«ايجۇلدىزدا» شىڭدالىپ ءجۇر

قازىر اتالعان ستۋ­ديا­دا بەينەلەۋ ونەرى, ۇلتتىق بي, كور­­كەمسوز, دومبىرا, ۆوكال با­­عىتتارى بويىنشا بەس ۇيىر­مە جۇمىس ىستەيدى. وعان جاس ەرەك­شەلىكتەرىنە قاراي 200-گە تارتا وقۋشى تارتىلعان. ولار­عا جاڭاشىل كرەاتيۆتى بەس بى­لىكتى پەداگوگ ساباق بەرەدى. ءار توپتاعى جەتكىنشەكتەر بە­كى­تىل­گەن ساباق كەستەسىمەن وقيدى.

بۇگىندە ستۋديا وقۋشى­لارىنىڭ الدى رەسپۋبليكالىق, حالىقارالىق بايقاۋلاردا توپ جارىپ, ەسىمدەرى ەلىمىزگە بەلگىلى بولا باستادى. ماسەلەن, بيىل قوستاناي قالاسىندا وتكەن «DANCE LEGASY» اتتى حالىقارالىق بايقاۋدا بي ۇيىرمەسىنىڭ 26 وقۋشىسى توپتىق بيدە ءبىرىنشى ورىن يەلەنسە, الماتىدا وتكەن «HAWAII FANTASTIC TALENT» اتتى رەس­پۋب­ليكالىق كونكۋرستان باس جۇلدەمەن ورالدى. اسىرەسە ايجان ابى­لايقىزى ەسىمدى ونەرلى وقۋ­شى­مىز بۋرابايدا وتكەن بي سايى­سىندا تالانتىمەن توپ جار­دى. سونداي-اق ول اقتاۋ قالا­سىندا ۇيىمداستىرىلعان حالىق­ارالىق بي بايقاۋىندا دا جۇلدەگەر اتاندى. ءبىزدىڭ بي­شى­­لەرىمىز «رە سول» شىعار­ما­­شىلىق ورتالىعى وتكىز­گەن «بابالار اماناتى» اتتى V رەسپۋبليكالىق بايقاۋدا دا ءوز ونەرلەرىمەن كوپشىلىكتى ءتانتى ەتىپ, ۇزدىك شىقتى. بۇل بايقاۋدا ستۋديا وقۋشىلارى ءتۇرلى اتالىم بويىنشا قا­تىستى. ايتالىق, كوركەمسوز وقۋدان دا ن.مۇحانبەتقاليەۆ پەن ا.بيسەنعالي سەكىلدى جەت­كىن­شەكتەرىمىز باس جۇلدەگە يە بولسا, «مۋزىكالىق اسپاپتا ويناۋ» اتالىمىندا مۇحتار ءاليحاننىڭ جۇلدىزى جان­دى. ال «ەسترادالىق ۆوكال» اتا­لىمىندا نۇرفازىل باق­داۋ­­لەتتىڭ دە قانجىعاسى مايلا­نىپ, باس جۇلدەنى يەلەندى. وسى باي­قاۋ­دا جەڭىمپاز اتان­عانداردىڭ ءبارى الدا­عى قا­را­­شا ايىندا دۋباي قالا­سىن­دا وتە­تىن كون­كۋرسقا جولداما الدى.

سونىمەن بىرگە استاناداعى «اتامۇرا» رەسپۋب­ليكالىق عىلىمي-ادىستە­مە­­لىك ورتالىعى مۇرىندىق بولعان «بوياۋلار قۇپياسى» اتتى باي­قاۋدا دا بەينەلەۋ ونەرى ۇيىر­مە­سىنىڭ وقۋشىلارى ۇزدىكتەر قاتا­رىنان كورىندى.

اتاپ ايتقاندا, اتالعان باي­قاۋدا قانات ەراسىلدىڭ اسىعى الشى­­سىنان تۇسسە, قاراقات تۇرعىن 1-ورىن يەلەندى. «جاس جۇلدىز» رەسپۋبليكالىق باي­قاۋىندا دا جانەركە تىلەۋ­عابىل جەڭىمپاز بولدى.

قازىر ەلىمىزدە بالالاردىڭ ۋاقىتىن ءتيىمدى پايدالانۋ ماقساتىندا ءتۇرلى شىعار­ما­شىلىق ۇيىرمە كوپتەپ اشىلىپ جاتىر. سوندىقتان ءبىز دە وسى سالاعا ءوز ۇلەسىمىزدى قوسىپ جاتقانىمىزعا قۋانىشتىمىز. مەنىڭشە, قازىرگى اتا-انالار بالانىڭ قالاۋىمەن ساناسادى, ونىڭ قاي باعىتتىڭ جانىنا جاقىن ەكەنىن انىقتاپ, سول سالا بويىنشا پەرزەنتىنە ءبىلىم بەرۋگە تىرىسادى. ارينە, بۇل دۇرىس باعىت. بالانىڭ بوس ۋاقىتىن وسىنداي ۇيىرمە­لەر ارقىلى ءتيىمدى پايدالانۋ بولاشاق ۇرپاقتىڭ قوعامنان ءوز ورنىن الاتىنىنا كوپ سەپ­تىگىن تيگىزەدى.

«ايجۇلدىز» ونەر-ءبىلىم ستۋ­دياسى اشىلعاننان بەرى نا­تي­جە مەن ساپاعا باعىتتالعان ءبى­راز جۇمىس اتقارىلدى. بالا­مەن جۇمىس ىستەۋ, ولاردى جە­تىستىككە جەتەلەۋ – ۇيىرمە جە­تەك­شىلەرىنىڭ باس­تى ۇس­تا­نىمى. جوعارىدا اتاپ وتىل­گەن جە­تىس­تىكتەردىڭ ناتي­جەسىندە ۇيىر­­مەگە كەلۋشى­لەر­دىڭ سانى ارت­تى.

ءبىزدىڭ ورتالىقتان ءالى تالاي جەڭىمپاز شىعاتىنى ءسوزسىز. بولاشاقتا ۇيىرمە سانىڭ كوبەيتۋ كوزدەلىپ وتىر. ەڭ باستىسى, ءبىز بالالاردى تەك ونەر مەن بىلىمگە باۋلىپ قانا قويماي, ولاردى مادەنيەتتىلىككە ۇيرەتەمىز. قوعامنان ءوز ورنىن ويىپ تۇرىپ الاتىن ازامات ەتىپ تاربيەلەسەك دەيمىز. قازىر وقۋشىلاردىڭ ونەرگە بەيىم, بىلىمگە قۇشتار بولۋى وزدە­رىنىڭ بولاشاقتارىنىڭ جار­قىن بولۋى ءۇشىن قاجەت. سوندىقتان اتا-انا بالاسىن ونەر-ءبىلىم ورتالىقتارىنا اپارىپ, ۇيىرمەدەن ءدارىس الۋعا باعىتتاسا, شاكىرتتەردىڭ بيىكتەرگە سامعايتىنى ءسوزسىز.

جۇلدىز سارسەنباەۆا,

«ايجۇلدىز» ونەر-ءبىلىم ستۋدياسىنىڭ جەتەكشىسى

قوستاناي وبلىسى