ەمحانالاردا Face-ID جۇيەسى ارقىلى جالعان قۇجات جاساۋعا توسقاۋىل قويىلماق. دەنساۋلىق ساقتاۋ ءمينيسترى اقمارال ءالنازاروۆانىڭ ايتۋىنشا, قاناتقاقتى جوبا استاناداعى مەديتسينالىق-سانيتارلىق كومەك بويىنشا رەسپۋبليكالىق ەمحانادا ىسكە قوسىلدى.
الدىمەن ناۋقاستار Face-ID جانە ۆەب-كامەرا كومەگىمەن جەكە باسىنىڭ سايكەستىگىن انىقتايدى. بۇل ولارعا كورسەتىلگەن قىزمەت تۋرالى دەرەكتەردى بۇرمالاپ, جالعان ەسەپ جازۋعا مۇمكىندىك بەرمەيدى. بيۋدجەت قارجىسىنىڭ, ساقتاندىرىلعان ازاماتتاردىڭ جارناسىنىڭ ماقساتسىز جۇمسالۋىنا جول بەرىلمەيدى. جوبا كەلەسى جىلدان باستاپ بارلىق ەمحاناعا ەنگىزىلەدى.
«وسى جىلدىڭ سوڭىنا دەيىن ءبىز استانادا بۇل قاناتقاقتى جوبانى ىسكە اسىرامىز, ال 1 قاڭتاردان باستاپ ونى بۇكىل رەسپۋبليكا بويىنشا اۋقىمىن كەڭەيتىپ, تاراتۋدى جوسپارلاپ وتىرمىز. بۇل جالعان قۇجات تولتىرۋدى تۇبىرىمەن جوق قىلاتىن ءتيىمدى قۇرال بولادى», دەدى اقمارال ءالنازاروۆا.