قازاقستان مەن رەسەي فەدەراتسياسىنىڭ كولىك مينيسترلىكتەرى «ريددەر-نوۆوسيبيرسك» حالىقارالىق تەمىرجول قاتىناسىن قالپىنا كەلتىرۋ تۋرالى كەلىسىمگە كەلدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
قر كولىك ءمينيسترى مارات قاراباەۆتىڭ ايتۋىنشا, پويىزدار 2024 جىلدىڭ 18 جەلتوقسانىنان باستاپ ءتورت كۇندە ءبىر رەت جۇرە باستايدى.
ايتا كەتەيىك, «رەسەي تەمىر جولدارى» اق قىزمەت كورسەتەتىن №407/408 «ريددەر-نوۆوسيبيرسك» حالىقارالىق پويىزى 250 جولاۋشىعا ارنالعان 6 ۆاگوننان (3 كۋپە, 3 پلاتسكارت) تۇرادى.
«جوعارىدا اتالعان پويىز اۋانى باپتاۋ جانە بەينەباقىلاۋ جۇيەلەرىمەن, بيواجەتحانا كەشەندەرىمەن, روزەتكالارمەن, ءموبيلدى قۇرىلعىلاردى/گادجەتتەردى قۋاتتاۋعا ارنالعان USB پورتتارىمەن جانە ءار ورىننىڭ جانىندا جەكە جارىقتاندىرۋمەن جابدىقتالعان», دەلىنگەن ۆەدومستۆو حابارلاماسىندا.