سەنات دەپۋتاتى باۋىرجان قانيەۆ اقتوبە وبلىسىنداعى تەمىر جانە مۇعالجار اۋداندارىنىڭ تۇرعىندارىمەن بىرگە الداعى بولاتىن رەفەرەندۋم تاقىرىبىن تالقىلادى, دەپ حابارلايدى Egemen.kz.
سەناتتىڭ ءباسپاسوز قىزمەتىنىڭ ءمالىم ەتۋىنشە تۇرعىندار كەزدەسۋلەر بارىسىندا اتوم ەلەكتر ستانساسىن سالۋدىڭ ارتىقشىلىعى مەن قاۋىپتەرىنە قاتىستى سۇراقتار قويدى. كوبى ەكولوگيالىق قاۋىپسىزدىك ماسەلەسىنە, قۇرىلىستىڭ قورشاعان ورتاعا اسەرىنە, سونداي-اق ايماق ومىرىندە بولۋى مۇمكىن الەۋمەتتىك-ەكونوميكالىق سالدارىنا نازار اۋداردى. دەپۋتات جوبانىڭ قازاقستاننىڭ جەر قويناۋىنان الىناتىن وتىنىنا تاۋەلدىلىكتى تومەندەتۋگە باعىتتالعانىن ءتۇسىندىرىپ, جان-جاقتى جاۋاپ بەردى.
سەناتور اتوم ەلەكتر ستانساسىن سالۋ – كەڭ قوعامدىق تالقىلاۋدى قاجەت ەتەتىن ستراتەگيالىق شەشىم ەكەنىن اتاپ ءوتتى. ونىڭ ايتۋىنشا, ءاربىر ازاماتتىڭ رەفەرەندۋمعا قاتىسۋى ەنەرگەتيكا سالاسىنداعى مەملەكەتتىك ساياساتتى قالىپتاستىرۋدىڭ ماڭىزدى بولشەگى بولىپ تابىلادى.
«ماڭىزدى جوبانىڭ بارلىق ماسەلەلەرىن مۇقيات قاراستىرۋىمىز كەرەك, ويتكەنى ونى جۇزەگە اسىرۋ جاۋاپتى جانە سالماقتى ۇيعارىمدى قاجەت ەتەدى. ءبىز بارىنشا اشىق بولۋعا ۇمتىلامىز. سىزدەر بەلسەندى ازاماتتىق ۇستانىم تانىتىپ, الداعى رەفەرەندۋمعا قاتىساسىزدار دەپ ۇمىتتەنەمىن. ويتكەنى, بۇل ءبىزدىڭ ەنەرگەتيكالىق ساياساتىمىزدىڭ بولاشاعىن بەلگىلەيدى», دەدى باۋىرجان قانيەۆ.