اينالانىڭ تازالىعىن ساقتاۋعا, بۇلدىرمەۋگە ءاربىر ازاماتتىڭ بەلسەندىلىگىن وياتۋ وتە ماڭىزدى. سوندا عانا تازالىقتى قامتاماسىز ەتۋگە بولادى.
ساتباەۆ قالاسىندا بيىل ءتورتىنشى رەت وتكىزىلگەن «ۇزدىك اۋلا» بايقاۋى تۇرعىنداردىڭ وزدەرى تۇراتىن اۋماقتاعى سانيتارلىق تازالىقتى ساقتاۋعا اتسالىسۋىنا وزىندىك ىقپالىن تيگىزە باستادى. ويتكەنى جىل ساناپ بايقاۋعا قاتىسۋشىلار قاتارى كوبەيىپ كەلەدى.
بيىل بايقاۋعا 15 اۋلانىڭ تۇرعىندارى قاتىستى. سولاردىڭ اراسىنان وزىق شىققاندارعا ارنايى سىيلىقتار بەرىلدى.
«جاسىل اۋلا» نوميناتسياسى بويىنشا قالاداعى ەردەن كوشەسى, 193 ءۇيدىڭ تۇرعىندارى جەڭىمپاز دەپ تانىلدى. ويتكەنى, ءۇي اۋلاسى جاسىل جەلەككە شومىلعان, ءارتۇرلى گۇلدەر كوز تارتادى. مۇنداي جەردىڭ تازالىعى دا تاماشا بولاتىنى ايتپاي-اق بەلگىلى. ولارعا بەينەباقىلاۋ كامەراسى سىيعا تارتىلدى. ناق وسىنداي بەينەكامەراعا گۋربا كوشەسى, 99-ءۇيدىڭ تۇرعىندارى دا «قالانىڭ وركەندەۋىنە قوسقان ۇلەسى ءۇشىن» نوميناتسياسى بويىنشا يە بولدى.
«ميب جانە جس ۇزدىك قىزمەتكەرى» دەپ تانىلعان «قايسار» جەكەمەنشىك پاتەر يەلەرى كوپەراتيۆىنە دانەكەرلەۋ اپپاراتى تابىستالدى.
«جايلى كىرەبەرىس» نوميناتسياسىنىڭ جەڭىمپازى اتانعان تاۋەلسىزدىك داڭعىلى, 55-ۇيگە جاڭا ۇلگىدەگى شاڭسورعىش بەرىلدى.
اباي كوشەسى, 65-ءۇيدىڭ تۇرعىندارى بيىلعى بايقاۋدىڭ باستى بايگەسىن – تەلەديداردى جەڭىپ الدى.
بايقاۋعا قاتىسۋشىلارعا سىي-سياپات جاسالدى.
سىيلىقتاردى تابىستاعان قالا اكىمى مۇرات بورىباەۆ: «قالاعا دەگەن سۇيىسپەنشىلىك - اۋلانى تازا ۇستاۋدان باستالادى» دەپ كەزدەيسوق ايتىلعان ەمەس. شىن مانىندە سولاي. تازالىقتى ساقتاۋ, سوعان ۇمتىلۋ - تاربيەنىڭ, مادەنيەتتىڭ ءبىر ءتۇرى. سوندىقتان ءۇيدىڭ كىرەبەرىسىنەن باستاپ, ونىڭ تازالىعىن ساقتاۋدى ءوز مىندەتى سانايتىن, قالامىزدىڭ دامۋى مەن وركەندەۋىنە ەلەۋلى ۇلەس قوساتىن بارلىق بەلسەندى جانە بەيجاي قارامايتىن قالا تۇرعىندارىنا زور العىسىمدى بىلدىرەمىن», دەدى.
بايقاۋ كەلەسى جىلى دا جالعاسىن تابادى.
ۇلىتاۋ وبلىسى,
ساتباەۆ قالاسى.