سپورت سالاسىنداعى سەرپىلىس

جەتىسۋ وبلىسىندا بۇقارالىق سپورتتى دامىتۋعا, سونىڭ ىشىن­دە شالعاي اۋداندار مەن اۋىل­داردا ەرەكشە كوڭىل بولىنگەن. قازىرگى كەزدە ەلدى مەكەندەردە 6 دەنە شىنىقتىرۋ-ساۋىقتى­رۋ كەشەنى بولسا, 31 مىڭنان اس­تام حالقى بار تەكەلى قالاسىن­دا اشىل­عان تاعى ءبىر جاڭا كەشەن جۇرت­شىلىقتى قۋانتتى. ەل قۋانىشى­نا ورتاقتاسقان وبلىس اكىمى بەي­بىت يساباەۆ تەكەلىدەگى كەشەن­نىڭ اشىلۋىنا قاتىسىپ, وڭىردە سپورت سالاسىنا جاسالىپ وتىرعان جاعدايلارعا قىسقاشا توقتالدى.

«تەكەلىدە زاماناۋي جاڭا دەنە شىنىقتىرۋ-ساۋىقتىرۋ كەشەنىن اشىپ وتىرمىز. مۇنداي كەشەن وبلىس ورتالىعى تالدىقورعان­نىڭ وزىندە جوق. جالپى, جەتىسۋ وبلىسى قۇرىلعالى بەرى وڭىردە 14 سپورت نىسانى سالىنىپ, ەل يگى­لىگىنە ۇسىنىلدى. الەۋمەتتىك سالا­نىڭ ينفراقۇرىلىمىن دامىتۋدا بلوكتى-ءمودۋلدى كونسترۋكتسيالار كەڭىنەن قولدانىلۋدا. وسى وڭ تاجىريبەنى ءبىز وتكەن جىلدان بەرى سپورت سالاسىندا دا پايدالانا باستادىق. ماسەلەن, بىلتىر اۋىلدىق جەرلەردە 4 بلوكتى-ءمو­دۋلدى سپورت كەشەنى سالىنسا, بيىل تاعى التاۋىنىڭ قۇرىلىسىنا قارجى ءبولىندى. وسىنداي جاڭا نىساندار قاراتال اۋدانىنىڭ تاستوبە اۋىلىندا, ەسكەلدى اۋدا­نىنىڭ شىمىر, جەتىسۋ, ەلتاي, كەر­بۇلاق اۋدانىنىڭ قىزىلجار, الاكول اۋدانىنىڭ قارابۇلاق اۋىلدارىندا بوي كوتەرەدى. مۇن­داي سپورتتىق نىسانداردان حا­لىق­ارالىق جارىستاردا بيىك شىڭ­داردى باعىندىراتىن مىقتى سپورت­شىلار شىعادى دەپ سەنەمىن», دەدى ب.يساباەۆ.

سالتاناتتى ءىس-شارا بارىسىندا سپورت ارداگەرلەرى تۇراتبەك چاراپيەۆ, ەرتاي دۇيسەباەۆ, اتلانتا وليمپياداسىنىڭ جۇل­دەگەرى ماۋلەن مامىروۆ باستا­عان زيالىلار جاڭا سپورت كەشە­نى­نىڭ لەنتاسىن سالتانات­تى تۇردە قيدى. ەندى بۇل سپورت نىسانىندا قا­لانىڭ وليمپيادا­لىق رەزەرۆتەگى ما­مانداندىرىل­عان بالالار مەن جاسوسپىرىمدەر سپورت مەكتەبىنىڭ تاربيەلەنۋشى­لەرى جاتتىعادى.

