كوكتەمدەگى تاسقىننان زارداپ شەگىپ, باسپانالارى بۇزىلعان پەتروپاۆل قالاسىنىڭ تۇرعىندارىنا «بىرلىك» شاعىن اۋدانىندا سالىنىپ جاتقان 700 ءۇيدىڭ قۇرىلىسى تولىعىمەن اياقتالىپ, وتكەن جەكسەنبىدە سوڭعى تۇرعىندارعا كىلتتەر تاپسىرىلدى.
ءسويتىپ, مەملەكەت باسشىسى ق.توقاەۆتىڭ «ەشكىم دە باسپاناسىز قالمايدى, بارىڭىزگە ءۇي بەرىلەدى» دەگەن ۋادەسى تولىقتاي ورىندالىپ وتىر. سۋىق تۇسكەنشە قۇرىلىس بىتپەي قالىپ, قارا جەلدە دالادا قالامىز با دەگەن ادامداردىڭ كۇدىكتەرى تولىق سەيىلدى. پرەزيدەنت بەرگەن تاپسىرمانى ۇكىمەت ورىنداپ, دەمەۋشىلەر قاراجات ءبولىپ, جەرگىلىكتى بيلىك ىسكە اسىرعان باتالى ىسكە قالىڭ كوپشىلىك شىن كوڭىلدەن رازى. وسىنىڭ ءوزى تاۋەلسىز ەلىمىزدە بىرلىك, ىنتىماق, ۇيىمشىلدىق بولسا ءاردايىم الىنبايتىن قامال جوق ەكەنىن كورسەتكەندەي بولدى.
جاڭادان سالىنعان 700 ۇيدەن باسقا وبلىستا 1 394 پاتەر ساتىپ الىنىپ, زارداپ شەككەندەرگە بەرىلدى. سونداي-اق 1 899 ۇيگە كۇردەلى جوندەۋ جاسالدى. جەكسەنبى كۇنى جاڭا ۇيلەردىڭ كىلتىن تاپسىرعان سالتاناتقا پرەمەر-ءمينيستردىڭ ورىنباسارى قانات بوزىمباەۆ, وبلىس اكىمى عاۋەز نۇرمۇحامبەتوۆ, بارلىق دەمەۋشىلەر, قۇرىلىس كومپانيالارىنىڭ باسشىلارى قاتىستى.
التىن كۇزدىڭ جايدارى كۇنىندە ءۇي العان جانداردىڭ كوڭىلدەرى شات, قۋانىشتارىندا شەك بولعان جوق. «جاپا شەككەن تۇرعىندارعا شىدامدىلىق كورسەتىپ, قيىن جاعدايعا توتەپ بەرگەنىنە ريزاشىلىعىمدى بىلدىرەمىن. جاڭا ۇيلەردى سالۋعا, قالاعان جاندارعا ەكىنشى نارىقتان ۇيلەر ساتىپ الۋعا, كۇردەلى جوندەۋ جاساۋعا قاراجات بولگەن بارلىق وتاندىق بيزنەس وكىلىنە, اتاپ ايتساق, «قازاقستان حالقىنا» قورىنىڭ باسقارما توراعاسى بولات جامىشەۆكە, «Kazakhmys» كورپوراتسياسى ديرەكتورلار كەڭەسىنىڭ توراعاسى ەدۋارد وگايعا, «Kaspi» كومپانياسى ديرەكتورلار كەڭەسىنىڭ توراعاسى ۆياچەسلاۆ كيمگە, «KAZ Minerals Management» ديرەكتورلار كەڭەسىنىڭ توراعاسى ولەگ نوۆاچۋككە العىس ايتامىن. سىزدەردىڭ كومەكتەرىڭىز بولماسا ءبىز مۇنداي اۋقىمدى قۇرىلىستى 3,5 ايدا بىتىرە الماس ەدىك», دەدى پرەمەر-ءمينيستردىڭ ورىنباسارى قانات بوزىمباەۆ ءوزىنىڭ قۇتتىقتاۋ سوزىندە.
