ەسىمىن قازىرگى اتاۋىنا وزگەرتتى. «بەلسەندى ۇزاق ءومىر» ورتالىعىنىڭ الەۋمەتتىك قىزمەتكەرى م.ارىسباەۆانىڭ ايتۋىنشا, كۇن سايىن سەگىز جۇزدەن استام زەينەتكەر ەكى مەزگىل – تاڭەرتەڭنەن تۇسكە دەيىن, تۇستەن كەشكە دەيىن قالاداعى 3 ورتالىقتا كوڭىل سەرگىتىپ, دەمالىپ, مەديتسينالىق ەم-دومدار قابىلدايدى. ماسساجعا بارادى, يوگامەن اينالىسادى, تاڭعى جاتتىعۋلار جاسايدى, ترەناجەرلىك زالدا شىنىعادى. ودان بولەك شاحمات, دويبى ويناپ, بيلياردتان كىشى تۋرنيرلەر وتكىزىپ, ۇستەل تەننيسىندە جارىسىپ, كوڭىل سەرگىتەدى. مەديتسينادا دەنەمەن بىرگە ميدى جاتتىقتىرۋ دا پايدالى. اسىرەسە ول زەينەت جاسىنا كەلگەن قارتاڭ كىسىلەرگە وتە كەرەك. سول سەبەپتى ارداگەرلەر ويىن, فيزيكالىق قيمىل-ارەكەتتەن بولەك, كىتاپ وقىپ, بەينەلەۋ ونەرى, قىش ونەرى بولمەلەرىندە شىعارماشىلىعىن شىڭداپ, رۋحاني ءلاززات الادى. سونىمەن بىرگە ءارتۇرلى تانىمدىق تاقىرىپتا كوركەم فيلمدەر تاماشالاپ, كاراوكەدە ءان سالىپ, كوڭىل كوتەرەدى. ەڭ باستىسى, تەك عيمارات ىشىندە قامالىپ قالماي, اپتانىڭ ءار جۇماسىندا دەندروساياباققا بارىپ, ءتۇرلى جاتتىعۋ جاساپ, دەنساۋلىقتارىن نىعايتادى. مۇندا تەك زەينەت جاسىنداعى ازاماتتار عانا ەمەس, ەكىنشى دۇنيەجۇزىلىك سوعىس ارداگەرلەرىنە تەڭەستىرىلگەن جاندار دا دەمالا الادى.
بۇگىندە جاسى 65-كە كەلگەن, تالاي جىل قۇقىق قورعاۋ سالاسىندا ەڭبەك ەتىپ, پوليتسيا مايورى شەنىمەن زەينەتكەرلىككە شىققان اعمەن جۇماباەۆ تا وسى ورتالىقتىڭ تۇراقتى قىزمەتىن كورىپ جۇرگەن جانداردىڭ ءبىرى. قازىرگى تاڭدا قارتتار كۇنىنە وراي ارنايى كونتسەرتتىك قويىلىم دايىنداپ جاتىر.
ء«وزىم پوليتسيادا جۇمىس ىستەسەم دە, ونەرگە ءبىر تابان بولدىم. ءان سالعاندى, مۋزىكالىق اسپاپتا ويناعاندى جاقسى كورەمىن. سونىمەن بىرگە سپورتتى دا جانىمنان تاستاعان ەمەسپىن. ورتالىقتا ۇستەل تەننيسىن ويناپ تۇرامىن. ودان بولەك, شىعارماشىلىقپەن اينالىسامىن. شىنىن ايتقاندا, بۇل جەر مەنىڭ تالانتىمنىڭ كادىمگىدەي تىنىسىن اشتى. قاريالارعا وسىنداي قىزمەت ۇيىمداستىرعان مەملەكەتكە كوپ راحمەت. «ادام قارتايعاندا ۇيگە سىيمايدى» دەگەن راس. كەيدە ءبىر جەرگە بارىپ, قۇرداستارمەن اڭگىمەلەسىپ, كوڭىل سەرگىتكىڭ كەلەدى. ورتالىق – جالعىزدىقتان قاجىعان جاندارعا ناعىز تاپتىرماس ورىن», دەيدى ول.
شىمكەنت