«تەكەلى قالاسىندا وليم­پيا­دالىق رەزەرۆتەگى ماماندان­دى­رىلعان بالالار مەن جاسوس­پى­رىم­دەر سپورت مەكتەبى جۇمىس ىس­تەيدى. مۇندا 495 بالانى 24 جات­­تىق­تىرۋشى 7 سپورت تۇ­رىنەن جات­تىق­تىرادى. جاڭا سپورت كە­شە­نى­­ اشىلۋىنىڭ ارقا­سىندا سپورت­پەن اينالىساتىن بالالار سانىن 800-گە دەيىن ۇلعاي­تۋعا مۇم­كىندىك بار. قوسىمشا سەك­تسيا­­لار – ايەلدەر كۇرەسى, ەركىن جانە گرەك-ريم كۇرەستەرى, ۇس­تەل تەننيسى ۇيىرمەلەرىن اشۋدى جوس­پارلاپ وتىرمىز, وعان قا­جەتتى 8 جاتتىقتىرۋشى جۇ­مىس­قا قا­بىلدانادى. مۇندا قا­لا حال­قى­نىڭ دا بۇقارالىق سپورت تۇر­لە­رىمەن اينالىسۋىنا مۇمكىن­­دىك جاسالعان», دەيدى تەكەلى قالا­لىق دەنە شىنىقتىرۋ-ساۋىق­تى­رۋ كە­شە­نىنىڭ ديرەكتورى ديدار وتەلباەۆ.

كوركى كوز سۇيسىنتەتىن ەكى قا­بات­تى جاڭا سپورت كەشەنى 180 ورىنعا ارنالعان. مۇندا قاجەتتى سپورت­تىق قۇرالدارمەن جابدىقتالعان بوكس, كۇرەس, جاتتىعۋ جانە ويىن زالدارى, سونىمەن بىرگە جۇگىرۋ جولى بار اشىق ستاديون, بالالار ويىن الاڭى مەن ۆوركاۋت-الاڭدار بار.

«تۋعان جەردىڭ ءبىر جۋسانى گۇل­دەسە قۋاناتىن ەلجاندىلىق سەزىم بار بويىمىزدا. ال تۋعان ء­وڭى­رىڭ وركەندەپ, ءزاۋلىم ۇيلەر, زا­ما­ناۋي كەشەندەر سالىنىپ جاتسا قالايشا قۋانبايسىڭ؟ تەكەلى تۇر­عىنى رەتىندە مەن دە وسىناۋ قۋا­نىشتى وقيعانىڭ كۋاگەرى بولىپ وتىرمىن. ريزامىن. ەندى وسىناۋ دەنە شىنىقتىرۋ-ساۋىقتىرۋ كە­شەنىنەن, جاڭا وبلىس اكىمى قۇت­تىقتاۋ سوزىندە ايتقانداي, ماۋلەن مامىروۆ, نۇرباقىت تەڭىزباەۆ, دەمەۋ جادىراەۆ سەكىلدى بالۋاندارىمىز, چەمپيوندارىمىز ءوسىپ شىقسىن», دەيدى مونوقالا تۇرعىنى باعلان تەمىر ۇلى.

سالتاناتتى اشىلۋ راسىمىنەن سوڭ كوپشىلىك وبلىس اكىمىمەن بىرگە ويىن مەن جاتتىعۋ زالدارىن, بوكس زالىن ارالاپ, عيماراتتىڭ ىشكى جاع­دايىمەن تانىستى. بەيبىت يسا­باەۆ جاس سپورتشىلارمەن اڭگىمە­لەسىپ, جاسوسپىرىمدەرگە دوپ جانە باسقا دا سپورتتىق جابدىقتار سىي­لادى.

وبلىس اكىمى ءباسپاسوز قىز­مە­تىنىڭ مالىمەتىنشە, وبلىس بويىن­شا قازىرگى كەزدە 6 دەنە شىنىقتى­رۋ-ساۋىقتىرۋ كەشەنى قولدانىستا. وعان قوسا پانفيلوۆ اۋدانىنىڭ ءۇشارال جانە سارقان اۋدانى­نىڭ المالى اۋىلدارىنداعى سپورت كەشەندەردىڭ قۇرىلىس-مونتاجداۋ جۇمىستارى جۇرگىزىلىپ جاتىر. تالدىقورعان قالاسىندا «جەتىسۋ» كاسىبي ۆولەيبول كلۋبىنا ارنالعان وقۋ-جاتتىعۋ بازاسى, جەكە ينۆەستورلار ەسەبىنەن كلۋب ۆولەيبولشىلارىنا ارنالعان 40 ورىندى جاتاقحانا, سونداي-اق, ۇستەل تەننيسى ورتالىعى سالىنۋدا. تالدىقورعان ورتالىق الاڭىنا جاڭعىرتۋ جۇمىستارى جاسالدى. «قازاقستان حالقىنا» قوعامدىق قو­رىنىڭ دەمەۋشىلىگىمەن پانفيلوۆ اۋدانى كوكتال جانە اقسۋ اۋدانى قاپال اۋىلدارىندا انگار تيپ­تەس 2 سپورتتىق نىسان بوي كوتەرۋدە. بۇگىندە وبلىستا 280 مىڭعا جۋىق ادام نەمەسە وبلىس حالقىنىڭ 40% سپورتپەن شۇعىلدانادى.