وبلىس اكىمى عاۋەز نۇرمۇحامبەتوۆ تە دەمەۋشىلەرگە ىستىق ىقىلاسىن ءبىلدىردى. قۇتتىقتاۋ سوزىندە ول قۇرىلىس جۇمىستارى ۇنەمى باقىلاۋدا بولىپ, پرەزيدەنتتىڭ تاپسىرماسىن ورىنداۋعا بارلىق مۇمكىن بولعان شارالار جاسالعانىن ءمالىم ەتتى. «ەندى مىنە, سىزدەردىڭ قۋانىشتارىڭىزدى كورىپ ءوزىمىز دە قاتتى قۋانىپ تۇرمىز», دەدى ول. دەمەۋشىلەر اراسىنان سويلەگەن ۆياچەسلاۆ كيم وزدەرىنىڭ دە جاۋاپكەرشىلىكتى جەتە سەزىنگەندەرىن جەتكىزدى. «بىزگە قاراجات ءبولدىرۋ دە وڭاي بولعان جوق. سول اقشانىڭ ءتيىمدى تۇرعىدا ىسكە اسقانىن, حالىقتىڭ سۋىق تۇسپەي جىلى ۇيگە كىرىپ الۋىن ويلاپ, قاتتى الاڭداپ جۇردىك», دەدى ول.
جاڭا ءۇي العانداردىڭ قاتارىندا ءاليما جامانقۇزوۆا دا بار. ء«بىز كۇزدىڭ قارا سۋىق سوعا باستاعاننان ۋايىمعا باتىپ ەدىك. الايدا جەرگىلىكتى بيلىك ۇنەمى ءۇمىتىمىزدى ۇزبەي, ءۇيدىڭ جاقىندا دايىن بولاتىنىن ايتىپ, كوڭىلىمىزدى دەمدەپ وتىردى. اقىرى مىنە, سۋىق تۇسپەي جاڭا ۇيىمىزگە كىرىپ الدىق. جەرى دە كەڭ ەكەن, مەن ءوزىم باقشا ەگۋدى جاقسى كورەتىن اداممىن. پرەزيدەنتكە, ۇكىمەتكە ايتار العىسىم شەكسىز», دەدى ول قىزىل لەنتاعا بايلانعان كىلتتى الىپ تۇرىپ.
ۆاديم بەدرەنتسەۆ تۇرعىن ۇيلەرىن سۋ باسقان «زارەچنىي» كەنتىندە تۇرىپ كەلگەن ەكەن. ء«ۇيىمدى ءوز قولىممەن سالىپ ەدىم, ادامعا كۇندەلىكتى كەرەكتىڭ ءبارىن دە جاساعانمىن. مونشام قانداي ەدى. سونىڭ ءبارىن ءبىر كۇندە سۋ باسىپ, تالقانداپ كەتتى. قاتتى كۇيزەلىسكە ءتۇستىم. جاسىم الپىستان اسقاندا نە ىستەي الامىن؟ ايتەۋىر, قۇدايعا شۇكىر, ۇكىمەت دالادا قالدىرعان جوق. مىنە, جارقىراعان جاڭا ءۇي سالىپ بەرىپ وتىر. قۋانىشىمدى جاسىرا الماي تۇرمىن. وسى جۇمىستاردىڭ باسى-قاسىندا جۇرگەن بارشا قامقور جاندارعا مىڭ العىس», دەدى زەينەتكەر.
بۇل اۋدانعا جاڭادان سالىنىپ جاتقان 90 ورىندىق بالاباقشانىڭ قۇرىلىسى دا جاقىندا اياقتالادى. ونىڭ قۇرىلىسىن «Kaspi» كومپانياسى قارجىلاندىرعان, اشىلۋى قازان ايىنا بەلگىلەنگەن. سونىمەن قاتار وسى اۋداندا 600 ورىندىق مەكتەپ سالۋ دا جوسپارلانعان. جولدار تەگىس اسفالتتانىپ, اباتتاندىرۋ جۇمىسى دا جۇرگىزىلمەك. قازىر قاراسا كوز تويمايتىن, قازداي تىزىلگەن بىركەلكى ادەمى ۇيلەردەن جارقىن-جارقىن قۋانىشتى داۋىستار, كوڭىلدى اۋەندەر ەستىلىپ, تۇرعىندار قونىس تويىنا كىرىسىپ كەتكەن.
پەتروپاۆل