ەلىمىزدە ورتاشا اۋا تەمپەراتۋراسى 10 جىل سايىن 1,3 گرادۋسقا كوتەرىلەدى. بۇل مالىمەتتى Nazarbayev University-دە (NU) وتكەن «LCOY Kazakhstan-2024» اتتى جەرگىلىكتى جاستار كونفەرەنتسياسىندا يۋنيسەف-ءتىڭ قازاقستانداعى وكىلى جەتكىزدى.
NU ەلىمىزدەگى «SDSN» – بۇۇ تۇراقتى دامۋ ۇلتتىق كەڭسەسى رەتىندە وعان 25 وتاندىق ۋنيۆەرسيتەت پەن عىلىمي-زەرتتەۋ ينستيتۋتى بىرىگەدى. NU پروۆوستى يلەسانمي ادەسيدا اتالعان جوعارى وقۋ ورنى تۇراقتى دامۋ مەن كليماتتىڭ وزگەرۋىنە قارسى كۇرەس قاعيداتىن ۇستاناتىنىن ايتتى.
«كليمات وزگەرۋىنە قارسى كۇرەستە ءبىلىم مەن يننوۆاتسيانىڭ ماڭىزى زور. ءبىز قورشاعان ورتانى قورعاۋ ماسەلەلەرىن شەشۋگە ءبىلىمدى كوشباسشىلاردى دايارلاۋدى ماقسات ەتىپ وتىرمىز. سوندىقتان ءبىزدىڭ ستۋدەنتتەر مەن زەرتتەۋشىلەر جاڭاشىل تىڭ يدەيالاردى دۇنيەگە اكەلىپ, باسقالارعا ۇلگى بولىپ وتىر», دەدى ول.
قازاقستانداعى يۋنيسەف-ءتىڭ وكىلى, دوكتور راشەد مۇستافا سارۆاردىڭ ايتۋىنشا, ەلىمىزدەگى 6 ميلليوننان اسا بالا كليماتتىڭ وزگەرۋى سالدارىنان زارداپ شەگەدى ەكەن. ماسەلەن, سونىڭ ىشىندە تابيعاتتىڭ توسىن اپاتتارى بالا دەنساۋلىعى مەن وقۋىنا كەرى اسەر ەتەدى. يۋنيسەف-ءتىڭ وكىلىنىڭ پىكىرىنشە, كليماتتىڭ وزگەرۋىنە قارسى جەرگىلىكتى دەڭگەيدە ۇيىمداستىرىلعان ءىس-شارالار الەمدى الاڭداتىپ وتىرعان ماسەلەنى شەشۋگە ايتارلىقتاي ۇلەس قوسپاق.
«كليماتتىڭ وزگەرۋىنە قارسى يۋنيسەف ۇكىمەت پەن جاستاردى, اكادەميالىق ورتانى, سەرىكتەستەرىمىز بەن قاۋىمداستىقتاردى تولىق قولدايدى. ءبىز جاستاردىڭ وسى باعىتتاعى بەلسەندىلىگىنە جول اشساق دەيمىز. يندۋسترياعا دەيىنگى داۋىردەن بەرگى جاھاندىق تەمپەراتۋرا تسەلسي بويىنشا شامامەن 1,1 گرادۋسقا كوتەرىلدى. ال 2030 جىلعا قاراي تاعى دا 1,5 گرادۋسقا كوتەرىلمەك. بىرقاتار ايماقتا تەمپەراتۋرا 35 گرادۋستان جوعارى قالىپتان تىس ىستىق بولعانىن بايقادىق», دەيدى دوكتور راشەد مۇستافا سارۆار.
كونفەرەنتسيا بارىسىندا قاتىسۋشىلار كليماتتىڭ وزگەرۋ اسپەكتىلەرىن قوزعاپ, ءوز وي-پىكىرلەرىن ورتاعا سالدى. اسىرەسە ەلىمىزگە وزەكتى ماسەلەنىڭ ءبىرى – ورتالىق ازياداعى سۋ قاۋىپسىزدىگى تاقىرىبى دا تالقىلاندى. سەسسيا قورىتىندىسىندا جاستار الداعى قاراشا ايىندا ازەربايجاننىڭ باكۋ قالاسىندا وتەتىن بۇۇ-نىڭ كليماتتىڭ وزگەرۋى جونىندەگى 28-كونفەرەنتسياسىندا (COP 29) بىرلەسكەن مالىمدەمە جاسايتىن بولدى.
«Ecostep» اتتى الەۋمەتتىك جوبانىڭ نەگىزىن قالاعان. ە.ا.بوكەتوۆ اتىنداعى قاراعاندى ۋنيۆەرسيتەتىنىڭ ستۋدەنتى مادينا اسەتقىزى قازىر جاستاردى الدىمەن قايتا وڭدەلمەيتىن رەسۋرستاردى ۇتىمسىز باسقارۋ ماسەلەسى دە تولعاندىراتىنىن ايتتى. ء«بىزدىڭ مىندەتىمىز – تابيعاتتى جانە ونىڭ بايلىعىن بىزدەن كەيىنگى ۇرپاققا امان ساقتاۋ», دەيدى ول.
سونداي-اق جيىندا كليمات وزگەرۋ كەلىسسوزى بارىسىندا جاس كوشباسشىلاردىڭ ءرولى مەن ولاردىڭ باستامالاردى دايىنداۋعا قالاي ۇلەس قوساتىنى دا ءسوز بولدى.