جالپى, وڭىردە سپورت سالاسى­نىڭ ينفراقۇرىلىمىن دامىتۋ با­عىتىندا اسىرەسە اۋىلدىق جەرلەردە بلوكتى-ءمودۋلدى كونسترۋكتسيالار كەڭىنەن پايدالانىلىپ كەلەدى. بۇعان دەيىن مەديتسينالىق جانە ۆەتەريناريالىق پۋنكتتەردى, سونداي-اق مادەنيەت وبەكتىلەرىن سالۋ كەزىندە قولدانىلىپ جۇرگەن بلوكتى-ءمودۋلدى كونسترۋكتسيالاردى پايدالانۋدىڭ وڭ تاجىريبەسى وتكەن جىلدان باستاپ سپورت سالاسىنا دا ەنگىزىلدى. ماسەلەن, سپورت كۇنىنە وراي قاراتال تاستوبە اۋى­لىن­دا جاڭا بلوكتى-ءمودۋلدى سپورت كەشەنى اشىلسا, وسىنداي نى­­ساندار كەربۇلاق اۋدانىنىڭ قى­زىلجار, الاكول اۋدانىنىڭ قا­را­­بۇلاق اۋىلدارىندا جانە ەس­كەل­دى اۋدانىنداعى شىمىر, جەتى­سۋ, ەلتاي اۋىلدارىندا سالىنىپ جاتىر.

ەسكەلدى اۋدانىنىڭ ىشكى ساياسات, مادەنيەت, تىلدەردى دامىتۋ جانە سپورت ءبولىمىنىڭ باسشىسى اسحات ءورازالينوۆتىڭ ايتۋىنشا, بۇگىندە اۋداندا 4 سپورت نىسانى جۇمىس ىستەيدى. ولاردا بالالار مەن جاسوس­پىرىمدەر سپورت مەكتەبىنىڭ 1 200-گە جۋىق تاربيەلەنۋشىسى سپورتپەن اي­نالىسادى. ال جاڭا بلوكتى-ءمو­دۋل­دى سپورت كەشەندەرىنىڭ سالىنۋى حالىقتى بۇقارالىق سپورتقا كوپ­تەپ تارتۋعا مۇمكىندىك تۋدىرىپ وتىر.

ەسكەلدى اۋدا­نىنداعى ەكى قا­باتتى جاڭا بلوكتى-ءمودۋلدى سپورت كەشەندەرىنىڭ ءبىرىنشى قاباتىندا ميني-فۋتبول, ۆولەيبول, باسكەت­بول سياق­تى كوماندالىق ويىندار­عا ارنال­عان زالدار ورنالاسسا, ەكىنشى قابا­تىندا بوكس, كۇرەس جانە باسقا دا سپورت تۇرلەرىنە ار­نالعان زالدار قاراستىرىلادى. سو­نى­مەن قاتار سپورت زالدارى, دۋش بول­مەلەرى, كيىم اۋىستىرا­تىن بولمەلەر جانە باسقا دا قاجەتتى ورىندار جو­با­لانعان. عيماراتتاردىڭ ارقاي­سىسىنىڭ اۋدانى 720 ش.م., ويىن زالدارىنىڭ الاڭى – 500 ش.م.

جالپى, وبلىستا وسى جىلعا جوسپارلانعان 6 سپورت نىسانىنىڭ 1-ەۋى قولدانىسقا بەرىلدى, قالعان بەسەۋىنىڭ قۇرىلىسى جىل سوڭىنا دەيىن اياقتالىپ, ىسكە قوسىلادى دەپ مەجەلەنىپ وتىر.

جەتىسۋ وبلىسى