استانا قالاسىنىڭ جاستار سارايىندا كۇزگى اسكەرگە شاقىرۋ ناۋقانىندا وتان قورعاۋعا نيەتتەنگەن ازاماتتاردى سالتاناتتى تۇردە شىعارىپ سالۋ ءراسىمى ءوتتى. ەر ازاماتتاردىڭ العاشقى لەگى شەكارا قىزمەتىنە اتتاندى, دەپ حابارلايدى Egemen.kz قر قورعانىس مينيسترلىگىنە سىلتەمە جاساپ.
ءىس-شاراعا استانا قالاسى اكىمىنىڭ ورىنباسارى ەرىك مەيىرحانوۆ, قارۋلى كۇشتەر باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى پولكوۆنيك فارحات قۇرمانعاجينوۆ, ۇقك شەكارا قىزمەتىنىڭ ارداگەرلەرى, جاس ساربازدار مەن اسكەرگە شاقىرىلعانداردىڭ اتا-انالارى قاتىستى.
وسى جىلدىڭ كۇزىندە ەلوردادان 1200-گە جۋىق ازاماتتى اسكەرگە شاقىرۋ جوسپارلانىپ وتىر.
قارۋلى كۇشتەر باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى اسكەر قاتارىنا قوسىلعان ازاماتتارعا ارناعان سوزىندە مەرزىمدى قىزمەتتى وتكەرۋ كەزىندە جىگىتتەر قارۋ-جاراق پەن اسكەري تەحنيكانى باسقارۋ ماشىعىن ۇيرەنىپ قانا قويماي, شىنىعىپ, شىمىر بولاتىنىن اتاپ ءوتتى.
«ازاماتتىڭ اسكەري قىزمەت وتكەرۋى مىندەتى عانا ەمەس, قاسيەتتى بورىشى. اسكەرگە الىنعان ءاربىر جاۋىنگەر وتاندى قورعاۋى – ءوز ءۇيىن, تۋىستارى مەن جاقىندارىن قورعاۋى ەكەنىن ءتۇسىنۋى كەرەك», دەدى پولكوۆنيك فارحات قۇرمانعاجينوۆ.
ەلوردا اكىمىنىڭ ورىنباسارى جينالعانداردى ايتۋلى وقيعامەن قۇتتىقتاپ, اسكەر ساپىن تولىقتىرعاندار ءۇشىن بۇل كۇن – ءومىر بويى ەستە قالاتىن ەرەكشە سالتاناتتى كۇن ەكەنىن العا تارتتى.
«اسكەري انتقا ادال بولىپ, ەل الدىنداعى بورىشتارىڭدى ابىرويمەن وتكەرىڭدەر!», دەدى ەرىك مەيىرحانوۆ.
ايتا كەتەيىك, 30 اسكەرگە شاقىرىلۋشى بيىل قۇرىلعانىنا 100 جىل تولاتىن شىعىس قازاقستان وبلىسىنىڭ زايسان شەكارا باسقارماسىندا مەرزىمدى اسكەري بورىشىن وتەيدى. ولاردىڭ كەيبىرى ەل شەبىن قورعاۋدى وتباسىلىق داستۇرگە اينالدىرماق ويى دا بار.
«مەن ۇلتتىق قاۋىپسىزدىك كوميتەتىنىڭ شەكارا قىزمەتىندە بورىشىمدى وتەيتىنىمە قۋانىپ تۇرمىن», دەدى اكە جولىن جالعاستىرعان اسكەرگە شاقىرىلۋشى ماديار جولجان.
ءىس-شارا بارىسىندا جاس ساربازدار شەكاراشىلاردىڭ قىزمەتىنە ارنالعان كورمەمەن تانىسىپ, ولاردىڭ كۇندەلىكتى ءومىرى تۋرالى بەينەروليكتەردى تاماشالادى. ال «باتىرلار» اسكەري-پاتريوتتىق ورتالىعىنىڭ تاربيەلەنۋشىلەرى ءىس-شاراعا قاتىسۋشىلارعا قويان-قولتىق ۇرىس تاسىلدەرىن كورسەتتى. سالتاناتتى شىعارىپ سالۋ ءراسىمى ۇلتتىق قاۋىپسىزدىك كوميتەتى شەكارا قىزمەتىنىڭ ءانسامبلى دايىنداعان كونتسەرتكە ۇلاستى.