اەس سالۋ جونىندەگى حالىق شتابىنىڭ قۇرامىنداعى سەناتور بيبىگۇل جەكسەنباي استانا تۇرعىندارىمەن بىرقاتار كەزدەسۋلەر وتكىزدى. وندا اەس قۇرىلىسىنىڭ تيىمدىلىگى جانە ونىڭ ەلىمىزگە ارتىقشىلىقتارى تالقىلاندى, دەپ حابارلايدى Egemen.kz.
ول ەلەكتر ەنەرگياسىنا دەگەن سۇرانىس ارتا تۇسكەن جاعدايدا اتوم ەلەكتر ستانتسياسىن سالۋ جوباسى قازاقستاننىڭ تۇراقتى ەنەرگيامەن جابدىقتالۋىن قامتاماسىز ەتۋدەگى نەگىزگى قادام ەكەنىن اتاپ ءوتتى.
كەزدەسۋگە قاتىسۋشىلار جالپىۇلتتىق رەفەرەندۋم ماسەلەسى بويىنشا پىكىرلەرىن جاريا ەتتى جانە حالىق شتابىنىڭ مۇشەلەرىنە سۇراقتار قويدى. سەناتور اتوم ەلەكتر ستانتسياسىن سالۋدىڭ ەلىمىزدىڭ بولاشاعىنداعى ستراتەگيالىق ماڭىزىنا توقتالدى.
«اتوم ەلەكتر ستانتسياسىنىڭ قۇرىلىسى – ەلىمىزدىڭ ەنەرگەتيكالىق قاۋىپسىزدىگىن نىعايتۋعا باعىتتالعان اۋقىمدى جوبانىڭ ءبىرى. اتوم ەنەرگەتيكاسىنىڭ دامۋىمەن بىرگە وندىرىستىك الەۋەتتى دە ارتتىرا الامىز, بۇل حالىقتىڭ ءال-اۋقاتىنا تىكەلەي اسەر ەتەدى», دەدى بيبىگۇل جەكسەنباي.
«ەندوحيرۋرگيا كلينيكاسى» جشس قىزمەتكەرلەرىمەن كەزدەسۋ بارىسىندا سەناتور 6 قازاندا وتەتىن رەفەرەندۋمعا بەلسەندى تۇردە قاتىسۋعا شاقىردى.
«پرەزيدەنت قاسىم-جومارت توقاەۆ حالىققا جولداۋىندا اتوم ەلەكتر ستانتسياسىن سالۋ ماسەلەسى جالپىۇلتتىق رەفەرەندۋم ارقىلى شەشىلەتىنىن اتاپ ءوتتى. بۇل «حالىق ۇنىنە قۇلاق اساتىن مەملەكەت» تۇجىرىمداماسىنىڭ ايقىن كورىنىسى. ءبىز ەكونوميكالىق جەڭىسكە عانا ەمەس, ەنەرگەتيكالىق تاۋەلسىزدىككە دە قول جەتكىزەمىز, سوندىقتان بارلىق قازاقستاندىقتاردىڭ ازاماتتىق ۇستانىمىن كورسەتۋى ماڭىزدى», دەپ اتاپ ءوتتى ول.
سەناتور سونىمەن قاتار №84 مەكتەپ-گيمنازيا ۇجىمىمەن كەزدەسۋ وتكىزىپ, ەلىمىزدىڭ ەنەرگەتيكالىق بولاشاعىنىڭ ماڭىزدىلىعىن جانە اەس قۇرىلىسىنىڭ ەكونوميكاعا اسەرىن تالقىلادى. ول قاجەتتى رەسۋرستارعا يە قازاقستان الەمدىك اتوم ەنەرگەتيكاسى سالاسىندا ەرەكشە ورىن الاتىنىن ايتتى.