قازاقستان مەن رەسەيدىڭ جوعارى ءبىلىم سالاسىنداعى ىنتىماقتاستىعى تالقىلاندى. اتالعان تالقىلاۋ رەسەي فەدەراتسياسىنىڭ تۇمەن قالاسىندا وتكەن TNF–2024 ونەركاسىپ جانە ەنەرگەتيكا فورۋمى اياسىندا ۇيىمداستىرىلعان. جيىنعا عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ قاتىستى.
عىلىم جانە جوعارى ءبىلىم مينيسترلىگىنىڭ حابارلاۋىنشا, فورۋمعا قاتىسقان دەلەگاتسيا قۇرامىندا قازاقستاندىق تەحنيكالىق ۋنيۆەرسيتەتتەردىڭ وكىلدەرى, سونداي-اق «قازمۇنايگاز» كومپانياسى مەن «Kazservice» قازاقستان مۇناي سەرۆيستىك كومپانيالارى وداعىنىڭ وكىلدەرى دە بار. جيىنعا رەسەيدىڭ 60-تان اسا ايماعىنان جانە قازاقستان, بەلارۋس, وزبەكستان, ەگيپەت, كۋۆەيت جانە ساۋد ارابياسىنان كەلگەن 800-دەن استام كومپانيا وكىلدەرى مەن 12 مىڭنان كوپ ادام قاتىستى.
TNF فورۋمى – وتىن-ەنەرگەتيكا كەشەنىنىڭ وزەكتى ماسەلەلەرىن تالقىلاۋعا ارنالعان ەڭ ءىرى الاڭداردىڭ ءبىرى. بۇل ءىس-شارا جىل سايىن ونەركاسىپشىلەردى, جەر قويناۋىن پايدالانۋشىلاردى, قۇرىلىسشىلاردى, مەملەكەتتىك قىزمەتكەرلەر مەن ساراپشىلاردى جينايدى. بيىلعى فورۋمعا «تەحنولوگيالىق تۇراقتىلىق: دامۋ ستراتەگياسى» تاقىرىبى ارقاۋ بولعان.
فورۋم بارىسىندا عىلىم جانە جوعارى ءبىلىم ءمينيسترىنىڭ ورىنباسارى تالعات ەشەنقۇلوۆ تۇمەن وبلىسى گۋبەرناتورىنىڭ ورىنباسارى اندرەي رايدەرمەن كەزدەستى. كەزدەسۋ بارىسىندا قازاقستان مەن رەسەيدىڭ جوعارى ءبىلىم سالاسىنداعى ىنتىماقتاستىعى تالقىلاندى. ءىس-شارادا عىلىم مەن جوعارى ءبىلىمدى دامىتۋدىڭ جاڭا باعىتتارىن ەسكەرە وتىرىپ, تەحنيكالىق ۋنيۆەرسيتەتتەر اراسىنداعى ءوزارا ارەكەتتەستىكتىڭ ءتيىمدى ۇلگىلەرى تۋرالى ويلار دا ورتاعا سالىندى.
ت.ەشەنقۇلوۆ تۇمەندىك جاستاردى قازاقستاننىڭ جوعارى وقۋ ورىندارىندا, ونىڭ ىشىندە اكادەميالىق ۇتقىرلىق باعدارلاماسى اياسىندا ءبىلىم الۋعا شاقىردى. قازاقستاندىق دەلەگاتسيانى رەسمي قابىلداۋ كەزىندە تۇمەن وبلىسىنىڭ گۋبەرناتورى الەكساندر موور وتىن-ەنەرگەتيكا كەشەنىن دامىتۋ ءۇشىن ىنتىماقتاستىق پەن ۇزاقمەرزىمدى جوبالاردى ىسكە اسىرۋدا جاڭا تەحنولوگيالىق شەشىمدەر مەن سەرىكتەستەردىڭ قاجەت ەكەنىن اتاپ ءوتتى. فورۋم قاتىسۋشىلارىنا سەسسيالار مەن مۇناي-گاز سالاسىنداعى تەحنولوگيالار مەن پروتسەستەر بويىنشا دوڭگەلەك ۇستەلدەر ۇيىمداستىرىلدى.