سەنات دەپۋتاتى سەرگەي كارپليۋك التىنسارين جانە فەدوروۆ اۋداندارىنىڭ تۇرعىندارىمەن كەزدەستى. وندا ەلىمىزدىڭ ەنەرگەتيكالىق قاۋىپسىزدىگى جانە اەس سالۋ جوباسىنا قاتىستى ماڭىزدى ماسەلەلەر تالقىلاندى. كەزدەسۋگە ءبىلىم بەرۋ جانە اگروونەركاسىپ كەشەنى قىزمەتكەرلەرىمەن قوسا ءتۇرلى سەكتوردىڭ وكىلدەرى دە قاتىستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سەرگەي كارپليۋك جەرگىلىكتى تۇرعىندارمەن تىلدەسۋ بارىسىندا قازاقستاندى تۇراقتى ەنەرگيامەن جابدىقتاۋداعى اەس قۇرىلىسىنىڭ ءمان-جايىن ەگجەي-تەگجەيلى تۇسىندىرگەن. ول ەلىمىزدە ەلەكتر ەنەرگياسىن تۇتىنۋدىڭ وسۋىنە بايلانىستى ەنەرگەتيكالىق قاۋىپسىزدىكتى قامتاماسىز ەتۋ ءۇشىن ءتيىمدى شارالار قابىلداۋ قاجەتتىگىن اتاپ ءوتتى.
سەناتور اەس قۇرىلىسى ەنەرگيا تاپشىلىعى ماسەلەسىن شەشىپ قانا قويماي, جاڭا جۇمىس ورىندارىن اشاتىنىن اتاپ ءوتتى. بۇل اسىرەسە جاس ماماندار ءۇشىن ماڭىزدى ەكەنىن ايتتى.
«اتوم ەلەكتر ستانتسياسى بولاشاق ۇرپاقتى تۇراقتى ەنەرگيامەن قامتاماسىز ەتۋگە نەگىز بولا الادى. بۇل ەلىمىزدىڭ ەكونوميكالىق جانە ەنەرگەتيكالىق تاۋەلسىزدىگىن نىعايتۋ جولىنداعى ماڭىزدى قادام», دەدى سەرگەي كارپليۋك.
جەرگىلىكتى تۇرعىندار جوبانىڭ قاۋىپسىزدىگى مەن ەكولوگيالىق اسپەكتىلەرىنە نازار اۋدارا وتىرىپ, ۇسىنىلعان باستامالاردى بەلسەندى تۇردە تالقىلاعان. سەناتور تالقىلاۋ بارىسىندا اەس-ءتى پايدالانۋ قاۋىپسىزدىگى مەن ەكولوگيالىق ستاندارتتارعا قاتىستى ازاماتتاردى تولعاندىراتىن سۇراقتارعا تولىق جاۋاپ بەرگەن.
كەزدەسۋ قورىتىندىسى بويىنشا كوپتەگەن قاتىسۋشى جوباعا قولداۋ ءبىلدىرىپ, ءوڭىردىڭ جانە بۇكىل ەلىمىزدىڭ ەكونوميكالىق دامۋى ءۇشىن ونىڭ ماڭىزدىلىعىن اتاپ ءوتتى.