سوناۋ الاساپىران جىلداردا ەلىمىزگە ساياسي احۋالمەن قونىس اۋدارعان وزگە ەتنوس وكىلدەرى از ەمەس. ولارعا ءاربىر قازاق وتباسى جىلى الاقانىن توستى, قوناقجايلىعىن تانىتىپ, مەيىرىمىن توكتى. «سىيعا – سىي, سىراعا – بال» دەگەندەي, سول بىزبەن تامىرلاسقان ازاماتتار قازىر قاي قيىردا جۇرسە دە, جۇرتىمىزعا ىزگى نيەتىن ءبىلدىرىپ كەلەدى.
قازاقستاندا تۋىپ-ءوسىپ, كەيىننەن اتاجۇرتىنا قونىس اۋدارعان نەمىستەر گەرمانيادا قازاق ءداستۇرىن ساقتاپ, ەل مادەنيەتىنە قۇرمەت كورسەتىپ وتىر. گەپپينگەن قالاسىنىڭ وڭتۇستىگىندە «قازان» مادەني بىرلەستىگىنىڭ اشىلۋى – سونىڭ ءبىر ايعاعى. ورتالىققا بارعان ءار ادام قازاق مادەنيەتىمەن, سالت-داستۇرىمەن تانىسا الادى. ىرگەلى بىرلەستىكتى قۇرۋشىلار بۇل ارقىلى وزدەرىنىڭ قازاق جۇرتىمەن ارا قاتىناسىن ۇزبەي, كەرىسىنشە جاڭعىرتىپ, كەلەسى ۇرپاققا اماناتتايتىنىن ايتادى. بىرلەستىك 8 جىلدان بەرى قارقىندى ەڭبەك ەتۋدە. مادەني وشاقتىڭ نەگىزىن قالاعان اقمولا وبلىسىنىڭ تۋماسى – ۆالەري وسۆالد. ورتالىقتىڭ قابىرعالارى قازاق ۇلتتىق اشەكەيىمەن بەدەرلەنسە, اۋلاسىندا ارنايى الما اعاشتارى وتىرعىزىلعان.
– بىرلەستىگىمىزدە 100-گە تارتا ادام جۇمىس ىستەپ ۇلگەردى. ولاردىڭ بارلىعىنا جۋىعىن قازاقستاننان كەلگەن تۇرعىندار قۇرايدى, وزگە مەملەكەتتەن كەلگەندەر دە بار. ورتالىققا قازاقستاننان ءجيى قوناقتار كەلىپ تۇرادى. كيىز ءۇي مەن اباي مۇراسىن تاماشالاپ, ەت, قۋىرداق, باۋىرساق سىندى ءوزىمىز ءجيى ازىرلەيتىن ۇلتتىق تاعامدارعا تاپسىرىس بەرىپ جاتادى. بىرلەستىكتە اباي مۇراسىنا ارنالعان ارنايى بۇرىش بار. مۇندا ۇلى اقىننىڭ ءومىرى ءھام شىعارماشىلىعىمەن جاقىن تانىسۋعا بولادى. سونىمەن قاتار قوناقتار قازاقتىڭ ۇلتتىق كوستيۋمدەرى مەن دومبىرا, قوبىز سىندى اسپاپتارىن كورە الادى, – دەيدى ورتالىقتىڭ نەگىزىن قالاۋشى ۆالەري وسۆالد.
بىرلەستىكتى قۇرۋشىلار قازاقستان مەن گەرمانيا اراسىنداعى قارىم-قاتىناستىڭ بەرىكتىگىنە, ەكى ەل دوستىعىنا, قازاق حالقى مادەنيەتىنىڭ شەتەلدە تانىلۋىنا ىقپال ەتەتىندەرىنە سەنىمدى.
– قازاقستاندا تۋىپ, مادەنيەتىمەن سۋسىندادىق, ەندى گەرمانيادا ءجۇرىپ الىستا قالعان بايتاق جەرىمىزدى ءجيى ساعىنامىز. سوندىقتان دا ءوزىمىز سەكىلدى جاندارعا وسى ورتالىقتى اشىپ وتىرمىز. جەرگىلىكتى نەمىس حالقىنا دا قازاق ەلىنىڭ قوناقجايلىعىن, ادەپ-يباسى مەن مادەنيەتىن ورتالىق ارقىلى تانىتقىمىز كەلەدى, – دەيدى «قازان» بىرلەستىگىنىڭ مۇشەسى سەرگەي ليۋفت.