اۋىل وليمپياداسىنا ىرىكتەۋ باستالدى

وليمپياداعا اۋىل مەكتەپ­­­تە­رىنىڭ 9-11 سىنىپ وقۋشىلارى قاتىسا الادى. مۇنداعى ماق­سات – ەلىمىزدىڭ شالعاي ەلدى مەكەن­دە­رىن­دەگى دارىندى جانە تالانتتى بالالاردىڭ قابىلەتىن انىق­تاپ, ءبىلىمىن شىڭداۋ, حالىق­ارالىق وليمپيادالارعا قاتى­سۋعا ىنتالاندىرۋ. سايىس قاعي­دا­لارىنىڭ بارلىعى ەڭ بەدەلدى الەمدىك «IMO», «IPhO», «IChO», «IBO», «IGeO», «IOI», «IOL» وليمپيادالارىنىڭ ەرەجەلەرىنە سۇيەنىپ جاساقتالعان.

«اۋىل مەكتەپتەرىنىڭ وقۋشى­لارىنا ارنالعان جالپى ءبىلىم بەرەتىن پاندەر بويىنشا رەسپۋبليكالىق وليمپيادا العاش رەت وتكەن وقۋ جىلىندا وقۋ-اعارتۋ مينيسترلىگىنىڭ باستاماسىمەن وتكىزىلدى. ءبىلىم جارىسىنىڭ بىلتىرعى قورىتىندىسىنا كوز جۇگىرتسەك, اۋىل وقۋشىلارىنىڭ جۇلدەلى ورىندارعا يە بولۋ كورسەتكىشى سەگىز ەسەگە ارتقانىن انىق اڭعارامىز.

وتكىزۋ قاعيدالارىنا ساي­كەس وليم­پيادا 13 ءپان بويىن­شا, ناقتىراق ايتساق, جاراتىلىستانۋ-ماتەماتيكا باعىتىنداعى 6 ءپان, قوعامدىق-گۋمانيتارلىق باعىتتاعى 7 ءپان بويىنشا وتكى­زىلەدى جانە 3 كەزەڭ­نەن تۇرادى. بىلتىر سايىستىڭ ءبىرىنشى كەزەڭىنە 78 404 وقۋشى قاتىسىپ, 24 122 وقۋشى كەلەسى كەزەڭگە ءوتتى. ال رەسپۋب­لي­كالىق كەزەڭدە 740 وقۋشى باق سىنادى. قورى­تىندى كەزەڭدە 335 جەڭىمپاز وقۋ-اعارتۋ مينيسترلىگىنىڭ ديپ­لومىنا, 69 تۇلەك جوعارى وقۋ ورىندارىنىڭ ءبىلىم گرانتىنا يە بولدى», دەدى «دارىن» رەسپۋب­ليكالىق عىلىمي-پراك­تيكالىق ورتا­لى­عىنىڭ ديرەكتورى عاجدەمبەك تۇرسىنوۆ.

پاندىك وليمپيادا – وقۋشى­لاردىڭ ساناسىندا العاشقى عىلىمي ىزدەنىستەرگە جول سالاتىن, بولاشاق عالىمداردى شابىتتاندىراتىن, عىلىممەن ەركىن اينالىساتىن جاستار توبىن قالىپتاستىراتىن ەڭ اۋقىمدى باعدارلامالىق سايىس ەكەنى انىق. ايتا كەتەيىك, اتالعان جارىسقا قاتىسۋعا بارلىق نيەت بىلدىرۋشىلەر «auyl.daryn.kz» سايتىنا تىركەلۋ قاجەت. ال سايىستىڭ وتكەن جىلعى جەڭىمپازدارى تاڭداعان پاندەرى سايكەس كەلسە, بيىلعى ءبىلىم باسەكەسىنىڭ رەسپۋبليكالىق كەزەڭىنە كونكۋرس­تان تىس قاتىسا الادى.

«بۇل وليمپيادا – ءبىز سەكىلدى اۋىل بالالارىنا وتە ۇلكەن مۇمكىندىك. مەن ءوزىم اقتوبە وبلىسى, شالقار اۋدا­نى, توعىز اۋىلىنىڭ تۋماسىمىن. بىلتىرعى اۋىل وقۋشىلارىنا ارنالعان ءبىلىم سايىسىنا «قازاقستان تاريحى» پانىنەن قاتى­سىپ, جەڭىمپاز اتاندىم. ناتيجەسىندە, ح.دوسمۇحامەدوۆ اتىنداعى اتىراۋ ۋنيۆەرسيتەتىنە گرانت ۇتىپ الدىم, ودان بولەك بىرنەشە باعالى سىي­لىققا دا يە بولدىم. بۇل عىلىمعا دەگەن قىزىعۋشىلىعىمىزدى ودان سايىن ارتتىردى. جارىسقا دايىندىقتى 10-سىنىپتان باستاعان ەدىم. وسى جىلعى وليمپيادا قاتىسۋشىلارىنا دا ەرتەرەك قام­دا­نۋدى ۇسىنامىن. ويتكەنى ەڭبەگىڭە ساي ناتيجە كورسەتەسىڭ. الداعى ۋاقىتتا ءوزىم دە حالىقارالىق وليمپيادالارعا وقۋ­شى دايىنداپ, ءبىلىم سالاسىنا جاقسى ىق­پال ەتۋگە ۇمتىلامىن», دەيدى اۋىل وليم­پيا­داسىنىڭ جەڭىمپازى ەدىگە ماديار.

«دارىن» رەسپۋبليكالىق عىلىمي-پراكتيكالىق ورتا­لى­عىنىڭ ادىسكەرى سەرىكجان دامىس­حان­ ۇلىنىڭ ايتۋىنشا, وليمپيا­دا ء«بىر كومپيۋتەر – ءبىر وقۋشى – ءبىر كامەرا» قاعيداتى بويىنشا وتكىزىلەدى.

«قىركۇيەكتە بايقاۋدىڭ باستاپقى, قازاندا اۋداندىق, قاراشادا وبلىستىق, ال جەلتوق­ساندا رەسپۋبليكالىق كەزەڭى وتەدى. ءاربىر كەزەڭ قورىتىندىسى ورتالىق­تىڭ «daryn.kz» سايتىندا جاريالانا­دى. ايتا كەتەيىك, ىرىكتەۋ ونلاين-پلاتفورمادا جۇزەگە اسادى. وليمپيادا­­نىڭ IV رەسپۋبليكالىق كەزەڭىنە جارا­تى­لىستانۋ-ماتەماتيكا با­­عى­­تىنداعى 9-11(12) سىنىپ وقۋ­شىلارى, ال قوعامدىق-گۋمانيتارلىق باعىتتاعى 10-11(12) سىنىپ وقۋشى­لارى قاتىسادى. IV كەزەڭ­نىڭ جەڭىمپاز­دارى الداعى زياتكەرلىك جارىستارعا دايىن­دالۋ ءۇشىن وقۋ-جاتتىعۋ جيىندارىندا بىلىمدەرىن شىڭدايدى», دەيدى س.دامىسحان ۇلى.